নিউজ ডেস্ক, 4 মাৰ্চঃ পুলৱামা আক্ৰমণৰ পাচতেই কংগ্ৰেছ দলে উত্থাপন কৰা প্ৰশ্ন সন্দৰ্ভত নিজৰ মন্তব্য প্ৰকাশ কৰিছে ভাৰতীয় জনতা পাৰ্টীৰ অধ্যক্ষ অমিত শ্বাহে ৷ গুজৰাটৰ ৰাজধানী আহমেদাবাদত এক ৰেলী সম্বোধন কৰি ভাৰতীয় বায়ু সেনাৰ দ্বাৰা সংঘটিত এয়াৰ ষ্ট্ৰাইকত 250ৰো অধিক সন্ত্ৰাসবাদী নিহত হোৱা বুলি প্ৰকাশ কৰিছিল ভাজপা অধ্যক্ষগৰাকীয়ে ৷
ভাজপা অধ্যক্ষগৰাকীৰ এই মন্তব্যৰ পাচতেই এই মন্তব্যক লৈ সোচ্চাৰ হৈ উঠিছে বিৰোধী দলসমূহ ৷ সোমবাৰে কংগ্ৰেছী নেতা মনীষ তিৱাৰীয়ে অমিত শ্বাহক ক্ষুৰধাৰ সমালোচনা কৰি, দেশৰ সুৰক্ষাৰ বাবে প্ৰাণ ত্যাগ কৰা নিৰাপত্তা বাহিনীকো বিজেপিয়ে নিজৰ নিকৃষ্ট ৰাজনীতিত ব্যৱহাৰ কৰিছে বুলি উল্লেখ কৰে ৷ তেঁও কয় যে, যেতিয়া ভাৰতীয় বায়ু সেনাই এই সন্দৰ্ভত কোনো তথ্য প্ৰকাশ কৰা নাই সেইক্ষেত্ৰত কেন্দ্ৰত শাসনত থকা দলটোৰ ৰাষ্ট্ৰীয় অধ্যক্ষই কিদৰে এই সন্দৰ্ভত তথ্য প্ৰকাশ কৰিব পাৰিলে বুলি প্ৰশ্ন উত্থাপন কৰে ৷ দেশৰ সুৰক্ষাৰ দিশটোক এইদৰে ৰাজনীতিকৰণ কৰাৰ পৰা বিৰত থাকিবলৈ বিজেপি দলক আহ্বান জনায় কংগ্ৰেছ নেতাগৰাকীয়ে ৷
আনহাতে ভাজপা অধ্যক্ষগৰাকীয়েও বিপক্ষ দলক আক্ৰমণৰ লক্ষ্য কৰি কয়, "নৰেন্দ্ৰ মোডীৰ নেতৃত্বৰ চৰকাৰে ছাৰ্জিকেল ষ্ট্ৰাইক আৰু এয়াৰ ষ্ট্ৰাইক কৰি সন্ত্ৰাসবাদক কঠোৰ জৱাব দিবলৈ সক্ষম হৈছে ৷ এই কথা বিৰোধী দলসমূহে মানি ল'বলৈ টান পাইছে ৷ সেয়েহে মমতা দিদিয়ে প্ৰমাণ বিছাৰিছে, ৰাহুল বাবাই ৰাজনীতিকৰণ কৰা হৈছে বুলি কৈছে, অখিলেশ যাদৱে সমগ্ৰ বিষয়টোৰ তদন্ত বিচাৰিছে, আছলতে কি হৈছিল সেয়া তেঁওলোকৰ জ্ঞাত নহয়ে, আৰু সেয়েহে সেনাৰ ওপৰত সন্দেহ ব্যক্ত কৰিছে ৷ কিন্তু আমেৰিকা, ইজৰাইলৰ পিচতে ভাৰত হৈছে তৃতীয়খন ৰাষ্ট্ৰ যিয়ে দেশৰ সুৰক্ষা বাহিনীৰ ওপৰত হোৱা আক্ৰমণৰ প্ৰত্যুত্তৰ দিবলৈ সক্ষম হৈছে ৷ এতিয়া সমগ্ৰ বিশ্বই ভাৰতৰ শক্তিৰ বিৰুদ্ধে গম পাইছে, গতিকে পৰৱৰ্তী পৰ্যায়ত ভাৰতীয় সেনাৰ গাত হাত দিলে তাৰ উত্তৰ টোপেৰে দিয়া হ'ব "৷
