বৰপেটা,১৫ জানুৱাৰীঃ মঙলবাৰে ৰাজ্যজুৰি পালন কৰা হ’ল উৰুকা ৷ উৰুকাৰ পিছত বুধবাৰে পুৱা মেজিৰ জুইত সেৱা লয় অসমবাসী ৰাইজে ৷ পিছে প্ৰাচীন সত্ৰীয়া পৰম্পৰা অনুসৰি সত্ৰনগৰী বৰপেটাত বুধবাৰেহে পালন কৰা হ’ব উৰুকা ৷ সেইসূত্ৰে জিলাখনৰ বৰপেটা, বহৰি, ভৱানীপুৰ, মৈৰামাৰা, হাউলী, সুন্দৰীদিয়া, পাটবাউসী, জনিয়া, গজিয়া, বাৰাদি, কেওটকুছি, মৌটুপুৰী আদি শতাধিক গাওঁৰ ৰাইজে বুধবাৰে পালন কৰে ভোগালীৰ উৰুকা ৷
উৰুকা উপলক্ষে বৰপেটা সত্ৰৰ কীৰ্তনঘৰৰ টুপৰ চোতালত মেজি নিৰ্মাণ কৰে স্থানীয় লোকসকলে ৷ সমান্তৰালকৈ হাটীসমুহত ভেলাঘৰ নিৰ্মাণ কৰে ডেকা-বুঢ়া সকলোৱে ৷ পৰম্পৰা অনুসৰি বৰপেটাত বিৰিণা, নল খাগৰি, কঁহুৱা আদিৰে ভেলাঘৰ আৰু মেজি নিৰ্মাণ কৰা হয় ৷ এইক্ষেত্ৰত আধুনিকতাক আদৰি লোৱা নাই সত্ৰবাসীয়ে ৷ সত্ৰনগৰীখনত পৰম্পৰা অনুসৰি পূণ্য মাহ হিচাপে মাঘ মাহতহে মেজি প্ৰজ্বলন কৰি অগ্নি সেৱা কৰা হয় ৷ সেইমতে পাঁচদিনীয়াকৈ পালন কৰা হয় মাঘ বিহু ৷ বৃহস্পতিবাৰে পুৱা সত্ৰৰ ভকতসকলে টুপৰ চোতালত মেজি প্ৰজ্বলিত কৰাৰ পিছতেই সত্ৰনগৰীখনৰ হাটীসমূহত নিৰ্মাণ কৰা মেজিসমুহ প্ৰজ্বলিত কৰা হ’ব ৷
বৰপেটাত উৰুকাৰ ভোজভাতৰ লগতে বিশেষভাৱে জনপ্ৰিয় খাদ্য হৈছে আলু ভজা ৷ ভেলাঘৰ নিৰ্মাণৰ লগতে হাটীৰ যুৱকসকলে সন্ধিয়াৰ পৰা আলু ভজা কামত ব্যস্ত হৈ পৰে ৷
লগতে চাওকঃমৰিগাঁৱত উদযাপন পৰম্পৰাগত কণী যুঁজ
