নিউজ ডেস্ক, ১০ এপ্ৰিলঃ শুকুৰবাৰে মধ্যপ্ৰদেশৰ ইন্দোৰত মৃ্ত্যু হয় এজন চিকিৎসকৰ । মৃত্যু হোৱা চিকিৎসকজন কৰ'ণা ভাইৰাছত আক্ৰান্ত বুলি সদৰী কৰে ৰাজ্য চৰকাৰে ।
মৃত চিকিৎসকজনৰ নাম ঔম প্ৰকাশ চৌহান বুলি চিনাক্ত কৰা হৈছে । চিকিৎসকজন ইন্দোৰৰ AYUSH ৰ প্ৰাক্তন বিষয়ববীয়া আছিল বুলিও জানিবলৈ দিয়ে । মধ্যপ্ৰদেশত কৰ'ণা ভাইৰাছত আক্ৰান্ত হৈ বৃহস্পতিবাৰে এজন চিকিৎসকৰ মৃত্যু হোৱা পাচত চহৰখনত এয়া দ্বিতীয়টো ঘটনা বুলি উল্লেখ কৰে ।
উল্লেখ্য যে, ড০ চৌহানৰ দেহত কৰ'ণা ভাইৰাছৰ লক্ষণ দেখা দিয়াৰ পাচতে ইন্দোৰৰ এখন ব্যক্তিগত হাস্পতালত ভৰ্তি কৰোৱা হৈছিল । চিকিৎসকজনক দৈনন্দিন উন্নতমানৰ চিকিৎসা সেৱা আগবঢ়োৱাৰ পাচতো কোনোধৰণৰ প্ৰভাৱ নপৰাত অন্য এখন হাস্পতালত ভৰ্তি কৰোৱা হৈছিল যদিও শুকুৰবাৰে আবেলি মৃত্যু হয় চিকিৎসকজনৰ । চিকিৎসকজনৰ মৃত্যুৰ পাচতে চহৰখনত কৰ'ণা ভাইৰাছত আক্ৰান্ত হৈ মৃত্যু হোৱা ৰোগীৰ সংখ্যা হয় মুঠ ২৭ জন ।
উল্লেখ্য যে, মধ্যপ্ৰদেশৰ মুখ্যমন্ত্ৰী শিৱৰাজ সিং চৌহানে ইতিমধ্যে ইন্দোৰ, ভোপাল আৰু উজ্জেইন জিলাত সকলো ধৰণৰ প্ৰৱেশত বাধা আৰোপ কৰিছে ।
