নেশ্যনেল ডেস্ক,১৫ জানুৱাৰী : আজি ৭৬ সংখ্যক সেনা দিৱস । এই বিশেষ দিনটোতে সন্ত্ৰাসবাদ সন্দৰ্ভত গুৰুত্বপূৰ্ণ মন্তব্য সেনাপ্ৰধান জেনেৰেল মনোজ পাণ্ডেৰ । তেওঁৰ মতে এতিয়া দেশৰ কিছুমান অঞ্চলত সন্ত্ৰাদবাদীৰ কাৰ্যকলাপ বৃদ্ধি পাইছে । তেওঁ উল্লেখ কৰা মতে পশ্চিম সীমান্তত জম্মু আৰু কাশ্মীৰৰ পৰিস্থিতি নিয়ন্ত্ৰণত আছে । কিন্তু যোৱা কেইমাহমানত বহুক্ষেত্ৰত সন্ত্ৰাসবাদী কাৰ্যকলাপ বৃদ্ধি পোৱা দেখা গৈছে । সেনাৰ প্ৰধান লক্ষ্য হৈছে অন্যান্য সংস্থাৰ সহযোগিতাৰে আধুনিক আন্তঃগাঁথনি শক্তিশালী কৰা । তেওঁ দাবী কৰা মতে ইয়াৰ মাজতে নিয়ন্ত্ৰণ ৰেখাত যুদ্ধবিৰতি আছে কিন্তু অনুপ্ৰৱেশৰ প্ৰচেষ্টাৰ পৰা এইটো স্পষ্ট যে সীমান্তৰ সিপাৰে এতিয়াও সন্ত্ৰাসবাদ বিদ্যমান ।
জেনেৰেল মনোজ পাণ্ডেৰ মতে দেশৰ সেনা সম্পূৰ্ণৰূপে প্ৰস্তুত আৰু যিকোনো প্ৰত্যাহ্বানৰ মোকাবিলা কৰিবলৈ সক্ষম আৰু উত্তৰ সীমান্তত সেনাৰ সামৰ্থ্য বিকাশৰ বাবে বহুতো দৃঢ় পদক্ষেপ গ্ৰহণ কৰা হৈছে ।
বৰ্তমান জৰুৰীকালীন ক্ৰয় নীতিৰ জৰিয়তে ভাৰতীয় সেনাই আধুনিক সঁজুলি আমদানি কৰিছে, যাৰ ভিতৰত আছে নতুন প্ৰযুক্তিৰে সজ্জিত অস্ত্ৰ । সীমান্ত অঞ্চলত গুৰুত্বপূৰ্ণ আন্তঃগাঁথনি বিকাশৰ বাবে বিশেষ অনুদান দিয়া হৈছে বুলিও পাণ্ডেয়ে উল্লেখ কৰে । তেওঁৰ মতে অতীতত ভাৰতীয় সেনাই দৃঢ়তা আৰু প্ৰতিশ্ৰুতিৰে সকলো নিৰাপত্তা প্ৰত্যাহ্বানৰ সন্মুখীন হৈছিল । কিন্তু প্ৰতিগৰাকী সেনাই তেওঁৰ দায়িত্ব পালন কৰিছে ।
তেওঁ দাবী কৰা মতে সেনাই সম্পূৰ্ণ সতৰ্কতাৰে অনুপ্ৰৱেশৰ প্ৰচেষ্টা বিফল কৰিছে । জম্মু-কাশ্মীৰৰ অঞ্চলসমূহত নিৰাপত্তা বাহিনীৰ নিৰন্তৰ প্ৰচেষ্টাৰ ফলস্বৰূপে, হিংসা যথেষ্ট হ্ৰাস পাইছে । সেনাই দেশৰ পৰা সন্ত্ৰাসবাদক উৎখাত কৰিবলৈ দৃঢ়তাৰে কাম কৰি আছে বুলিও তেওঁ গৌৰৱেৰে কয় ।
উত্তৰ-পূৰ্বাঞ্চলৰ বিদ্ৰোহী সংগঠন আৰু মণিপুৰ পৰিস্থিতি সন্দৰ্ভতো গুৰুত্বপূৰ্ণ মন্তব্য কৰে সেনাপ্ৰধান জেনেৰেল মনোজ পাণ্ডেয়ে । তেওঁ উল্লেখ কৰা মতে ভাৰতীয় সেনা আৰু চৰকাৰৰ নিৰন্তৰ প্ৰচেষ্টাৰ ফলত মণিপুৰৰ পৰিস্থিতি নিয়ন্ত্ৰণত সফলতা লাভ কৰিছে ।
৭৬ সংখ্যক সেনা দিৱসত জনসাধাৰণক সম্বোধন কৰি জেনেৰেল মনোজ পাণ্ডেয়ে কয় যে স্থানীয় বিদ্ৰোহী সংগঠনসমূহৰ সৈতে শান্তি আলোচনাৰ ফলত উত্তৰ-পূব অঞ্চলত ইতিবাচক বিকাশ দেখা গৈছে ।
জেনেৰেল পাণ্ডেৰ মতে যোৱা কেইবছৰমানত উত্তৰ-পূৰ্বাঞ্চলৰ স্থানীয় বিদ্ৰোহী সংগঠনসমূহৰ সৈতে গুৰুত্বপূৰ্ণ শান্তি চুক্তি আৰু শান্তি আলোচনা হৈছে । যাৰ ফলস্বৰূপে এই ক্ষেত্ৰত ইতিবাচক বিকাশ ঘটিছে । পুনৰ শান্তি প্ৰতিষ্ঠাত চৰকাৰী নীতিয়ে এক গুৰুত্বপূৰ্ণ ভূমিকা পালন কৰিছে । মণিপুৰত, চৰকাৰৰ সক্ৰিয়তা আৰু ভাৰতীয় সেনাৰ প্ৰচেষ্টাৰ বাবে পৰিস্থিতি নিয়ন্ত্ৰণলৈ আহিছে বুলিও তেওঁ দাবী কৰে । তেওঁ লগতে কয় যে মণিপুৰত শান্তি প্ৰতিষ্ঠাৰ দিশত দৃঢ় প্ৰচেষ্টা চলি আছে ।
জেনেৰেল মনোজ পাণ্ডেয়ে কয় যে আজি আমাৰ দেশ এখন নতুন যুগৰ দিশে আগবাঢ়িছে । দেশৰ স্বাধীনতাৰ ৭৫ বছৰ সম্পূৰ্ণ হোৱাৰ সময়ত এক সুৰক্ষিত পৰিৱেশ অপৰিহাৰ্য আৰু এই ক্ষেত্ৰত ভাৰতীয় সেনাই এক গুৰুত্বপূৰ্ণ ভূমিকা পালন কৰিছে । সেনাৰ প্ৰণালী আৰু কাৰ্যবোৰ অধিক কাৰ্যকৰী কৰাৰ বাবে স্বয়ংক্ৰিয়কৰণ, ডিজিটাইজেচন আৰু নেটৱৰ্কিঙত অগ্ৰগতি হৈছে । ভাৰতীয় সেনাই কাৰ্যকৰী পৰিস্থিতি সম্পৰ্কীয় সজাগতা, সিদ্ধান্ত সমৰ্থন প্ৰণালী, ব্যৱস্থাপনা তথ্য প্ৰণালী আৰু মানৱ সম্পদ ব্যৱস্থাপনা আদি ক্ষেত্ৰত অধিক সফলতা অৰ্জন কৰিছে । বিশেষকৈ সীমান্ত অঞ্চলত ৰাষ্ট্ৰ নিৰ্মাণৰ কামত সেনাৰ প্ৰচেষ্টা অব্যাহত আছে ।
লগতে পঢ়ক :সন্ত্ৰাসবাদীৰ বিৰুদ্ধে ৰাজৌৰীত সেনাৰ অপাৰেচন সৰ্বশক্তি
