নেশ্যনেল ডেস্ক, ১৮ অক্টোবৰ: ভাৰতৰ স্বাধীনতাৰ ৭৫ বছৰ উপলক্ষে দেশজুৰি অমৃত মহোৎসৱ উদযাপন কৰা হৈছে । এই অমৃত মহোৎসৱৰ লগত সংগতি ৰাখি দেশৰ ভিন্ন প্ৰান্তত ভাৰতীয় সেনা, চি আৰ পি এফ, সশস্ত্ৰ সীমা বল আদিয়ে বিভিন্ন কাৰ্যসূচী ৰূপায়ণ কৰিছে । একতাৰ বাৰ্তা বিলোৱাৰ উদ্দেশ্যেৰে ভাৰত-তিব্বত সীমান্ত আৰক্ষীয়েও লেহৰ পৰা গুজৰাটৰ কেৱৰিয়ালৈ চাইকেল ৰেলী উলিয়ায় । দেওবাৰে সন্ধিয়া এই ৰেলীত অংশ লোৱা জোৱানসকল ৰাজস্থানৰ ছিৰোহীৰ আবুৰোডস্থিত ব্ৰহ্মকুমাৰী প্ৰতিষ্ঠানত উপস্থিত হয় ।
জোৱানসকলক উৎসাহ যোগোৱাৰ উদ্দেশ্যে দেওবাৰে সন্ধিয়া ব্ৰহ্মকুমাৰী প্ৰতিষ্ঠানত এক অনুষ্ঠানৰ আয়োজন কৰা হয় । এই অনুষ্ঠানত অংশগ্ৰহণ কৰে ত্ৰিপুৰাৰ মুখ্যমন্ত্ৰী বিপ্লৱ কুমাৰ দেৱ । অনুষ্ঠানত অংশ লৈ তেওঁ একতাৰ বাৰ্তা বিলোৱা ভাৰত-তিব্বত সীমান্ত আৰক্ষীৰ জোৱানসকলৰ প্ৰশংসা কৰে । এই ৰেলীয়ে বিভিন্ন প্ৰান্ত ভ্ৰমণ কৰিব আৰু দেশত ঐক্যৰ বাৰ্তা বিলাব ।
ত্ৰিপুৰাৰ মুখ্যমন্ত্ৰীগৰাকীয়ে ব্ৰহ্মকুমাৰী প্ৰতিষ্ঠানে কৰা কামৰ প্ৰশংসা কৰি কয় যে, প্ৰতিষ্ঠানটোৱে আধ্যাত্মিকতাৰ ক্ষেত্ৰত সুন্দৰভাৱে কাম কৰি আছে আৰু এই কামে মানুহৰ জীৱন সলনি কৰি দিছে । তেওঁ কয় যে, উত্তৰ-পূৰ্বাঞ্চলত পৰ্যটনৰ যথেষ্ট সম্ভাৱনা আছে আৰু প্ৰধানমন্ত্ৰী নৰেন্দ্ৰ মোডীয়ে পৰ্যটন ক্ষেত্ৰৰ বিকাশৰ বাবে কাম কৰি আছে ।
মুখ্যমন্ত্ৰী বিপ্লব কুমাৰ দেৱে কয় যে, ত্ৰিপুৰাকে ধৰি উত্তৰ-পূৱৰ ৰাজ্যসমূহ অক্সিজেনৰ কেন্দ্ৰস্বৰূপ আৰু কৰ'ণা কালত মানুহে অনুভৱ কৰিব পাৰিছিল যে অক্সিজেন কিমান গুৰুত্বপূৰ্ণ । অমৃত মহোৎসৱ উপলক্ষে ছিৰোহীত চাইকেল ৰেলী অনুষ্ঠিত কৰা হৈছে । এই ৰেলীয়ে প্ৰায় ২,৭০০ কিলোমিটাৰ অতিক্ৰম কৰিব আৰু এতিয়ালৈকে ২,৩০০ কিলোমিটাৰ দূৰত্ব অতিক্ৰম কৰিছে জোৱানসকলে ।
দেওবাৰে ব্ৰহ্মকুমাৰী প্ৰতিষ্ঠানে সমদলত অংশ লোৱা জোৱান আৰু বিষয়াসকলক উষ্ম আদৰণি জনায় । এই ৰেলী ৰাজস্থানৰ পৰা গুজৰাট অভিমুখে ৰাওনা হ'ব । লেহৰ পৰা আৰম্ভ কৰা এই ৰেলী কেৱৰিয়াত থকা ষ্টেছ্যু অৱ ইউনিটীত অন্ত পৰিব । উল্লেখ্য যে, মুঠ ২৩ জন জোৱানে এই ৰেলীত অংশ লৈছে ।
লগতে পঢ়ক:সংযুক্ত কিষাণ মৰ্চাৰ ‘ৰে’ল ৰোকো’ৰ প্ৰভাৱ পৰা নাই উত্তৰ-পূৰ্বাঞ্চলত
