গুৱাহাটী,২ জুলাই: কৃষি অৰ্থনীতিত কেৱল পুৰুষেই নহয় মহিলাসকলেও অৱদান আগবঢ়াব পাৰে । কৃষিকৰ্মৰ জৰিয়তে মহিলাসকলে স্বাৱলম্বী হ'ব পাৰে । ইয়াৰ বাবে মাথো প্ৰয়োজন দিকদৰ্শনৰ । এই দিকদৰ্শনৰ বাবে আগবাঢ়ি আহিছে এটা সংগঠন । এই সংগঠনটোৰ ছত্ৰছায়াতে অসম তথা মেঘালয়ৰ বহু মহিলা কৃষকে নিজৰ কৃষি উৎপাদনেৰে দেশ তথা বিদেশত সমাদৰ লাভ কৰিছে লগতে নিজকো স্বাৱলম্বী কৰি তুলিছে । এওঁলোক হৈছে এতিয়া কৃষি বিপ্লৱৰ অংশীদাৰ । এওলোকক পথ প্ৰদৰ্শন কৰিছে "মহাবাহু এগ্ৰ' ফাৰ্মাৰ্ছ কপাৰেটিভ ছ'চাইটি লিমিটেডে" ।
প্ৰায় এবছৰ পূৰ্বে ১০ গৰাকী উদ্যোগী মহিলাৰ প্ৰচেষ্টাত গঢ়ি উঠা অসম চৰকাৰৰ পঞ্জীয়নভুক্ত ৰাজ্যিক পৰ্যায়ৰ এই সমবায়খনে অসম তথা উত্তৰ পূৰ্বাঞ্চলত উৎপাদন হোৱা মচলা, মৌ-পালন, কেঁচুসাৰ, বেকাৰী খাদ্য সামগ্ৰী উৎপাদনেৰে অসম তথা উত্তৰ-পূৰ্বাঞ্চলৰ মহিলাসকলক স্বাৱলম্বী কৰাৰ প্ৰচেষ্টা হাতত লৈছে । সমবায়খনৰ সৈতে ইতিমধ্যে অসমৰ লগতে মেঘালয়ৰ বহু মহিলা কৃষক জড়িত হৈ পৰিছে । শেহতীয়াকৈ মেঘালয়ৰ লাকাডঙত ২০ গৰাকী মহিলা কৃষকে উৎপাদন কৰা হালধি কানাডালৈ ৰপ্তানি কৰিছে ।
এহাজাৰ কিলোগ্ৰাম হালধিৰ গুৰি কানাডালৈ ৰপ্তানি কৰে সমবায়খনে । এই সন্দৰ্ভত মহাবাহু এগ্ৰ' ফাৰ্মাৰ্ছ কপাৰেটিভ ছ'চাইটি লিমিটেডৰ অধ্যক্ষা ঈপ্সিতা বৰুৱাই কয়, "এবছৰ পূৰ্বে আৰম্ভ হোৱা মহাবাহু এগ্ৰ' ফাৰ্মাৰ্ছ ক'পাৰেটিভ ছ'চাইটি লিমিটেডৰ উদ্দেশ্য হৈছে মহিলাসকলক স্বাৱলম্বী কৰা । উত্তৰ পূৰ্বাঞ্চলত কৃষিক্ষেত্ৰত সম্ভাৱনা বহু বেছি । সেয়েহে উত্তৰ পূৰ্বাঞ্চলৰ মহিলা কৃষকসকলক উলিয়াই অনাৰ চেষ্টা চলোৱা হৈছে । আমাৰ প্ৰথম পদক্ষেপ হিচাপে পৰীক্ষামূলকভাৱে মেঘালয়ৰ লাকাডঙৰ এহেজাৰ কিলোগ্ৰাম হালধি কানাডালৈ ৰপ্তানি কৰা হৈছে । পৰৱৰ্তী সময়ত আৰু অধিক হালধি ৰপ্তানি কৰাৰ পৰিকল্পনা আছে ।"
তেওঁ লগতে কয় "আমি হালধিৰ উপৰিও কেঁচুসাৰ মৌ-পালন, বেকাৰীৰ জৰিয়তে মহিলাসকলক স্বাৱলম্বী কৰাৰ প্ৰচেষ্টা লৈছো ।" ইফালে মহাবাহু এগ্ৰ' ফাৰ্মাৰ্ছ কপাৰেটিভ ছ'চাইটি লিমিটেডৰ সঞ্চালিকা নাং লাকী গগৈয়ে কয়, "আমি ক্ষুদ্ৰ পৰ্যায়ৰ পৰা চেষ্টা আৰম্ভ কৰিছো । আমি যিদৰে দহগৰাকী মহিলাই আন দহগৰাকী মহিলাক আগুৱাই নিবলৈ চেষ্টা কৰিছো অনাগত সময়ত তেওঁলোকে আন দহগৰাকী মহিলাক আগুৱাই নিবলৈ সক্ষম হ'ব । ইয়াতকৈ ডাঙৰ সফলতা আমাৰ বাবে আৰু একো হ'ব নোৱাৰে । আমি সীমাহীন মহিলা আমাৰ সৈতে জড়িত হোৱাতো বিচাৰো । "
