বৰপেটাৰোড/ ডিব্ৰুগড়, ১৪ এপ্ৰিল: ৰঙালী বিহুৰ আনন্দ-উচাহৰ মাজতে মৰাণৰ পথালিবাম গোহাঁই গাঁও আৰু বৰপেটাৰোডত তিনিজন যুৱক নিহত হয় । কালিৰ দিনটোত পৰম্পৰা ৰক্ষা কৰি প্ৰতিজন অসমীয়াই গৰু বিহু অনুষ্ঠিত কৰা পাছতেই আজি অনুষ্ঠিত কৰিছে মানুহ বিহু । ৰঙালী আনন্দত মতলীয়া হৈছে প্ৰতিজন অসমীয়া । বিহুৰ আনন্দ-উচাহৰ মাজতে মৰাণৰ পথালিবাম গোহাঁই গাঁৱত বাইক আৰু ইক' ভানৰ মুখামুখি সংঘৰ্ষত বিকাশ বুঢ়াগোহাঁই (৪০) নামৰ এজন বাইক চালক নিহত হয় ৷ এই ঘটনাত গুৰুতৰভাৱে আহত ভুৱন বৰা (৩৫) নামৰ আন এজন যুৱক ৷ আহত যুৱকজনক সংকটজনক অৱস্থাত ডিব্ৰুগড় অসম চিকিৎসালয়লৈ প্ৰেৰণ কৰা হৈছে ।
ইপিনে, আজি বছৰৰ প্ৰথম দিনা বৰপেটাৰোডৰ ৰাষ্ট্ৰীয় ঘাইপথৰ বালাভিঠাত AS28C 9461 নম্বৰৰ শিল কঢ়িওৱা ট্ৰেক্টৰখনে ভুল পথেৰে আহি থাকোতে বৰপেটাৰোডৰ পৰা চিৰাঙলৈ গৈ থকা নম্বৰপ্লেট বিহীন এখন বাইকৰ সৈতে মুখামুখি সংঘৰ্ষ হয় ৷ ফলত থিতাতে এজন বাইক আৰোহী নিহত হোৱাৰ লগতে গুৰুতৰভাৱে আহত হয় আনজন আৰোহী ৷ আহত বাইক আৰোহীজনক ততাতৈয়াকৈ বৰপেটা মেডিকেল কলেজত ভৰ্তি কৰোৱা হয় ৷
এই দুৰ্ঘটনাত গুৰুতৰভাৱে আঘাতপ্ৰাপ্ত হৈ চিকিৎসাধীন হৈ থকা দ্বিতীয়জন বাইক আৰোহীৰো বিয়লি বৰপেটা মেডিকেল কলেজত মৃত্যু হয় ৷ এই দুৰ্ঘটনাত নিহত যুৱক দুজন হৈছে টোনো নাৰ্জাৰী (২৭) আৰু নিহাৰ বসুমতাৰী । নিহত যুৱক দুজনৰ ঘৰ চিৰাং জিলাৰ ছিডলী আৰক্ষী থানাৰ অন্তৰ্গত গৰুভাষাত । ইপিনে, বৰপেটাৰোড আৰক্ষীয়ে মৃতদেহ দুটা মৰণোত্তৰ পৰীক্ষাৰ অন্তত পৰিয়ালৰ লোকক গতাই দিয়ে ।
লগতে পঢ়ক:ৰঙালীৰ ৰঙীণ সময়ৰ মাজতে শোকাৱহ পথ দুৰ্ঘটনা - Road Accident
