কেৰালা, ১৫ মে': সবৰিমালাৰ লৰ্ড আয়েপ্পা মন্দিৰত প্ৰৱেশৰ চেষ্টা চলোৱা আৰু ছ'চিয়েল মিডিয়াৰ জৰিয়তে বহু ভক্ত সকলৰ ধৰ্মীয় অনুভূতিক আঘাত হানাৰ ইচ্চাকৃত আচৰণৰ বাবেই BSNL ত কৰ্মৰত মহিলা কৰ্মচাৰী ৰেহানা ফাতিমাক বাধ্য়তামূলক অৱসৰৰ নিৰ্দেশ প্ৰদান কৰা হৈছে কোম্পানীটোৰ পৰা ।
উল্লেখ্য যে, ভাৰতীয় সঞ্চাৰ নিগম লিমিটেডত এগৰাকী টিলিকম টেকনিচিয়ান হিচাপে কৰ্মৰত আছিল ফাতিমা । ফেচবুকত ধাৰ্মিক অনুভূতিক আঘাত হানিব পৰা কৈ কৰা কিছুমান বিৰ্তকিত প'ষ্টৰ বাবেই ২০১৮ বৰ্ষৰ নৱেম্বৰ মাহত গ্ৰেপ্তাৰ হোৱাৰ পাচৰে পৰা কৰ্মৰ পৰা নিলম্বিত কৰা হৈছিল মহিলা কৰ্মচাৰী গৰাকীক ।
বাধ্য়তামূলক অৱসৰৰ নিৰ্ণয়ক নিন্দা জনাই মহিলা কৰ্মচাৰীগৰাকীয়ে কোম্পানীৰ পৰা জাৰি কৰা এই আদেশৰ বিৰুদ্ধে প্ৰত্যাহ্বান জনাব বুলি উল্লেখ কৰে ।
সংবাদ মাধ্যমৰ সৈতে হোৱা বাৰ্তালাপত এই সিদ্ধান্তৰ আঁৰত ৰাজনৈতিক হস্তক্ষেপ আছে বুলি অভিযোগ উত্থাপন কৰিছে মহিলাগৰাকীয়ে । কোম্পানীৰ ফালৰ পৰা প্ৰদান কৰা নিৰ্দেশত মহিলাগৰাকীৰ আচৰণ, ক্ৰিয়া-কলাপকলৈ কোম্পানীয়ে চলোৱা আভ্যন্তৰীণ তদন্তৰ পাচতেই এই সিদ্ধান্ত গ্ৰহণৰ কথা উল্লেখ কৰা হৈছে ।
