গোৱালপাৰা, 19 জুন: “বিৰোধীক বাধা দিবলৈ স্পীড ব্ৰেকাৰ নহয় বেৰিকেড দিব লাগিব"- এই মন্তব্য নৱ-নিৰ্বাচিত সাংসদ বিজুলী কলিতা মেধিৰ ৷ 5 নং গুৱাহাটী লোকসভা সমষ্টিৰ পৰা বিপুল ভোটত বিজয় সাব্যস্ত কৰা নৱ-নিযুক্ত সাংসদ বিজুলী কলিতা মেধিয়ে সাংসদ হিচাবে মঙলবাৰে প্ৰথমবাৰৰ বাবে দুধনৈত উপস্থিত হৈ বিৰোধী সন্দৰ্ভত এই মন্তব্য আগবঢ়ায় ৷
সাংসদ হৈ প্ৰথমবাৰৰ বাবে দুধনৈত উপস্থিত হোৱা বিজুলী কলিতা মেধিক গোৱালপাৰা জিলা বিজেপিৰ উদ্যোগত মঙলবাৰে দুধনৈ জনমন্দিৰ সাংস্কৃতিক ভৱন প্ৰাংগণত বিশেষভাবে সম্বৰ্দ্ধনা জনোৱা হয় ৷ গোৱালপাৰা বিজেপিৰ লগতে অন্যান্য দল সংগঠনে আৰু বিজেপিৰ জিলা তথা মণ্ডল ব্লক পৰ্যায়ৰ কৰ্মকৰ্তাসকলেও সম্বৰ্দ্ধনা জনাই সাংসদগৰাকীক ৷
সম্বৰ্দ্ধনা অনুষ্ঠানত অংশগ্ৰহণ কৰি ভাষণ প্ৰসংগত সাংসদগৰাকীয়ে কয়, "বিগত নিৰ্বাচনৰ সময়ছোৱাত দুধনৈ সমষ্টি আৰু গোৱালপাৰা পশ্চিম সমষ্টিৰ ৰাইজ আৰু দলীয় কৰ্মকৰ্তাই যথেষ্ট সহায়-সহযোগিতা আগবঢ়াইছে আৰু যাৰ বাবে সমষ্টিটোত বিপুলসংখ্যক ভোট লাভ কৰি জয়লাভ কৰিবলৈ সক্ষম হৈছে ৷ ৰাইজৰ মৰমৰ বাবেই মই সংসদৰ মজিয়াত প্ৰতিনিধিত্ব কৰিবলৈ সুযোগ লাভ কৰিছো ৷ মই পৰৱৰ্তী সময়ত ৰাইজৰ লগত একেলগ হৈ দুয়োটা সমষ্টিৰ সমস্যাসমূহ সমাধানৰ বাবে কাম কৰিম ৷"
সাংসদগৰাকীয়ে পুনৰ কয়, "সন্মুখত পঞ্চায়ত আৰু বিধানসভা নিৰ্বাচন আহি আছে ৷ বিৰোধীয়ে যাতে কোনোপধ্যে এই সমষ্টিত প্ৰৱেশ কৰিব নোৱাৰে তাৰ বাবে ৰাইজ সজাগ হৈ থাকিব লাগিব ৷ আগন্তক বিধানসভা নিৰ্বাচনত অসমৰ প্ৰতিটো সমষ্টি বিজেপি মিত্ৰজোঁটৰ দখললৈ আনিবলৈ আৰু বিৰোধীক ৰুধিবলৈ আমি এতিয়াৰে পৰাই কাম কৰি যাব লাগিব ।"
লগতে পঢ়ক: উমানন্দত সেৱা ল’লে গুৱাহাটীৰ সাংসদ বিজুলী কলিতা মেধিয়ে - BIJULI KALITA MEDHI
