বিহাৰ, 11 জুলাই : বিহাৰত শুকুৰবাৰে বজ্ৰপাত পৰি 9 জনকৈ লোকৰ মৃত্যু হয় ৷ ৰাজ্যখনৰ এৰিয়া জিলাত 5 জন, পুৰ্ণিয়াত 2 জন, কিষাণগঞ্জ আৰু বাংকা জিলাত 1 জনকৈ লোকৰ বজ্ৰপাত পৰি মৃত্যু হয় ৷ লোককেইজনে পথাৰত কাম কৰি থকা সময়তে সংঘটিত হয় এই ঘটনা ৷ বজ্ৰপাত পৰি মৃত্যু হোৱা লোককেইজনৰ মাজত এগৰাকী 5 বছৰীয়া শিশুও আছে ৷
বিহাৰৰ ৰাজ্যিক দুৰ্যোগ প্ৰশমন বিভাগে জিলা প্ৰশাসনক বজ্ৰপাত পৰি মৃত্যু হোৱা লোককেইজনৰ মৃতদেহ মৰণোত্তৰ পৰীক্ষাৰ বাবে প্ৰেৰণ কৰাৰ লগতে সাহাৰ্যৰ ধন প্ৰদানৰ বাবে বিহিত ব্যৱস্থা গ্ৰহণৰ নিৰ্দেশ দিয়ে ৷ উল্লেখ্য যে, বিহাৰৰ মুখ্যমন্ত্ৰী নীতিশ কুমাৰে বজ্ৰপাতত মৃত্যু হোৱা লোকৰ পৰিয়ালক 4 লাখ টকাৰ এককালীন সাহাৰ্য প্ৰদানৰ ঘোষণা কৰিছিল ৷ মুখ্যমন্ত্ৰীগৰাকীয়ে লগতে এই সময়ছোৱাত জনতাক প্ৰয়োজনীয় সাৱধানতা অৱলম্বন কৰাৰো আহ্বান জনাইছিল ৷
লগতে পঢ়ক : মুম্বাইৰ বৰিভালীত ভয়ংকৰ অগ্নিকাণ্ড
