দলবদ্ধ ধৰ্ষণ নহয়: বলপূৰ্বক নগ্ন ভিডিঅ’ প্ৰস্তুত কৰি আমোদ লৈছিল পাঁচ পাষণ্ডই - Brutal Incident In Bongaigaon

Bongaigaon SP Press meet : বঙাইগাঁৱৰ প্ৰেমিক-প্ৰেমিকাৰূপী কিশোৰ-কিশোৰীৰ ওপৰত চলা অমানৱীয় কৰ্মকাণ্ডই জোকাৰিছে সমগ্ৰ ৰাজ্য ৷ বঙাইগাঁও আৰক্ষীয়ে ইতিমধ্যে অভিযুক্তক আটক কৰি ক্ষীপ্ৰ গতিত আৰম্ভ কৰিছে তদন্ত ৷ প্ৰাথমিক তদন্তৰ অন্তত জিলা আৰক্ষী অধীক্ষকে কিশোৰীগৰাকীৰ সৈতে দলবদ্ধ ধৰ্ষণ নোহোৱা কথাটোক নিশ্চিত কৰে ৷

বঙাইগাঁও, 20 মে’: বঙাইগাঁৱৰ চাঞ্চল্যকৰ দলবদ্ধ ধৰ্ষণ কাণ্ড সন্দৰ্ভত জিলা আৰক্ষী অধীক্ষকৰ সংবাদমেল সম্বোধন ৷ বিগত শনিবাৰে জিলাখনৰ পঞ্চপুৰ এলেকাত 5 জন আসুৰিক প্ৰবৃত্তিৰ লোকে এহাল কিশোৰ-কিশোৰীৰ ওপৰত অমানুষিক অত্যাচাৰ চলোৱাৰ লগতে কিশোৰীগৰাকীক দলবদ্ধ ধৰ্ষণ কৰাৰ ঘটনাই কঁপাই গৈছে সমগ্ৰ ৰাজ্য ৷ এই পৈশাচিক কাণ্ডৰ পিছতে তৎপৰ হৈ পৰে বঙাইগাঁও আৰক্ষী ৷ আৰক্ষীয়ে ইতিমধ্যে অভিযুক্তক আটক কৰি তদন্ত আৰম্ভ কৰিছে ৷

জিলাখনৰ বৰঝৰাৰ জলপ্ৰপাতৰ সমীপত কিশোৰ-কিশোৰী প্ৰেমিক যুগলৰ ওপৰত চলা অমানৱীয় শাৰিৰীক নিৰ্যাতন তথা ধন দাবীৰ সন্দৰ্ভত জিলা আৰক্ষী অধীক্ষক মোহনলাল মীনাই সোমবাৰে সংবাদমেলখন সম্বোধন কৰে ৷ ঘটনা সন্দৰ্ভত আৰক্ষী অধীক্ষকগৰাকীয়ে প্ৰকাশ কৰা অনুসৰি, কিশোৰ-কিশোৰীক যৌন কাৰ্যত লিপ্ত হ’বলৈ দি নগ্ন ভিডিঅ’ প্ৰস্তুত কৰি তাক ছ’চিয়েল মিডিয়াত ভাইৰেল কৰিছিল অভিযুক্তসকলে ৷ আৰক্ষীয়ে এই ভিডিঅ’ সংবাদ মাধ্যমৰ পৰা লাভ কৰাৰ পিছতে ঘটনাৰ ক্ষীপ্ৰ তদন্ত আগবঢ়ায় ৷

লগতে পঢ়ক: ফুৰিবলৈ যোৱা কিশোৰীক দলৱদ্ধ ধৰ্ষণ; পাঁচ দুৰ্বৃত্তৰ নিকৃষ্টকাণ্ডই জোঁকাৰিছে অসম - Brutal Incident In Bongaigaon

পিছে বহু সময়লৈকে আৰক্ষীয়ে নিৰ্যাতিতৰ সন্ধান লাভ কৰা নাছিল ৷ পৰৱৰ্তী সময়ত আৰক্ষীয়ে এক সূত্ৰৰ ভিত্তিত নিৰ্যাতিতৰ সন্ধান লাভ কৰি সোধ-পোছৰ বাবে তেওঁলোকৰ ওচৰত উপস্থিত হয় ৷

ভূক্তভোগী প্ৰেমিক-প্ৰেমিকাই আৰক্ষীৰ আগত দিয়া স্বীকাৰোক্তি অনুসৰি, পাঁচ পাষণ্ডই তেওঁলোকক দাবী কৰিছিল নগদ 5 হাজাৰ টকা ৷ পিছে কিশোৰগৰাকীয়ে তেওঁলোকৰ হাতত তুলি দিয়ে 4,500 টকা ৷ ইয়াৰ বিপৰীতে কিশোৰীগৰাকীয়ে কিশোৰজনৰ সৈতে নগ্ন হৈ যৌনকাৰ্য কৰিবলৈ দাবী ধমকি দিয়া বুলি আৰক্ষীৰ আগত প্ৰকাশ কৰে ৷ এই কাৰ্যৰ ভিডিঅ’ প্ৰস্তুত কৰি পৰৱৰ্তী সময়ত তাক ভাইৰেল কৰে পাষণ্ডৰ দলটোৱে ৷

লগতে পঢ়ক: কি কাৰণে সংঘটিত হৈছিল বঙাইগাঁও দলৱদ্ধ ধৰ্ষণকাণ্ড, পোহৰলৈ আহিছে সকলো কথা - Bongaigaon Gang Rape

উল্লেখ্য যে, আৰক্ষীয়ে আটক কৰা অভিযুক্তসকল ক্ৰমে বিৰাজ ৰাভা, শোণিত ৰাভা, শিবু সৰকাৰ, জীৰেণ সৰকাৰ আৰু ডালিম বৰ্মন বুলি জানিব পৰা গৈছে ৷ আৰক্ষীয়ে ঘটনা সন্দৰ্ভত এতিমধ্যে ৰুজু কৰিছে গোচৰ ৷ এই গোচৰ ভাৰতীয় দণ্ডবিধি আইনৰ অধীনৰ 120 B, 342, 354, 354 B, 354 C, 387 নং ধাৰাত 182/2024 নম্বৰত বঙাইগাঁও থানাত ৰুজু হৈছে ৷ আনহাতে, পৃথকে POCSO আইনৰ অধীনত 8 আৰু 12 নং ধাৰাত 67 আৰু 66 E ৰ লগতে IT আইনৰ অধীনত 67 A ৰুজু কৰা হৈছে গোচৰ ৷

সোমবাৰে আদালতত অভিযুক্তসকলক হাজিৰ কৰোৱাৰ পিছত আৰক্ষীয়ে অভিযুক্তসকলক নিজ জিম্মাত বিচাৰিব বুলিও সংবাদমেলত জিলা আৰক্ষী অধীক্ষক মোহনলাল মীনাই প্ৰকাশ কৰে ৷ নিৰ্যাতিতা কিশোৰীগৰাকীৰ স্বাস্থ্যৰ অৱস্থা সুস্থিৰ বুলি সংবাদমেলতে ঘোষণা কৰে আৰক্ষী অধীক্ষকগৰাকীয়ে ৷

লগতে পঢ়ক: কাৰাগাৰৰ ভিতৰত দলবদ্ধ ধৰ্ষণৰ বলি ২১ বছৰীয়া কয়দী ! গৰ্ভপাতৰ বাবে আবেদন - Prisoner Gang Rape