গুৱাহাটী, ১৫ আগষ্ট : বহু বছৰৰ পাছত আলফা স্বাধীনে স্বাধীনতা দিৱসৰ দিনা থৰকাচুটি হেৰুৱাইছে অসম আৰক্ষীৰ । এটা দুটা নহয়, ২৫ টাকৈ বোমাৰে ধাৰাবাহিক বিস্ফোৰণ ঘটোৱাৰ পৰিকল্পনা কৰিছিল আলফা স্বাধীনে । কিন্তু কিবা কাৰিকৰী বিজুতিৰ বাবে বিস্ফোৰিত নহ'ল বোমাকেইটা ।
এই কথা আলফা স্বাধীনে এক বিবৃতিযোগে সংবাদ মাধ্যমক অৱগত কৰোৱাৰ পাছতে থৰকাচুটি হেৰাইছে অসম আৰক্ষীৰ । লগে লগে বোমা উদ্ধাৰৰ বাবে আলফা স্বাধীনে নিৰ্দিষ্ট কৰি দিয়া স্থানত আৰম্ভ হয় আৰক্ষীৰ অভিযান । গুৱাহাটী মহানগৰীৰো আঠটা স্থানত বোমা সংস্থাপনৰ কথা প্ৰকাশ কৰিছিল আলফা স্বাধীনে ।
ৰাজধানী দিছপুৰৰ মুখ্যমন্ত্রীৰ চৰকাৰী বাসগৃহৰ সমীপৰ লাষ্টগে'টৰ পূৰ্বৰ ধৰ্ণাস্থলীত বোমা সংস্থাপন কৰাৰ কথা উল্লেখ কৰিছিল আলফা স্বাধীনে । লাষ্টগে'টৰ নিৰ্দিষ্ট কৰি দিয়া স্থানত আৰক্ষীৰ বোমা বিশেষজ্ঞৰ দলৰ লগতে ডগ স্কোৱাডৰ দলে তন্নতন্নকৈ পৰীক্ষা কৰে যদিও উদ্ধাৰ হোৱা নাই কোনো ধৰণৰ বোমা । প্ৰায় ডেৰ ঘণ্টা ধৰি অভিযান চলোৱা হয় ।
উক্ত স্থানত গুৱাহাটী আৰক্ষী আয়ুক্ত দিগন্ত বৰা উপস্থিত হৈ পৰিস্থিতিৰ বুজ লয় । অৱশ্যে আৰক্ষী আয়ুক্তগৰাকীয়ে কোনো ধৰণৰ মন্তব্য দিয়াৰ পৰা বিৰত থাকে । ইতিমধ্যে লাষ্টগে'টত অভিযান সামৰা হৈছে যদিও আৰক্ষীৰ পহৰাৰ ব্যৱস্থা কৰা হৈছে ।
ইফালে গুৱাহাটীৰ শৰণীয়াৰ গান্ধী মণ্ডপলৈ যোৱা পথটোৰ বাঁওফালে থকা ট্ৰেন্সফৰ্মাৰৰ বাকচত বোমা স্থাপনৰ দাবী কৰিছিল আলফা স্বাধীনে । উক্ত স্থানতো আৰক্ষীয়ে তন্নতন্নকৈ অভিযান চলাই বোমাসদৃশ সামগ্ৰী উদ্ধাৰ কৰে । উদ্ধাৰ হোৱা সামগ্ৰীখিনি অৱশ্যে বোমা হয়নে নহয় সেয়া নিশ্চিত হোৱা নাই বুলি গুৱাহাটী আৰক্ষী আয়ুক্তই প্ৰকাশ কৰে ।
উল্লেখ্য যে স্বাধীনতা দিৱসৰ উলহ-মালহ পৰিৱেশৰ মাজতে বিভিন্ন স্থানত আলফা স্বাধীনে বোমা সংস্থাপন কৰাৰ বাতৰি প্ৰচাৰ হোৱাৰ লগে লগে গুৱাহাটী মহানগৰীত আতংকময় পৰিস্থিতিৰ সৃষ্টি হয় ।
