কোকৰাঝাৰ, 19 ফেব্ৰুৱাৰী: বড়োলেণ্ড বিশ্ববিদ্যালয়ত যোৱা 15 ফেব্ৰুৱাৰীৰ পৰা অনুষ্ঠিত হোৱা দ্বিতীয় আন্তঃমহাবিদ্যালয় যুৱ মহোৎসৱৰ ৰবিবাৰৰ সন্ধিয়া সামৰণি পৰে ৷ বড়োলেণ্ড বিশ্ববিদ্যালয়ৰ অধীনস্থ বিভিন্ন মহাবিদ্যালয়ৰ সহস্ৰাধিক ছাত্ৰ-ছাত্ৰীৰ সমাগমৰে উখল-মাখল হৈ পৰা আন্তঃমহাবিদ্যালয়ৰ যুৱ মহোৎসৱৰ দেওবাৰৰ সামৰণি অনুষ্ঠানত মুখ্য অতিথি হিচাপে অংশগ্ৰহণ কৰে বিশ্বৰ সৰ্বকনিষ্ঠ অধ্যাপক সুবৰ্ণ আইজাক বাৰিয়ে ।
বিশ্বৰ সৰ্বকনিষ্ঠ অধ্যাপক আইজাক বাৰিয়ে বড়োলেণ্ড বিশ্ববিদ্যালয় সহ বিভিন্ন মহাবিদ্যালয়ৰ সহস্ৰাধিক ছাত্ৰ-ছাত্ৰী, অধ্যাপকৰ সতে এক মতবিনিময় অনুষ্ঠানত অংশ লয় । ইয়াৰোপৰি কোকৰাঝাৰ মেডিকেল কলেজ, চি আই টি আৰু বিনেশ্বৰ ব্ৰহ্ম অভিযান্ত্ৰিক মহাবিদ্যালয়ৰ ছাত্ৰ-ছাত্ৰীৰ সৈতেও মত বিনিময় কৰে অধ্যাপক বাৰিয়ে । বিশ্বৰ সৰ্বকনিষ্ঠ অধ্যাপক সুবৰ্ণ আইজাক বাৰিৰ প্ৰেৰণামুলক বক্তব্যই ছাত্র-ছাত্ৰীসকলক যথেষ্ট অনুপ্ৰাণিত কৰে ।
ইপিনে মত বিনিময় অনুষ্ঠানত ছাত্ৰ-ছাত্ৰীয়ে সোধা এক প্ৰশ্নৰ উত্তৰত কনিষ্ঠ প্ৰফেছৰ বাৰিয়ে নিজৰ সফলতাৰ কাৰণ পিতৃৰ অৰিহণা বুলি মন্তব্য কৰে ৷ অধ্যাপক বাৰিৰ সৈতে চেলফি উঠাৰ বাবেও অনুষ্ঠানত উপস্থিত লোকৰ মাজত হেতা-ওপৰা লগা পৰিলক্ষিত হয় ৷ যুৱ মহোৎসৱৰ কালিৰ সামৰণি অনুষ্ঠানত বড়োলেণ্ড বিশ্ববিদ্যালয়ৰ উপাচাৰ্য পি কে পাত্ৰ , পঞ্জীয়ক সুবুং বসুমতাৰী, বড়োলেণ্ড বিশ্ববিদ্যালয়ৰ ছাত্ৰ কল্যাণৰ সঞ্চালক প্ৰহ্লাদ ব্ৰহ্ম সহ কেইবাগৰাকীও বিশিষ্ট ব্যক্তি উপস্থিত আছিল ৷
15 ফেব্ৰুৱাৰী পৰা চাৰিদিনীয়া বৰ্ণিল কাৰ্যসূচীৰে অনুষ্ঠিত হোৱা বড়োলেণ্ড বিশ্ববিদ্যালয়ৰ দ্বিতীয় আন্তঃমহাবিদ্যালয় যুৱ মহোৎসৱত বড়োলেণ্ড বিশ্ববিদ্যালয়ৰ অধীনস্থ 37 খন মহাবিদ্যালয়ৰ সহস্ৰাধিক ছাত্ৰ ছাত্ৰীয়ে অংশগ্ৰহণ কৰিছিল ৷ উল্লেখ্য যে, আজি অৰ্থাৎ সোমবাৰে বিটিআৰৰ শিক্ষা বিভাগৰ উদ্যোগত কোকৰাঝাৰৰ বডোফা সাংস্কৃতিক প্ৰকল্পৰ প্ৰেক্ষাগৃহত অনুষ্ঠিত হ’বলগীয়া এক অনুষ্ঠানতো অংশগ্ৰহণ কৰিব বিশ্বৰ সৰ্বকনিষ্ঠ অধ্যাপক সুবৰ্ণ আইজাক বাৰিয়ে ৷
লগতে পঢ়ক: চিকিৎসকৰ হেমাহিৰ বাবে বড়োলেণ্ড বিশ্ববিদ্যালয়ৰ ছাত্ৰৰ মৃত্যুৰ অভিযোগ
