মাজুলী : মাজুলীৰ গৌৰৱ ৰাস মহোৎসৱলৈ মাজত মাথোঁ কেইটামান দিন বাকী । ৰাস বুলি ক’লেই পোন প্ৰথমে সত্ৰপীঠ মাজুলীৰ ছবিখন সকলোৰে মনলৈ আহে । ৰাসৰ সৈতে মাজুলীৰ আছে এৰাব নোৱাৰা সম্পৰ্ক । এই ৰাস মহোৎসৱৰ সময়ত মাজুলী পৰিণত হয় দ্বিতীয় বৃন্দাবনলৈ ।
কৃষ্ণৰ বাঁহীৰ অমিয়া সুৰ, খোল-তাল, কৃষ্ণ বন্দনাৰে মুখৰিত হয় মাজুলীৰ আকাশ বতাহ । প্ৰতিবাৰৰ দৰে এইবছৰো মাজুলীৰ প্ৰায় অৰ্ধ শতাধিক ৰংগমঞ্চ আৰু 12 খনকৈ সত্ৰত অনুষ্ঠিত হ’ব এই ৰাস মহোৎসৱ । বান-বাৰিষাৰ সকলো দুখ-দুৰ্দশা পাহৰি মাজুলীৰ শিশুৰ পৰা বৃদ্ধলৈকে সকলো ব্যস্ত মাজুলীৰ গৌৰৱ এই ৰাস মহোৎসৱক লৈ ।
ইফালে মাজুলীৰ ঐতিহাসিক চামগুৰি সত্ৰৰ দৃশ্যই এতিয়া সকলোৰে দৃষ্টি আকৰ্ষণ কৰিছে ৷ কিয়নো সত্ৰৰ মুখাশিল্পীসকল এতিয়া ৰাস মহোৎসৱত ব্যৱহৃত হ’বলগীয়া মুখা তৈয়াৰ কৰাত ব্যস্ত । এই চামগুৰি সত্ৰত তৈয়াৰ কৰা মুখা ৰাসত প্ৰদৰ্শনৰ বাবে মাজুলীৰ লগতে অসমৰ বিভিন্ন ঠাইলৈ যাব । যাৰ বাবে প্ৰস্তুতি প্ৰায় তুংগত উঠা দেখিবলৈ পোৱা গৈছে ৷
উল্লেখ্য যে, চামগুৰি সত্ৰত নিৰ্মাণ কৰা মুখাই আকৰ্ষণ কৰে দেশী-বিদেশী পৰ্যটকক । ইতিমধ্যে বহু পৰ্যটকৰ আগমনো ঘটিছে দ্বীপ জিলা মাজুলীলৈ । আশা কৰা হৈছে এইবছৰ আন বছৰৰ তুলনাত বহু বেছি পৰিমাণে দেশী-বিদেশী পৰ্যটকৰ আগমন হ’ব দ্বীপ জিলাখনলৈ ।
ইফালে চামগুৰি সত্ৰৰ শিল্পীসকলৰ হাতৰ পৰশত নিমাৰ্ণ হৈছে অঘাসুৰ, বকাসুৰ, পুতনা ৰাক্ষসী আদিকে ধৰি বিভিন্ন ধৰণৰ মুখা । এইসকল মুখাশিল্পীৰ আহ্বান আহক মাজুলীলৈ আৰু উপভোগ কৰক মাজুলীৰ গৌৰৱ ৰাস মহোৎসৱ ।
