নিউজ ডেস্ক , 18 জুন : মানুহেৰে ভৰি থকা মেট্ৰ ষ্টেচনত মহিলাক অশালীন ব্যৱহাৰ ৷ পুনৰ উত্থাপিত হৈছে ৰাজধানী চহৰত মহিলাৰ সুৰক্ষাৰ ওপৰত প্ৰশ্ন ৷
ঘটনা অনুসৰি মহিলাগৰাকীয়ে নিশা প্ৰায় 9 বাজি 30 মিনিটত হুডা চিটী মেট্ৰ ষ্টেচনৰ পৰা এসকেলেটৰেৰে নামি আহি থকাৰ সময়তে এজন লোকে তেওঁক অশ্লীল ইংগিত কৰা অনুভৱ কৰে ৷ মহিলাগৰাকীয়ে উভতি মানুহজনক চৰিয়াই ৷ সেই দিনাই নিশা মহিলাগৰাকীয়ে ফেচবুকৰ মেচেঞ্জাৰ যোগে আৰক্ষীৰ পৰা সহায় বিচাৰে যদিও কোনো ধৰণৰ সঁহাৰি লাভ নকৰে ৷ পৰৱৰ্তী সময়ত তেওঁ দিল্লী মেট্ৰ ৰেল কৰপৰেচনৰ কাৰ্যালয়লৈ যায় আৰু কাৰ্যালয়ত তেওঁ চি চি টি ভি কেমেৰাৰ জৰিয়তে ব্যক্তিজনক চিনাক্ত কৰিবলৈ সক্ষম হয় ৷ মহিলাগৰাকীয়ে প্ৰকাশ কৰে যে, তেওঁ নিজৰ সুৰক্ষাৰ কথালৈ চিন্তা কৰি বৰ্তমানলৈ এজাহাৰ দাখিল কৰাৰ বিষয়ে সিদ্ধান্ত গ্ৰহণ কৰিবলৈ সক্ষম হোৱা নাই ৷ সোমবাৰে টুইটাৰযোগে এই বিষয়টো পুনৰ উত্থাপন কৰে ৷ টুইটাৰত এই বিষয়টো উত্থাপন কৰাৰ পাচতে তেওঁৰ লগত গুৰগাঁও আৰক্ষীয়ে যোগাযোগ কৰি এজাহাৰ দাখিল কৰিবলৈ জনায় ৷
মহিলাগৰাকীয়ে লগতে জনায় যে, তেওঁ ঘটনা সংঘটিত হোৱাৰ সময়ত সহায় বিচাৰে যদিও কোনো লোক আগবাঢ়ি নাহে ৷ কোনো আৰক্ষীৰ লোকো সেই সময়ত উপস্থিত নাছিল ৷ আৰক্ষী চকীলৈ মহিলাগৰাকী দৌৰি যায় যদিও আৰক্ষী চকীখন বন্ধ আছিল ৷ ব্যক্তিজনে মহিলাগৰাকীয়ে চিঞৰাৰ পাচত আঁতৰি যায় যদিও যোৱাৰ পূৰ্বে পুনৰ বাৰ অশালীন ব্যৱহাৰ কৰে ৷
