নিউজ ডেস্ক, ১২ ছেপ্টেম্বৰ : ৯ দিন ‘লুকাই থকা’(অভিযুক্তৰ মতে)ৰ পিছত বৃহস্পতিবাৰে ডিব্ৰুগড় সদৰ থানাত লক্আপ্ হ’ল চুমী-তাৰ্কিক বৰা ৷ অতদিনে আৰক্ষীয়ে দুই ভি আই পি অভিযুক্তক বিচাৰি উলিয়াব নোৱৰা ঘটনাই ৰাজ্যজুৰি ৰহস্যৰ সৃষ্টি কৰিছিল ৷ বহুতেই এতিয়া ক’ব বিচাৰিছে এইখন এখন স্ক্ৰীপ্টেড ড্ৰামা ৷
তাৰ মাজতে বৃহস্পতিবাৰে সন্ধিয়া ভাইৰেল হৈ পৰিল দুখন ফটো ৷ যি দুখন ফটো চুমী বৰা আৰু তাৰ্কিক বৰা লক্ আপ্ হৈ থকা অৱস্থাৰ ৷ যিটো সম্পূৰ্ণ বে-আইনী ৷ কোনো কাৰণতে অভিযুক্ত লক্ আপ হৈ থকা অৱস্থাত ফটো বা ভিডিঅ’ সংগ্ৰহ কৰিব নোৱাৰে, ই সৰ্বজনবিদিত ৷ যুক্তিৰ খাতিৰত যদি ধৰি লোৱা হয় যে আৰক্ষীয়ে তদন্তৰ স্বাৰ্থত লক্ আপত থকা অভিযুক্তৰ ফটো বা ভিডিঅ’ সংগ্ৰহ কৰেও, তথাপি ইয়াক ৰাজহুৱা কৰিব নোৱাৰে ৷ গতিকে বৃহস্পতিবাৰে সন্ধিয়া ভাইৰেল হোৱা ফটো দুখনক কেন্দ্ৰ কৰি আৰক্ষীৰ ভুমিকাক লৈও পুনৰ সৃষ্টি হৈছে আন এক ৰহস্যৰ ৷ কিয়নো আৰক্ষীৰ সহযোগিতা অবিহনে এই ফটো সংগ্ৰহ অসম্ভৱ ৷
তাতোকৈ ৰহস্যজনক কথাটো হ’ল যে চুমী বৰা আৰু তাৰ্কিক বৰাক যি দুটা কোঠাত লক্ আপ্ কৰা ফটোত দেখা গৈছে, সেই লক্ আপৰ দুৱাৰত নাই কোনো তলা অথবা তেনে ব্যৱস্থা ৷ তদুপৰি ফটোত দেখা অনুসৰি চুমী বৰাই পৰিধান কৰি আছে ছেণ্ডেল ৷ উল্লেখ্য যে লক্ আপ কৰাৰ পূৰ্বে অভিযুক্তৰ বহু বস্তু বাহিৰত ৰাখি থোৱা হয়, তাৰ ভিতৰত জোতা-ছেণ্ডেলো অন্যতম ৷ এনেবোৰ বিষয়ে বহু প্ৰশ্নৰ উদয় কৰিছে ৷ সেয়া যিয়েই নহওক, লক্ আপৰ ফটো ভাইৰেল হোৱাক লৈ আচৰিত হৈছে ভিন্নজন ৷
এই সন্দৰ্ভত ই টিভি ভাৰতে কথা পাতিছিল গুৱাহাটী উচ্চ ন্যায়ালয়ৰ এগৰাকী জ্যেষ্ঠ অধিবক্তাৰ সৈতে ৷ জ্যেষ্ঠ অধিবক্তাগৰাকীয়ে ই টিভি ভাৰতক কয়, ‘‘থানাৰ ভিতৰত ফটো ল’ব পাৰে বিশেষ কাৰণত, কিন্তু লক্আপত থাকিলে এনেদেৰে ফটো ল’ব নালাগে ৷ ই আইনবিৰুদ্ধ ৷ লক্ আপত থকা লোকজনৰ ব্যক্তি স্বাধীনতা আছে ৷ যিহেতু এতিয়ালৈকে তেওঁ দোষী সাব্যস্ত হোৱা নাই, অভিযুক্তহে তেওঁ ৷ সেয়ে লক্ আপত থকা অৱস্থাত ফটো ল’ব নোৱাৰে ৷ ই এক অপমানৰ কথা হৈ পৰে ৷ তেওঁ অপৰাধী হিচাবে প্ৰমাণিত হ’বও পাৰে, নহ’বও পাৰে ৷ সেয়া তদন্তৰ পিছতহে হ’ব ৷’’
বৃহস্পতিবাৰে খৰধৰকৈ ডিব্ৰুগড় সদৰ থানাৰ মহিলা লক্ আপৰ কোঠা চাফ-চিকুণ কৰি চুমী বৰাক ৰখা হ’ল ৷ আন এটা কোঠাত ৰখা হ’ল তাৰ্কিক বৰাক ৷ তাৰ কিছু সময়ৰ পিছতে ভাইৰেল হৈ পৰিল ফটো দুখন ৷ দুই ভি আই পি অভিযুক্তক লক্ আপ কৰিবলৈ আৰক্ষী সক্ষম হোৱাৰ প্ৰমাণ হিচাবেই ফটো দুখন ৰাজহুৱা কৰা হ’ল নেকি, তাক লৈও প্ৰশ্নৰ উদয় হৈছে ৷
লগতে পঢ়ক : চুমী-তাৰ্কিকক ৫ দিনৰ আৰক্ষীৰ জিম্মালৈ প্ৰেৰণ
ভুৱা বাতৰিৰ বিৰুদ্ধে আৰক্ষীৰ কাষ চাপিব ফটোগ্ৰাফাৰ ৰিংকু ৰঞ্জন শইকীয়া
