তিনিচুকীয়া, 3 জুলাই: আহাৰৰ বানত ত্ৰাহিমধুসূদন সুঁৱৰিছে ৰাজ্যবাসীয়ে ৷ কেন্দ্ৰীয় চৰকাৰ তথা ৰাজ্য চৰকাৰে আজিপৰ্যন্ত এই সমস্যাৰ কোনো স্থায়ী সমাধান উলিয়াবলৈ যত্ন কৰা পৰিলক্ষিত হোৱা নাই ৷ যাৰ ফলত অসমত বান প্ৰতিবছৰেই আহে আৰু থান-বান কৰি থৈ যায় আটোমটোকাৰিকৈ সজাই তোলা ঘৰখন, শস্যৰ পথাৰ সকলো ৷
প্ৰতিবছৰৰ দৰে এইবছৰো ব্ৰহ্মপুত্ৰ আৰু বৰাক উপত্যকাৰ বিস্তীৰ্ণ অঞ্চল এতিয়াও আছে পানীৰ তলত ৷ ৰাজ্যৰ মুখ্যমন্ত্ৰীগৰাকীয়ে মন্ত্ৰী-বিধায়কৰ লগতে আমোলা-বিষয়া সকলোলৈ নিৰ্দেশনা দিছে বানৰ সময়ত ৰাইজক সহায়-সহযোগিতা আগবঢ়াবলৈ ৷
আনকি মঙলবাৰৰ দিনটোত ৰাজ্যৰ মুখ্যমন্ত্ৰী হিমন্ত বিশ্ব শৰ্মাৰ লগতে কেইবাগৰাকীও মন্ত্ৰী-বিধায়কক ৰাজ্যৰ বিভিন্ন প্ৰান্তত বানাক্ৰান্তৰ কাষত উপস্থিত হোৱা পৰিলক্ষিত হৈছে ৷ ৰাজ্যৰ এইহেন সংকটৰ সময়ত বানাক্ৰান্তৰ আশ্ৰয় শিবিৰত শাসকীয় দলটোৰ এগৰাকী জনপ্ৰতিনিধিৰ উদ্ভট মন্তব্য তথা আচৰণৰ ঘটনা পোহৰলৈ আহিছে, যিয়ে দল-সংগঠনৰ লগতে সাধাৰণ ৰাইজৰ মাজত সৃষ্টি কৰিছে তীব্ৰ চাঞ্চল্যৰ । বিধায়কগৰাকী হৈছে মাৰ্ঘেৰিটা সমষ্টিৰ বিজেপি বিধায়ক ভাস্কৰ শৰ্মা ৷
ঘটনাস্থলীত উপস্থিত দল-সংগঠনৰ নেতৃত্বই বিষয়টো সন্দৰ্ভত খেদ প্ৰকাশ কৰি কয়, "তিনিচুকীয়া জিলাৰ টেকেৰীৰ বানাক্ৰান্ত আশ্ৰয় শিবিৰত মাৰ্ঘেৰিটা সমষ্টিৰ বিধায়ক ভাস্কৰ শৰ্মাই একাংশ দলীয় কৰ্মকৰ্তাৰ সৈতে উপস্থিত হৈছিল পৰিস্থিতিৰ বুজ ল’বলৈ ৷ কিন্তু বিধায়কগৰাকীয়ে খালী হাতেৰে আশ্ৰয় শিবিৰত উপস্থিত হোৱা প্ৰত্যক্ষ কৰি একাংশ লোকে বিধায়কগৰাকীক প্ৰশ্ন তোলে আৰু কথাৰ কটাকটি হোৱাৰ লগতে পৰিস্থিতি উত্তপ্ত হৈ পৰে" ৷
পৰৱৰ্তী সময়ত পৰিস্থিতি ইমানেই উত্তপ্ত হৈ পৰে যে, হতাহতিৰ দৰে পৰিস্থিতিৰো সৃষ্টি হয় ৷ বিধায়ক তথা বিধায়কগৰাকীৰ সৈতে শিবিৰটোত উপস্থিত হোৱা একাংশ বিজেপি নেতা-কৰ্মীয়ে বিধায়কগৰাকীক প্ৰশ্ন তোলা এজন যুৱকৰ কাপোৰ ফালি পেলোৱাৰ দৰে কাণ্ডও সংঘটিত কৰিছে বুলি অভিযোগ তোলে প্ৰত্যক্ষদৰ্শীয়ে ৷
আনকি আশ্ৰয় শিবিৰত খালী হাতেৰে বিধায়কগৰাকী আহিব নালাগিছিল বুলি ৰাইজে ক্ষোভ প্ৰকাশ কৰাৰ পাচতে বিধায়কগৰাকী জাঙুৰ খাই উঠে আৰু ‘একো সহায় নকৰো’, ‘নিদিও’ বুলি কৈ শিবিৰটোৰ পৰা পলায়ন কৰে ৷ বানত ৰাজ্যবাসী ককবকাই থকাৰ সময়ত তথা সৰ্বস্ব হেৰুৱাই আশ্ৰয় শিবিৰত থাকিবলগীয়া হোৱাৰ সময়তো শাসকীয় দলৰ এগৰাকী বিধায়কৰ এনে জনবিৰোধী বক্তব্যই ৰাজ্যৰ সচেতন মহলত লাভ কৰিছে বিশেষ চৰ্চা ৷
