নেশ্যনেল ডেস্ক,১৯ মে': কৰ'ণাৰ সংক্ৰমণ অব্যাহত থকাৰ মাজতে দেশৰ বিত্তীয় ৰাজধানী মুম্বাইত মুকৰ্মাইকোচিছ বা ব্লেক ফাংগাছৰ ঘটনা ক্ৰমে বৃদ্ধি হোৱা দেখা গৈছে । দেশত কৰ'ণা ৰোগীৰ সংখ্যা লাহে লাহে হ্ৰাস পাইছে যদিও আৰোগ্য হোৱা ৰোগীসকল এতিয়া মুকৰ্মাইকোচিছৰ বিপদাশংকাৰ সন্মুখীন হৈছে । মুম্বাইত এতিয়ালৈকে মুকৰ্মাইকোচিছৰ ১১১ টা ঘটনা পোহৰলৈ আহিছে । ৰোগীসকলক কিং এডৱাৰ্ড মেম'ৰিয়েল হাস্পতাল, নায়াৰ হাস্পতাল আৰু কুপাৰ চিকিৎসালয়ত চিকিৎসা কৰি থকা হৈছে । নাগৰিক সংস্থাই জনোৱা মতে ৰোগীসকলক পৰ্যবেক্ষণত ৰখা হৈছে কিন্তু তেওঁলোক সুস্থিৰ।
ইতিমধ্যে আহমেদ নগৰ জিলাৰ পৰা মুকৰ্মিকোচিছৰ দুটা ঘটনা পোহৰলৈ আহিছে । ইয়াৰে এটা জামখেদৰ পৰা আৰু আনটো শ্ৰীগোণ্ডা তালুকৰ পৰা । জামখেদৰ ৰোগীজন আহমেদনগৰত চিকিৎসাধীন হৈ আছে আনহাতে শ্ৰীগোণ্ডাৰ এজন পুনেত চিকিৎসাধীন হৈ আছে ।
ইফালে উদ্বেগজনকভাৱে জলগাওঁত মুকৰ্মাইকোচিছৰ ১৩ টা ঘটনা পোহৰলৈ আহিছিল আৰু তাৰ ভিতৰত ৬ গৰাকী ৰোগীৰ মৃত্যু হৈছে । আনহাতে নাগপুৰৰ চৰকাৰী দন্ত মহাবিদ্যালয় আৰু চিকিৎসালয়ত ৪০ জনৰো অধিক ৰোগীৰ চিকিৎসা চলি আছে ।
উল্লেখ যে ব্লেক ফাংগাছে নাক, চকু আদিত সংক্ৰমিত হয় আৰু অৱশেষত মগজুৰ আৱৰণত সোমাই । সময় মতে ইয়াৰ চিকিৎসা নহ'লে ৰোগীৰ মৃত্যু হয় ।
