জোনাই : অৱশেষত গ্ৰেপ্তাৰ হ'ল দিনজানকাণ্ডৰ মূল অভিযুক্ত । বুধবাৰে পুৱাই জোনাই থানাত আত্মসমৰ্পণ কৰে অভিযুক্ত অমৃশ মিপুনে । ইতিমধ্যে তিনিচুকীয়ালৈ অনা হৈছে অভিযুক্ত মিপুনক । ইফালে গ্ৰেপ্তাৰৰ পিছতে ভয়ংকৰ স্বীকাৰোক্তি অমৃত মিপুনৰ । আৰক্ষীক অৱগত কৰা মতে ব্যক্তিগত সংঘাতৰ বাবেই মিপুনে নাৱত উঠিবলৈ দিয়া নাছিল মনোজ প্ৰায়াক ।
ঘটনাটো কি আছিল ?
উল্লেখ্য যে তিনিচুকীয়াৰ দিনজান ঘাটত দেওবাৰে সংঘটিত হৈছিল নাও দুৰ্ঘটনা । দুৰ্ঘটনাত পতিত কেইগৰাকীমান লোকৰ প্ৰাণৰক্ষা কৰিছিল মনোজ প্ৰায়াই । কিন্তু আনৰ জীৱন ৰক্ষা কৰা মনোজ প্ৰায়াক নাৱত উঠিবলৈ দিয়া নাছিল অমৃশ মিপুনে । নাৱত উঠিবলৈ চেষ্টা কৰাৰ সময়তে গোৰ মাৰি পুনৰ পানীত পেলাই দিছিল মনোজক । এই সমগ্ৰ দৃশ্য প্ৰত্যক্ষদৰ্শীৰ মোবাইলৰ কেমেৰাত বন্দী হৈছিল । ফলস্বৰূপে সমগ্ৰ ঘটনা পোহৰলৈ আহিছিল । লক্ষণীয়ভাৱে দেওবাৰৰ পৰা সন্ধানহীন হৈ আছে মনোজ প্ৰায়া । ৩ দিন অতিক্ৰম কৰিলে যদিও আৰক্ষী তথা এছ ডি আৰ এফে এতিয়ালৈ মনোজক উদ্ধাৰ কৰিব পৰা নাই । অৱশ্যে পানীত ডুবি মনোজৰ মৃত্যু হোৱাৰ সন্দেহ কৰিছে বিভিন্নজনে ।
অভিযুক্তৰ আত্মসমৰ্পণ
ইফালে ঘটনাটোৰ ভিডিঅ' প্ৰচাৰ হোৱাৰ পিছতে আৰক্ষী তৎপৰ হয় আৰু সোমবাৰে আবেলি পৰিয়ালৰ এজাহাৰৰ ভিত্তিত তিনিচুকীয়া সদৰ থানাত এটা গোচৰ ৰুজু কৰা হয় । ঘটনাত জড়িত থকাৰ অপৰাধত আৰক্ষীয়ে অমৃশ মিপুনৰ বিৰুদ্ধে গোচৰ ৰুজু কৰি তদন্ত অব্যাহত ৰাখিছে । অৱশ্যে বুধবাৰে পুৱা অমৃশ মিপুনে জোনাই আৰক্ষী থানাত আত্মসমৰ্পণ কৰে ।
