তেজপুৰ: "ভাৰতীয় শিক্ষিত শ্ৰেণী আৰু বিশেষকৈ আমাৰ অভিজাত শ্ৰেণীটো ভাৰতীয় সংস্কৃতিৰ পৰা বিচ্ছিন্ন । ই কেনেবাকৈ ঔপনিৱেশিকতাবাদ আৰু ইউৰোপৰ দ্বাৰা সন্মোহিত হৈ শিপাৰ পৰা বিচ্ছিন্ন হৈ পৰে ।" এই মন্তব্য সাহিত্য অকাডেমি অনুবাদ বঁটা বিজয়ী তথা ডিব্ৰুগড় বিশ্ববিদ্যালয়ৰ অনুশীলনৰ অধ্যাপক দিগন্ত বিশ্ব শৰ্মাৰ । শুকুৰবাৰে তেজপুৰ বিশ্ববিদ্যালয়ৰ ব্যৱসায় প্ৰশাসন বিভাগৰ উদ্যোগত আয়োজিত মাধৱ চন্দ্ৰ বৰা (এম চি বি) সোঁৱৰণী বক্তৃতা প্ৰদান কৰি শৰ্মাই এনেদৰে কয় ।
উল্লেখ্য যে অধ্যাপক মাধৱ চন্দ্ৰ বৰা তেজপুৰ বিশ্ববিদ্যালয়ৰ স্কুল অৱ মেনেজমেণ্ট ছায়েন্সৰ প্ৰথম ডীন আছিল । বিগত ২০০৫ চনৰ পৰা এই দিনটোত তেওঁৰ সোঁৱৰণীত বিশিষ্ট ব্যক্তিৰ দ্বাৰা বক্তৃতা প্ৰদান বিশেষকৈ সমসাময়িক প্ৰাসংগিক বিষয় এটাৰ ওপৰত আলোচনা কৰিবলৈ আমন্ত্ৰণ জনোৱা হয় ।
এম চি বিৰ সোঁৱৰণত এইবাৰৰ সংস্কৰণৰ বিষয়বস্তু আছিল “ভাৰতীয় জ্ঞান ব্যৱস্থা (আই কে এছ)ৰ সমসাময়িক আৰু সাৰ্বজনীন প্ৰাসংগিকতা (The Contemporary and Universal Relevance of Indian Knowledge System, IKS) ।” শৰ্মাৰ অন্তৰ্দৃষ্টিসম্পন্ন উপস্থাপনত ভাৰতৰ প্ৰাচীন প্ৰজ্ঞাৰ সমৃদ্ধি আৰু আধুনিক ভাৰত গঢ় দিয়াত ইয়াৰ তাৎপৰ্যৰ বিষয়ে গভীৰভাৱে আলোচনা কৰা ।
এই উপলক্ষে ভাষণ দি শৰ্মাই কয় যে শংকৰদেৱে তেওঁৰ লেখাত ৪৩ বাৰ ভাৰতবৰ্ষৰ কথা উল্লেখ কৰিছে আৰু স্পষ্টভাৱে ইংগিত দিছে যে এজন ব্যক্তিয়ে ভাৰতত জন্ম লোৱাটো সৌভাগ্যৱান । তেওঁৰ শিষ্য মাধৱদেৱেও সেই একে আৱেগকে প্ৰতিধ্বনিত কৰিছিল বুলি মন্তব্য কৰে ।
"আধ্যাত্মিকতা, সজীৱতা, বৌদ্ধিকতা ভাৰতৰ তিনিটা প্ৰধান উপাদান । যেতিয়াই এই তিনিটাৰ যিকোনো এটাৰ অৱনতি ঘটে, তেতিয়াই ভাৰত আন্ধাৰত পৰিছে ।” শৰ্মাই তেওঁৰ ভাষণত কয় ।
তেওঁ পুনৰ কয়, "জ্ঞান কেৱল চিন্তা কৰা নহয় । প্ৰকৃত জ্ঞানক প্ৰজ্ঞা– প্ৰজ্ঞা বুলি কোৱা হয় ।" ভাৰতীয় শিক্ষিত অভিজাত শ্ৰেণীৰ ওপৰত মন্তব্য কৰি শৰ্মাই কয় যে তেওঁলোকে পশ্চিমত জ্ঞান আৰু ভাৰতত দুৰ্বলতা দেখিছে । বিশ্ববিদ্যালয় অনুদান আয়োগৰ শলাগ লৈ তেওঁ কয় যে ভাৰতীয় জ্ঞান ব্যৱস্থাৰ প্ৰৱৰ্তনে সাংস্কৃতিক বিচ্ছিন্নতা ৰোধ কৰিব ।
ইয়াৰ পূৰ্বে ব্যৱসায় প্ৰশাসন বিভাগৰ মুৰব্বী ডঃ ত্ৰিদিব আৰ শৰ্মাই অধ্যাপক বৰাৰ কৰ্মৰাজি স্মৰণ কৰি তেওঁক বৈচিত্ৰ্যময় গুণৰ ব্যক্তি বুলি অভিহিত কৰে । অনুষ্ঠানত প্ৰয়াত বৰাৰ স্মৃতিত আয়োজন কৰা কুইজৰ বিজয়ীসকলক বঁটা প্ৰদান কৰা হয় ।
বিশ্ববিদ্যালয়ত ২০০৫ চনৰ পৰা এই সোঁৱৰণী বক্তৃতা আয়োজন কৰাৰ বাবে বিভাগটোক প্ৰশংসা কৰে অধ্যাপক শম্ভূ নাথ সিঙে ।
