গুৱাহাটী,১২ জুলাই: কলকাতাৰ পৰা গ্ৰেপ্তাৰ হোৱা ৰাকেশ সিঙৰ পৰা ওলাইছে ন ন তথ্য । এইবাৰ মণিপুৰ আৰক্ষীয়ে জিম্মাত ল'ব ধৃত ৰাকেশ সিঙক । মণিপুৰৰো মুখ্যমন্ত্ৰী সাহাৰ্য নিধিৰ ৯ লাখ ৯২ হাজাৰ টকা লুট কৰিছিল দুৰ্বৃত্তই । মণিপুৰৰ ক্ৰীড়া মন্ত্ৰালয়ৰ নামত ভুৱা চেক বনাই কৌশলেৰে লুটিছিল ধন । ৰাকেশ সিং এণ্ড কোম্পানীয়ে সংঘটিত কৰিছিল এই বৃহৎ লুণ্ঠন । যাৰ বাবে ৰাকেশ সিঙক জিম্মাত ল'বলৈ গুৱাহাটীত উপস্থিত মণিপুৰ আৰক্ষী ।
কলকাতাৰ পৰা CM Vigilance এ গ্ৰেপ্তাৰ কৰিছিল ৰাকেশ সিঙক । মুখ্যমন্ত্ৰীৰ সাহাৰ্য নিধিৰ ধন আত্মসাতৰ চেষ্টা কৰি গ্ৰেপ্তাৰ হৈছিল সিং । পিচে কেঁচু খান্দোতে এতিয়া সাপ ওলাইছে CM Vigilance ৰ তদন্তত । বিহাৰৰ ধৃত ৰাকেশ সিঙৰ আছে এখন বিশাল ক'লা সাম্ৰাজ্য । বেংক একাউন্টৰ ক'লা ব্যৱসায়ৰ তথ্য পোহৰলৈ আহিছে সিঙৰ । ভূৱা ঠিকনাৰে বেংক একাউন্ট খুলি অপৰাধীক ভাৰালৈ দিয়ে সেই একাউন্ট ।
বিভিন্ন দুখীয়া লোকৰ নামত ভূৱা ঠিকনাৰে ৰাকেশে খোলে বেংক একাউন্ট । বহু চাইবাৰ অপৰাধীক ইতিমধ্যে শ শ বেংক একাউন্ট ভাৰালৈ দিছে ৰাকেশে । ক'লা ধন সাচিবলৈও বহু প্ৰভাৱশালী ব্যক্তিক বেংক একাউন্ট ভাৰালৈ দিছে সিঙে । কলকাতা চহৰৰ মাজমজিয়াত আছিল ৰাকেশ সিঙৰ বিলাসী কাৰ্যালয় । ভিজিলেন্সে ইতিমধ্যে ৬ টাকৈ বেংক একাউন্ট জব্দ কৰিছে সিঙৰ । অধিক তদন্তৰ বাবে ১৪ দিনৰ বাবে ভিজিলেন্সে নিজৰ জিম্মাত লৈছিল সিঙক ।
শুকুৰবাৰে ভিজিলেন্সৰ জিম্মা শেষ হয় ৰাকেশ সিঙৰ । ইয়াৰ পিচতেই মণিপুৰ আৰক্ষীয়ে গ্ৰেপ্তাৰ কৰিব ৰাকেশ সিঙক । উল্লেখ্য যে অসমৰ মুখ্যমন্ত্রীৰ চহী জাল কৰি ধন সৰকোৱাৰ চেষ্টা চলাইছিল যদিও বার্থ হৈছিল ৰাকেশ সিং । মুখ্যমন্ত্রীৰ বিশেষ কোষে এই সন্দর্ভত এটা গোচৰ ৰুজু কৰি প্রৱঞ্চক চক্রটোৰ অন্যতম সদস্য ৰাকেশ সিঙক পশ্চিমবংগৰ পৰা ২৯ জুনত গ্রেপ্তাৰ কৰি গুৱাহাটীলৈ আনিছিল । নিউআলিপুৰৰ ৰাকেশ সিঙৰ সৈতে এটা চক্রই অসমৰ মুখ্যমন্ত্ৰীৰ চহী জাল কৰি সাহাৰ্য পুঁজিৰ ধন সৰকোৱাৰ বাবে বেংকত চেক জমা দিছিল ।
কলকাতাত থকা বেংক একাউন্টৰ বিপৰীতে প্রবঞ্চক চক্রটোৱে চেক জমা দিছিল বেংগালুৰুত । এনে ৮ খন চেক জমা দিছিল চক্রটোৱে । কিন্তু সংশ্লিষ্ট বেংকসমূহে এই সন্দর্ভত মুখ্যমন্ত্রীৰ কার্যালয়ৰ সৈতে যোগাযোগ কৰাত এই জালিয়াতিৰ কথা পোহৰলৈ আহে । সেইমর্মে মুখ্যমন্ত্রীৰ ভিজিলেন্সে বিষয়টোৰ তদন্ত কৰি প্ৰৱঞ্চক চক্ৰটো বিহাৰৰ বুলি নিশ্চিত হয় । এনে তথ্যৰ আধাৰতে ৰাকেশ কুমাৰ সিং নামৰ অভিযুক্তজনক পশ্চিমবংগত গ্রেপ্তাৰ কৰিবলৈ সক্ষম হয় । অভিযুক্তজনক বিশেষ আদালতে ১৪ দিনৰ বাবে মুখ্যমন্ত্ৰীৰ ভিজিলেন্সৰ জিন্মাত দিছিল ।
