নিউজ ডেস্ক,৪ ছেপ্টেম্বৰ: ছয় জনগোষ্ঠীক জনজাতিকৰণৰ নামত প্ৰতাৰণা কৰাৰ অভিযোগত ৰাজ্যজুৰি উত্তাল প্ৰতিবাদী কাৰ্যসূচী ৰূপায়ণ কৰে চুতীয়া ছাত্ৰ সন্থা, চুতীয়া যুৱ সন্মিলনে । ভিন্ন প্ৰান্তত প্ৰতিবাদী কাৰ্যসূচী ৰূপায়ণ কৰি শীঘ্ৰে জনজাতিকৰণ নকৰিলে ভয়ংকৰ আন্দোলন গঢ়ি তোলাৰ হুংকাৰ সংগঠনকেইটাৰ ।
মাজুলীত চুতীয়া ছাত্ৰ সন্থাৰ প্ৰতিবাদ:
সত্ৰনগৰী মাজুলীৰ নতুন বজাৰত মাজুলী জিলা চুতীয়া ছাত্ৰ সন্থাই পুত্তলিকা দাহেৰে ৰূপায়ণ কৰে তীব্ৰ প্ৰতিবাদী কাৰ্যসূচী । ছয় জনগোষ্ঠীক জনজাতিকৰণৰ নামত বছৰৰ পাচত বছৰ চৰকাৰে প্ৰতাৰণা কৰাৰ অভিযোগ উত্থাপন কৰি এই পুত্তলিকা দাহ কাৰ্যসূচী ৰূপায়ণ কৰা হয় । প্ৰতিবাদী কাৰ্যসূচীত অংশগ্ৰহণ কৰে সদৌ অসম চুতীয়া ছাত্ৰ সন্থাৰ সাধাৰণ সম্পাদক ৰাজু চুতীয়াই । দেশৰ প্ৰধানমন্ত্ৰী, জনজাতি মন্ত্ৰী আৰু অসমৰ মুখ্যমন্ত্ৰী হিমন্ত বিশ্ব শৰ্মাৰ পুত্তলিকা দাহ কৰে প্ৰতিবাদকাৰীসকলে ।
হিমন্ত বিশ্ব শৰ্মা মিছলীয়া, বিজেপি চৰকাৰ হায় হায়, বিজেপি চৰকাৰ গ' বেক আদি শ্ল'গানেৰে উত্তাল প্ৰতিবাদ সাব্যস্ত কৰে প্ৰতিবাদকাৰীসকলে । এই প্ৰতিবাদী কাৰ্যসূচীত অংশগ্ৰহণ কৰি সদৌ অসম চুতীয়া ছাত্ৰ সন্থাৰ সাধাৰণ সম্পাদক ৰাজু চুতীয়াই কয়,"মোদী চৰকাৰে ছয় জনগোষ্ঠীক জনজাতিকৰণৰ নামত প্ৰতাৰণা কৰি আহিছে । দেশৰ প্ৰধানমন্ত্ৰীগৰাকীয়ে শাসনলৈ আহিলে ছয় জনগোষ্ঠীক জনজাতি কৰাৰ আশ্বাস দিছিল যদিও আজিকোপতি ছয় জনগোষ্ঠীক জনজাতি নকৰিলে ।"
চুতীয়া যুৱ সন্মিলনৰ সাধাৰণ সম্পাদকক আটক:
লখিমপুৰত অনুষ্ঠিত হ'বলগীয়া ৰাজ্যিক কেবিনেট বৈঠকৰ প্ৰাকমুহূৰ্তত ছয় জনগোষ্ঠীৰ জনজাতিকৰণৰ দাবীত এক প্ৰতিবাদী কাৰ্যসূচী ৰূপায়ণ কৰাৰ পূৰ্বেই ঢকুৱাখনা আৰক্ষীয়ে আটক কৰে চুতীয়া যুৱ সন্মিলনৰ সাধাৰণ সম্পাদক কৌস্তভ কিশোৰ চুতীয়াক । ঢকুৱাখনা আৰক্ষীয়ে নিশা দুই বজাত শোৱাপাটিৰ পৰা উঠাই আনিলে যুৱ নেতাজনক ।
চুতীয়া যুৱ সন্মিলনৰ সাধাৰণ সম্পাদকক মুক্তিৰ দাবীত সৰুপথাৰত প্ৰতিবাদ:
লখিমপুৰত চুতীয়া যুৱ সন্মিলনৰ সাধাৰণ সম্পাদক কৌস্তভ কিশোৰ চুতীয়াক গ্ৰেপ্তাৰ কৰাৰ পিছতে জাঙুৰ খাই উঠিছে চুতীয়া যুৱ সন্মিলনৰ কৰ্মকৰ্তাসকল । সাধাৰণ সম্পাদকগৰাকীক মুক্তিৰ দাবীত সৰুপথৰাত টায়াৰ জ্বলাই প্ৰতিবাদী কাৰ্যসূচী ৰূপায়ণ কৰে চুতীয়া যুৱ সন্মিলনে । সম্পাদকগৰাকীক মুকলি নকৰিলে ইয়াতকৈয়ো জংগী আন্দোলনৰ কাৰ্যসূচী গ্ৰহণ কৰাৰ হুংকাৰ দিয়ে প্ৰতিবাদকাৰীসকলে ।
