লখিমপুৰ, ১৩ আগষ্ট: নকল সোণৰ বিৰুদ্ধে ৰাজ্যজুৰি আৰক্ষীৰ কঠোৰ অভিযান চলি থকাৰ মাজতো এতিয়াও একাংশ অসাধু লোকে অব্যাহত ৰাখিছে এই সোণৰ সৰবৰাহৰ প্ৰচেষ্টা ৷ আৰক্ষীয়ে এনে বেপাৰীক গ্ৰেপ্তাৰৰ বাবে অভিযান চলোৱাৰ মাজতেই লখিমপুৰত পুনৰ নকল সোণৰ নাও জব্দ । আৰক্ষীয়ে এই ঘটনাৰে জড়িত থকাৰ অভিযোগত দুটা বেপাৰীক গ্ৰেপ্তাৰ কৰিবলৈ সক্ষম হয় ।
উল্লেখ্য় যে এদিন পূৰ্বে লখিমপুৰৰ বঙালমৰাত একাধিক নকল সোণৰ নাও উদ্ধাৰ কৰিছিল আৰক্ষীয়ে । ধনদাবীৰ গোচৰত অভিযুক্ত হৈ গ্ৰেপ্তাৰ হোৱা হাছিনা বেগমৰ স্বীকাৰোক্তিৰ ভিত্তিত তেওঁৰ ঘৰত অভিযান চলাই আৰক্ষীয়ে নকল সোণৰ নাও আৰু নগদ ধন উদ্ধাৰ কৰিছিল । মাথো এদিন পূৰ্বে এনেদৰে আৰক্ষীয়ে নকল সোণৰ নাও উদ্ধাৰ কৰাৰ পাছত যোৱা সোমবাৰে নিশাও আন এক অভিযানত আৰক্ষীয়ে নকল সোণৰ নাও উদ্ধাৰ কৰিবলৈ সক্ষম হয় ।
নকল সোণৰ নাও কেনেকৈ উদ্ধাৰ হ'ল ?
এইবাৰ নাওবৈচা আৰক্ষী চকীৰ অন্তৰ্গত উত্তৰ ম'হঘুলিত উদ্ধাৰ হৈছে নকল সোণৰ নাও । সোমবাৰে নিশা জিলাৰ অতিৰিক্ত আৰক্ষী অধীক্ষক লৱ কুমাৰ ডেকাৰ নেতৃত্বত আৰক্ষীৰ দলে উত্তৰ ম'হঘুলিত চলোৱা অভিযানত এখন নকল সোণৰ নাও উদ্ধাৰ হয় । এই ঘটনা সন্দৰ্ভত আৰক্ষীয়ে দুই অভিযুক্তক গ্ৰেপ্তাৰ কৰে । ধৃত বেপাৰী দুটা হৈছে- আব্দুল বাচাৰ আৰু ইমদাদুল ইছলাম । আৰক্ষীয়ে এই অভিযুক্ত দুটাৰ পৰা তিনিটা মোবাইল ফোনো জব্দ কৰে । সম্প্রতি অধিক তথ্যৰ বাবে আৰক্ষীয়ে আব্দুল বাচাৰ আৰু ইমদাদুল ইছলামক জেৰা চলাই আছে ।
উল্লেখ্য যে, নিতৌ আৰক্ষীয়ে জিলাখনৰ বিভিন্ন স্থানত বিশেষকৈ বঙালমৰাৰ ভিন্ন ঠাইত অভিযান চলাই নকল সোণ আদি উদ্ধাৰ কৰাৰ লগতে কেইবাটাও বেপাৰীক গ্ৰেপ্তাৰ কৰি জে’ললৈ প্ৰেৰণ কৰিছে ।
