চিৰাং, ২৮ জুন : চিৰাঙৰ নিজলাগুৰিত জলসিঞ্চন বিভাগৰ শ্লুইচ গেটৰ কাম কৰিবলৈ ওলাই আহিল ২৫ খন গাঁৱৰ ৰাইজ । চৰকাৰৰ আশা বাদ দি এইদৰে ৰাইজে হাতে-কামে লাগিল শ্লুইচ গেট মেৰামতিৰ কামত ।
উল্লেখ্য, চিৰাং জিলা গঠনৰ পূৰ্বে অৰ্থাৎ ১৯৮০ চনতে বঙাইগাঁও সংমণ্ডল জনসিঞ্চন বিভাগে নিৰ্মাণ কৰা নিজলাগুৰিৰ এইখন শ্লুইচ গেটৰ দায়িত্ব এতিয়া বঙাইগাঁও বা চিৰাং কোনো জিলাই নলয় বুলি জনায় স্থানীয় কৃষকে । আনহাতে, ইয়াৰ চোৱা-চিতাৰ বাবে পূৰ্বতে চকীদাৰ আছিল যদিও তেওঁৰ অৱসৰৰ পিচত এতিয়া শ্লুইচ গেটটো চোৱা-চিতা কৰাৰ বাবে কোনো লোক নিযুক্তি দিয়া নাই । যাৰ বাবে প্ৰতিজন কৃষকে ১০০-২০০ টকাকৈ দিয়াৰ লগতে বিঘাই প্ৰতি ৬০ টকাকৈ উঠাই কৃষকসকলে নিজেই চকীদাৰ নিয়োগ কৰে ।
ইয়াৰ উপৰি এই বান্ধ বছৰত কেইবাবাৰো এইসকল কৃষকেই মেৰামতিও কৰিব লাগে । কিন্তু বিটিচি চৰকাৰে এই ক্ষেত্ৰত কোনো দায়িত্ব লোৱা নাই বুলি অভিযোগ কৰে স্থানীয় ৰাইজে । উল্লেখ্য যে আই নৈ সংলগ্ন এই শ্লুইচ গেটখনত ৰাইজে দিয়া বান্ধ নৈৰ পানী বৃদ্ধি পোৱাৰ লগে লগে ভাঙি যায় । সেয়াও পুনৰ ৰাইজে নিজৰ গাঁঠিৰ ধনৰ লগতে শ্ৰমদান কৰি ঠিক কৰিবলগীয়া হয় ।
এনেদৰেই ২৫ খন গাঁৱৰ ৩-৪ হেজাৰ লোক বিগত প্ৰায় ২০ বছৰৰ পৰা চলি আহিছে । অৱশ্যে বিগত ২০১৬-১৭ বৰ্ষত বিপিএফ নেতৃত্বাধীন বিটিচি প্ৰশাসনে শ্লুইচ গেট মেৰামতি তথা পৰিসৰ বৃদ্ধিৰ বাবে পুঁজি মঞ্জুৰি দিছিল যদিও সেয়াও বিগত ৮ বছৰে অৰ্ধনিৰ্মিত হৈ থাকিল । সেয়ে ভুক্তভোগী ২৫ খন গাঁৱৰ ৰাইজে বিষয়টো বিটিচি প্ৰশাসন তথা অসম চৰকাৰৰ দৃষ্টিগোচৰ কৰি কৃষক ৰাইজৰ সহায়ক হ'ব পৰাকৈ শ্লুইচ গেটখনৰ মেৰামতিৰ দাবী জনাইছে ।
