গুৱাহাটী, ২৭ মাৰ্চ: ভাৰত চৰকাৰৰ বিজ্ঞান আৰু প্ৰযুক্তি বিভাগৰ অধীনস্থ নৰ্থ ইষ্ট চেণ্টাৰ ফ'ৰ টেকন'লজী এপ্লিকেচন এণ্ড ৰিছ চমুকৈ এনইচিটিএআৰে আজিৰে পৰা দুদিনীয়া কাৰ্যসূচীৰে মহানগৰীৰ শ্ৰীমন্ত শংকৰদেৱ কলক্ষেত্ৰ প্ৰাংগণত আৰম্ভ কৰিছে নৰ্থ ইষ্ট ষ্টাৰ্ট আপ এণ্ড এণ্টাৰপ্ৰেনিয়ৰছ কনক্লেভ ২০২৪ । উত্তৰ-পূব ভাৰতত উদ্ভাৱন আৰু ঔদ্যোগিক বিকাশেই হৈছে কনক্লেভৰ মূল লক্ষ্য ।
আনহাতে, উত্তৰ-পূৰ্বাঞ্চলৰ ষ্টাৰ্টআপ পৰিস্থিতিতন্ত্ৰৰ প্ৰদৰ্শনৰ লগতে বিনিয়োগকৰী, উদ্ভাৱক, সংযোগকাৰী আৰু অংশীদাৰসকলক একত্ৰিত কৰিব বুলি আজি এনইচিটিএআৰৰ সঞ্চালক প্ৰধান ড৹ অৰুণ কুমাৰ শৰ্মাই এই বিষয়ে উল্লেখ কৰে । ভাৰত চৰকাৰৰ প্ৰযুক্তি-বিজ্ঞান বিভাগৰ সচিব অধ্যাপক অভয় কাৰান্দিকাৰে ভাৰ্চুৱেলি এই সন্মিলন উদ্বোধন কৰে । এই অনুষ্ঠানটোৱে বিদ্যালয় আৰু বিশ্ববিদ্যালয়ৰ শিক্ষাৰ্থী, উদ্যোগী, বিনিয়োগকাৰী, উদ্যোগৰ পেছাদাৰী আৰু ব্যৱসায়ীৰ লগতে বিভিন্ন ক্ষেত্ৰৰ দৰ্শকক আকৰ্ষিত কৰিব ।
তেওঁ পুনৰ কয় যে এই সন্মিলনৰ প্ৰধান লক্ষ্য হৈছে যুৱ শক্তিক গঠনমূলক উদ্ভাৱনৰ পথ প্ৰদৰ্শন কৰা আৰু আঞ্চলিক প্ৰত্যাহ্বানৰ মোকাবিলা কৰি অঞ্চলটোৰ অৰ্থনৈতিক বিকাশত সহায় কৰা । এই সন্মিলনখনে বিজ্ঞানী, প্ৰযুক্তিবিদ, শিক্ষাবিদ, উদ্যোগী, কৃষক, শিল্পী আৰু শিক্ষাৰ্থীসকলক একত্ৰিত কৰি উত্তৰ-পূব অঞ্চলৰ আৰ্থ-সামাজিক বিকাশৰ বাবে বিভিন্ন দিশত আলোচনাৰ এক মঞ্চ প্ৰদান কৰিব ।
এই অনুষ্ঠানটোত উত্তৰ-পূব অঞ্চলত প্ৰযুক্তি বিস্তাৰৰ দৰে বিষয় আৰু বিষয়ৰ ওপৰত একাধিক কাৰিকৰী অধিৱেশন প্ৰদৰ্শন কৰা হৈছে । বিশেষকৈ উত্তৰ-পূৱত কৃষি, উদ্যানশস্য, খাদ্য প্ৰক্ৰিয়াকৰণ আৰু বাঁহ খণ্ডত জীৱিকা সৃষ্টিৰ বাবে উদ্ভাৱন, বানপানী আৰু খহনীয়াৰ প্ৰতিৰোধ, ভূ-স্থানিক প্ৰযুক্তিৰ প্ৰয়োগ,তথ্য আৰু যোগাযোগ প্ৰযুক্তিৰ বিকাশত গুৰুত্ব আৰোপ কৰা হৈছে । প্ৰযুক্তি এক্সপ'ত প্ৰায় পঁচিশটা প্ৰযুক্তি প্ৰতিষ্ঠান, কেন্দ্ৰীয় আৰু ৰাজ্য চৰকাৰৰ গৱেষণা আৰু গৱেষণা পৰীক্ষাগাৰ, বেচৰকাৰী সংগঠন, কোম্পানী, সমবায় আৰু কৃষক-উৎপাদক সংগঠনকে ধৰি ৬০ টাতকৈও অধিক প্ৰযুক্তি প্ৰদানকাৰী, উদ্ভাৱক, উদ্যোগী আৰু ষ্টাৰ্টআপে অংশগ্ৰহণ কৰে । উত্তৰ-পূৱ ভাৰতৰ মহাবিদ্যালয় আৰু বিশ্ববিদ্যালয়সমূহৰ শিক্ষাৰ্থীসকলক মাজত কুইজ আৰু তৰ্ক প্ৰতিযোগিতাও অনুষ্ঠিত হ'ব ।
