নিউজ ডেস্ক, 19 ডিচেম্বৰঃ সংশোধিত নাগৰিকত্ব আইন, 2019ৰ বিৰোধিতাৰে দিল্লীত অব্যাহত থকা প্ৰতিবাদৰ ফলত দিল্লী আৰক্ষীয়ে ৰাজধানী চহৰখনত যাতে কোনো অপ্ৰীতিকৰ পৰিস্থিতিৰ সৃষ্টি নহয় তাৰ বাবে সজাগ হোৱা পৰিলক্ষিত হৈছে ৷ দক্ষিণ পূৱ আৰু উত্তৰ পূব জিলাত হৈ যোৱা প্ৰতিবাদৰ পাচত দিল্লী আৰক্ষীয়ে বিভিন্ন জিলাত পৰিস্থিতি নিৰীক্ষণ কৰিবলৈ অভিযান অব্যাহত ৰাখিছে ৷
জানিব পৰা মতে,দিল্লীৰ বিভিন্ন জিলাত আৰক্ষী আৰু অমন কমিতিৰ সৈতে অনুষ্ঠিত হৈছে নিয়মিতভাৱে বৈঠক ৷ তদুপৰি কিছুমান স্পৰ্শকাতৰ অঞ্চলত আৰক্ষীয়ে ফ্লেগমাৰ্চো কৰে ৷ লগতে কোনো ধৰণৰ ভুৱা বাতৰিক বিশ্বাস নকৰিবলৈ আৰু ভুৱা বাতৰি প্ৰচাৰ নকৰিবলৈ আৰক্ষীয়ে জনসাধাৰণক আহ্বান জনায় ৷ আৰক্ষী উপায়ুক্তই জনোৱা অনুসৰি বুধবাৰে তেওঁলোকে খ্যালা আৰক্ষী চকীৰ অন্তৰ্গত অমন কমিতি আৰু অন্যান্য লোকৰ সৈতে বৈঠক অনুষ্ঠিত কৰে ৷ ইয়াৰ পাচতে তেওঁলোকে অঞ্চলটোত ফ্লেগমাৰ্চ কৰে ৷
উল্লেখ্য যে, সংশোধিত নাগৰিকত্ব আইনখনৰ বিৰোধিতাৰে নতুন দিল্লীৰ চিলামপুৰ আৰু জাফাৰাবাদ এলেকাত হোৱা প্ৰতিবাদত আৰক্ষীয়ে মুঠ 8 জন লোকক গ্ৰেপ্তাৰ কৰাৰ লগতে দুটা গোচৰ ৰুজু কৰিছে ৷ ইপিনে দেওবাৰে উক্ত আইন খনৰ বিৰোধিতাৰে জামিয়া নগৰত হোৱা প্ৰতিবাদৰ ফলত বহু প্ৰতিবাদকাৰী আৰু আৰক্ষীৰ লোক আহত হয় ৷
লগতে পঢ়ক - খিলঞ্জীয়াৰ নামতে থাকিব অসমৰ ভূমিঃ চন্দ্ৰমোহন পাটোৱাৰী
