সৌৰ শক্তিৰে জিলিকি থাকিব ড৹ ভূপেন হাজৰিকা সেতু: প্ৰকল্প উদ্বোধন মুখ্যমন্ত্ৰীৰ - Indias second longest Bridge

Dr Bhupen Hazarika Setu: এতিয়াৰে পৰা সূৰ্যৰ আলোকেৰে আলোকিত হ’ব ভাৰতৰ দ্বিতীয় দীৰ্ঘতম দলং ড৹ ভূপেন হাজৰিকা সেতু ৷ মুখ্যমন্ত্ৰীয়ে উদ্বোধন কৰিলে ধলা-শদিয়া দলঙৰ সৌৰশক্তি প্ৰকল্প ৷

তিনিচুকীয়া, ৫ ছেপ্টেম্বৰ: তিনিচুকীয়া জিলাৰ ধলা-শদিয়া সংযোগী ড৹ ভূপেন হাজৰিকা সেতুৰ সৌৰশক্তিচালিত আলোকীকৰণ প্ৰকল্পৰ বৃহস্পতিবাৰে সন্ধিয়া শুভ উদ্বোধন কৰে মুখ্যমন্ত্ৰী ড৹ হিমন্ত বিশ্ব শৰ্মাই ৷ প্ৰকল্প উদ্বোধন কৰি মুখ্যমন্ত্ৰীয়ে কয়, ‘‘এই প্ৰকল্পৰ জৰিয়তে বিদ্যুৎ বিভাগ যথেষ্ট লাভান্বিত হ’ব । যিহেতু এই লাইন বিদ্যুৎ বিভাগৰ পৰা পৰিচালিত নহয়, ইয়াত আমি নিজেই বিদ্যুৎ উৎপন্ন কৰিম আৰু এই বিদ্যুৎ দিনৰ ভাগত বিদ্যুৎ বিভাগে কিনি ল’ব ।’’

আজিৰ এই অনুষ্ঠানত মুখ্যমন্ত্ৰীগৰাকীক সংগ দিয়ে শদিয়াৰ বিধায়ক বলীন চেতিয়া, ডুমডুমাৰ বিধায়ক ৰূপেশ গোৱালা, প্ৰাক্তন সাংসদ তপন কুমাৰ গগৈ, মাৰ্ঘেৰিটাৰ বিধায়ক ভাস্কৰ শৰ্মা আৰু ডিগবৈৰ বিধায়ক সুৰেন ফুকনে । ইয়াৰোপৰি সাংসদ প্ৰদান বৰুৱা, মন্ত্ৰী সঞ্জয় কিষাণ, প্ৰাক্তন কেন্দ্ৰীয় মন্ত্ৰী ৰামেশ্বৰ তেলীৰ লগতে যথেষ্ট সংখ্যক ৰাইজো উপস্থিত থাকে ।

𝐋𝐢𝐠𝐡𝐭𝐢𝐧𝐠 𝐨𝐧 𝐁𝐡𝐚𝐫𝐚𝐭’𝐬 𝐬𝐞𝐜𝐨𝐧𝐝 𝐥𝐨𝐧𝐠𝐞𝐬𝐭 𝐛𝐫𝐢𝐝𝐠𝐞 𝐢𝐬 𝐧𝐨𝐰 𝐩𝐨𝐰𝐞𝐫𝐞𝐝 𝐛𝐲 𝐒𝐨𝐥𝐚𝐫 🌞
𝐋𝐨𝐨𝐤𝐬 𝐭𝐞𝐫𝐫𝐢𝐟𝐢𝐜 𝐫𝐢𝐠𝐡𝐭 ?

📍Dr Bhupen Hazarika Setu pic.twitter.com/KS7kjXdpyQ

— Himanta Biswa Sarma (@himantabiswa) September 5, 2024

উল্লেখ্য যে মহাবাহু ব্ৰহ্মপুত্ৰৰ ওপৰত নিৰ্মিত ধলা-শদিয়া দলং, যাক ‘‘ড৹ ভূপেন হাজৰিকা সেতু’’ নামেৰে নামকৰণ কৰা হৈছে ৷ সেই দলংখন নিৰ্মাণ হৈছিল Ministry of Road Transport and Highway, Central Govt of India (কেন্দ্ৰীয় চৰকাৰৰ পথ পৰিবহন মন্ত্ৰণালয়)ৰ উদ্যোগত আৰু দলংখনৰ শুভ উদ্বোধন কৰিছিল প্ৰধানমন্ত্ৰী নৰেন্দ্ৰ মোদীয়ে ২০১৭ চনৰ ২৬ মে’ত ৷

দলংখনৰ আলোকীকৰণ প্ৰকল্প এটাৰ কাম ইতিমধ্যে সম্পূৰ্ণ হৈছে ৷ দলংখনৰ আলোকীকৰণৰ কাৰণে কেন্দ্ৰীয় চৰকাৰৰ পথ পৰিবহন মন্ত্ৰণালয়ৰ উদ্যোগত আৰু অসম লোকনিৰ্মাণ (ঘাইপথ) বিভাগৰ দ্বাৰা এটি সৌৰশক্তি উৎপাদনৰ কেন্দ্ৰ স্থাপন কৰা হৈছে ৷ প্ৰকল্পৰ অনুমোদিত মূল্য ৫৫.৮৪ কোটি টকা আৰু নিবিদা মূল্য ৫২.৬০ কোটি টকা ৷

115 নং ৰাষ্ট্ৰীয় ঘাইপথৰ ওপৰত সম্পন্ন হোৱা এই প্ৰকল্পৰ দৈৰ্ঘ্য ১০.১৫০ কিল’মিটাৰ ৷ তাৰে দলঙৰ ৯.১৫০ কিল’মিটাৰ আৰু দুয়োফালে আধা কিলোমিটাৰকৈ সংযোগী পথত আলোকীকৰণ কৰা হৈছে ৷ আজি এই আলোকীকৰণ প্ৰকল্পৰ শুভ উদ্বোধন কৰে মুখ্যমন্ত্ৰী হিমন্ত বিশ্ব শৰ্মাই । আজিৰে পৰা ইয়াৰ জৰিয়তে সমগ্ৰ নিশা দলংখন আলোকিত হ’ব আৰু এই দলঙেৰে পাৰ হোৱা প্ৰতিগৰাকী ব্যক্তিয়ে অনুভৱ কৰা অভাৱ এটা পূৰণ হ’ব বুলি মুখ্যমন্ত্ৰীয়ে আশা প্ৰকাশ কৰে ৷

লগতে পঢ়ক: শিক্ষকতাক চাকৰি হিচাপে নলৈ সেৱা হিচাপে গ্ৰহণ কৰিব লাগে : মুখ্যমন্ত্ৰী - Teachers day 2024