গুৱাহাটী,১৮ জুলাই : গুৱাহাটীৰ বিৰুবাৰীত ট্ৰেন্সফৰ্মাৰ বিস্ফোৰণৰ ফলত আঘাতপ্ৰাপ্ত ৪ গৰাকী লোক ক্ৰমাৎ সুস্থ হৈ উঠিছে । সকলো ঠিকে থাকিলে নিশান্ত তিৱাৰী নামৰ কিশোৰজনক ৪৮ ঘণ্টাৰ ভিতৰত হাস্পতালৰ পৰা অব্যাহতি দিয়া হ'ব । এই কথা উল্লেখ কৰিলে গুৱাহাটী চিকিৎসা মহাবিদ্যালয় হাস্পতালৰ অধীক্ষক ডাঃ অভিজিৎ শৰ্মাই ।
উল্লেখ্য যে বুধবাৰে বিৰুবাৰীত ট্ৰেন্সফৰ্মাৰ বিস্ফোৰণৰ পিচত বিদ্যুৎস্পৃষ্ট হৈ ৪ গৰাকী লোক আঘাতপ্ৰাপ্ত হৈছিল । লগে লগে আঘাতপ্ৰাপ্ত লোকসকলক গুৱাহাটী চিকিৎসা মহাবিদ্যালয় হাস্পতালত ভৰ্তি কৰোৱা হয় । সম্প্ৰতি তেওঁলোকৰ চিকিৎসা চলি আছে । ভুক্তভোগীসকলৰ স্বাস্থ্য সম্পৰ্কে গুৱাহাটী চিকিৎসা মহাবিদ্যালয় হাস্পতালৰ অধীক্ষক ডাঃ অভিজিৎ শৰ্মাই কয় যে আঘাতপ্ৰাপ্তসকলৰ অৱস্থা বৰ্তমান সুস্থিৰ হৈ আছে ।
তেওঁ উল্লেখ কৰা মতে ৰোহিত আলী নামৰ আঘাতপ্ৰাপ্ত লোকজনৰ শৰীৰৰ ৩০ শতাংশ অগ্নিদ্বগ্ধ হৈছে । চকু আৰু কাণত কিছু অংশ অগ্নিদ্বগ্ধ হৈছে । ইফালে মীৰা তিৱাৰী নামৰ ৪ বছৰীয়া শিশুটি ৫০ শতাংশ অগ্নিদ্বগ্ধ হৈছে । একেদৰে ৰিংকী তিৱাৰী ৬০ শতাংশ অগ্নিদ্বগ্ধ হৈছে আৰু নিশান্ত তিৱাৰী ৫-৮ শতাংশ অগ্নিদ্বগ্ধ হৈছে । ডাঃ অভিজিৎ শৰ্মাই জনোৱা মতে আঘাতপ্ৰাপ্ত লোকসকলৰ অৱস্থা সুস্থিৰ হৈ আছে । সকলো ঠিকে থাকিলে কণমানি নিশান্ত তিৱাৰীক আগন্তুক ৪৮ ঘণ্টাৰ ভিতৰত হাস্পতালৰ পৰা অব্যাহতি দিয়া হ'ব ।
ট্ৰেন্সফৰ্মাৰ বিস্ফোৰণৰ ঘটনাটোত আঘাতপ্ৰাপ্তসকলৰ ভিতৰত একেটা পৰিয়ালৰে তিনিগৰাকী সদস্য আছিল । তেওঁলোক ছয়গাঁৱৰ গৰৈমাৰীৰ পৰা বিৰুৱাৰীত আত্মীয়ৰ ঘৰলৈ আহিছিল । ঘৰলৈ উভতি যোৱাৰ সময়তে এই কৰুণ ঘটনা সংঘটিত হৈছিল । বিৰুবাৰী আৰক্ষী চকীৰ সমীপতে থকা হাউছ নং ৪৭ ৰ চৌহদত থকা ট্ৰেন্সফৰ্মাটো বিস্ফোৰণ হৈছিল ।
