যোৰহাট, ২১ আগষ্ট : সমগ্ৰ বিশ্বৰে পৰিচিত এখন অৰণ্য হ’ল যোৰহাটৰ মোলাই কাঠনি ৷ যোৰহাটৰ উত্তৰ প্ৰান্তৰ ককিলামুখ আৰু মাজুলীৰ ব্ৰহ্মপুত্ৰৰ বালিচৰক সাঙুৰি অৰণ্য মানৱ যাদৱ পায়েঙে এককভাৱে সৃষ্টি কৰিছিল অৰণ্যখন ৷ ৫৫০ হেক্টৰ অঞ্চলজুৰি বিস্তৃত অৰণ্যখনত এতিয়া চকু পৰিছে বনদস্যুৰ ৷
যিখন অৰণ্য সৃষ্টিৰ বাবেই অৰণ্য মানৱ যাদৱ পায়েঙে পদ্মশ্ৰী সন্মান লাভ কৰিছিল, সেই অৰণ্যখনত বন্যদস্যুৱে প্ৰৱেশ কৰি একেনিশাই বৃহৎ আকাৰ ১৪ জোপাকৈ শিমলু গছ কাটি লৈ যায় ৷ কাঠসমুহ ব্ৰহ্মপুত্ৰৰে বিভিন্ন কৌশল প্ৰয়োগ কৰি লৈ যায় বন্যদস্যুৱে লৈ যায় ৷ এইদৰে বনদস্যুৱে বনাঞ্চলখনত প্ৰৱেশ কৰি গছ কাটি লৈ যোৱা ঘটনাত মৰ্মাহত অৰণ্য মানৱ ৷
যাদৱ পায়েঙে সন্দেহ কৰা অনুসৰি গঁড়, হাতী আদি চিকাৰ কৰিবলৈ দুষ্কৃতিকাৰীয়ে অৰণ্যখনত প্ৰৱেশ কৰাৰ সম্ভাৱনা আছে ৷ পায়েঙে জনোৱা অনুসৰি অৰণ্যখনত দুটাকৈ গঁড়ৰ উপৰিও শতাধিক হৰিণাৰ লগতে হাতীও আছে ৷ অৰণ্যখনক সুৰক্ষা প্ৰদান কৰাৰ বাবে চৰকাৰক আহ্বান জনাইছে ৷ মোলাই কাঠনিত সুৰক্ষাকৰ্মী নিয়োগ কৰাৰো আশা কৰিছে অসম গৌৰৱ যাদৱ পায়েঙে ৷ উল্লেখ্য যে 2012 চনত এটা গঁড় চোৰাং চিকাৰীৰ বলি হৈছিল বিখ্যাত অৰণ্যখনত ৷
অৰণ্য মানৱে কয়, ‘‘ যোৰহাট, মাজুলীৰ বিন বিভাগক মই জনাইছো ৷ বনদস্যুৱে কেৱল গছ কাটিবলৈকে নহয়, গঁড় হত্যা কৰিবলৈও আহিব পাৰে ৷ হাবিখনত গঁড়, হাতী, বাঘ আছে ৷ বনদস্যুক কৰায়ত্ব কৰি শাস্তি প্ৰদান কৰক ৷ আজিৰে পৰা যাতে গছ-গছনি কটা নহয়, সেয়া নিৰীক্ষণ কৰক বন বিভাগে ৷ প্ৰশাসনে অৰণ্যখন সংৰক্ষণৰ ব্যৱস্থা কৰাটো বিচাৰো ৷’’
উল্লেখ্য যে মোলাই অৰণ্য হৈছে বালিৰ ওপৰত মানৱসৃষ্ট বিশ্বৰ প্ৰথমখন অৰণ্য ৷ যিখন অৰণ্য নিজ হাতেৰে গঢ়ি তুলিছিল পদ্মশ্ৰী যাদৱ পায়েঙে ৷ সেই বিখ্যাত অৰণ্যখন অসুৰক্ষিত হোৱাটো স্বাভাৱিকতে চিন্তনীয় হৈছে ৷
লগতে পঢ়ক : হাতীৰ খাদ্য যে ৰুব লাগে সেয়া ভাৰত চৰকাৰৰ আঁচনিত নাই: যাদৱ পায়েং
জন্মদিনত কেকৰ সলনি এজোপা গছ ৰুবলৈ আহ্বান যাদৱ পায়েঙৰ
পৃথিৱীত সকলোৱে গছ ৰুব জানে, কেৱল জীৱশ্ৰেষ্ঠই গছ কাটিব জানে : অৰণ্য মানৱ
