নিউজ ডেস্ক, 25 আগষ্ট : উত্তৰাখণ্ডত অব্যাহত আছে প্ৰকৃতিৰ ধ্বংসলীলা ৷ শুকুৰবাৰে চামোলী জিলাত ধ্বংসাৱশেষৰ ফলত বদ্ৰীনাথ ঘাইপথত আবদ্ধ হৈ পৰা এজন আহত ব্যক্তিক উদ্ধাৰ কৰে এছডিআৰএফৰ দলে ৷ এছডিআৰএফৰ তথ্য অনুসৰি, বৃহস্পতিবাৰে মাজ নিশা যোশীমথৰ কোতৱালিয়ে চামোলী জিলাৰ পাগলনালা অঞ্চলৰ সমীপত ধ্বংসাৱশেষৰ ফলত এজন আহত ব্যক্তি আবদ্ধ হৈ পৰাৰ তথ্য লাভ কৰে ৷
লগে লগে এছডিআৰএফৰ এটা দল সেই স্থানত উপস্থিত হৈ নিশাৰ আন্ধাৰ আৰু কঠোৰ পৰিস্থিতিত উদ্ধাৰ অভিযান চলায় ৷ পৰৱৰ্তী সময়ত আহত ব্যক্তিজনক উদ্ধাৰ কৰি ষ্ট্ৰেচাৰৰ সহায়ত সিপাৰলৈ অনা হয়, য'ৰ পৰা তেওঁক চিকিৎসাৰ বাবে চিকিৎসালয়লৈ প্ৰেৰণ কৰা হৈছে বুলি এছডিআৰএফৰ এজন বিষয়াই কয় ৷
বিষয়াগৰাকীয়ে কয় যে, উদ্ধাৰ কৰা ব্যক্তিজন ট্ৰেকিং কৰি থকাৰ সময়তে বদ্ৰীনাথ ঘাইপথত আবদ্ধ হৈ পৰিছিল ৷ ট্ৰেকিঙৰ পৰা উভতি অহাৰ সময়ত তেওঁ আহত হৈছিল আৰু সেয়েহে বাধাগ্ৰস্ত পথটো পাৰ হ'ব পৰা নাছিল ৷ ইয়াৰ পূৰ্বে বুধবাৰে ভূমিস্খলনৰ পিছত ধ্বংসাৱশেষ পৰিষ্কাৰ কৰিবলৈ বাগাদ্ধাৰত যাতায়তৰ বাবে ঋষিকেশ-চাম্বা ৰাষ্ট্ৰীয় ঘাইপথ বন্ধ কৰি দিয়া হৈছিল ৷ তেহৰী জিলা দুৰ্যোগ বিষয়া ব্রিজেশ ভাটে কয় যে, ঋষিকেশ-চাম্বা বগদ্ধাৰত বন্ধ পথ পৰিষ্কাৰ কৰাৰ কাম চলি আছে ৷ ভূমিস্খলনৰ পিছত বোল্ডাৰৰ বাবে মুঠ ১২টা গাঁৱৰ লিংক ৰোড বন্ধ কৰা হৈছে ৷
