হাফলং, 29 জুলাই : ডিমা হাছাও জিলাত সংঘটিত হৈছে পুনৰ অপহৰণৰ ঘটনা । পাহাৰীয়া জিলাখনত পথ নিৰ্মাণৰ কামত যুক্ত এটা নিৰ্মাণ সংস্থাৰ দুই কৰ্মীক অচিনাক্ত দুৰ্বৃত্তৰ দলে অপহৰণ কৰি লৈ যায় বুলি অভিযোগ উত্থাপন হৈছে । জানিব পৰা মতে, এই অপহৰণৰ ঘটনা সংঘটিত হয় শুকুৰবাৰৰ নিশা । এতিয়ালৈকে ডিমা হাছাও আৰক্ষীয়ে এই অপহৰণ সংক্ৰান্ত কোনো তথ্য সদৰী কৰা নাই সংবাদ মাধ্যমৰ আগতে ।
প্ৰাপ্ত তথ্য অনুসৰি, মাহুৰ তামিংলং পথ নিৰ্মাণৰ কামত যুক্ত অনুচা প্ৰজেক্ট প্ৰাইভেট লিমিটেডৰ দুগৰাকী কৰ্মীক মাহুৰ আৰক্ষী থানাৰ অন্তৰ্গত নিয়ানগ্লো পুনগাঁৱৰ ৰেহিৰ কেম্পৰ পৰা শুকুৰবাৰ নিশা 9/10 মান বজাত 10/12 জনীয়া দুৰ্বৃত্তৰ দলে বন্দুকৰ ভাবুকি প্ৰদানেৰে অপহৰণ কৰি লৈ যায় ।
এই সন্দৰ্ভত অৱগত হোৱাৰ পাচতে আৰক্ষীয়ে নিৰ্মাণ সংস্থাৰ দুই কৰ্মীক উদ্ধাৰ কৰিবলৈ অভিযান আৰম্ভ কৰিছে যদিও এতিয়ালৈকে নিৰ্মাণ সংস্থাৰ কৰ্মী দুগৰাকীৰ কোনো সন্ধান ওলোৱা নাই বুলি জানিব পৰা গৈছে ।
বিতং খবৰৰ অপেক্ষাত...
