মৰাণ, 24 মে’: স্বাস্থ্যখণ্ডলৈ এটি চিন্তনীয় খবৰ আহিছে চৰাইদেউৰ পৰা ৷ জিলাখনত দিনকদিনে বৃদ্ধি পাবলৈ ধৰিছে এইচ আই ভি এইডছত আক্ৰান্ত ৰোগীৰ সংখ্যা ৷ ড্ৰাগছ আসক্ত লোকৰ সংখ্যা জিলাখনত বাঢ়িবলৈ ধৰাত এয়া এইডছত আক্ৰান্ত হোৱাৰ অন্যতম কাৰণ হিচাপে বিবেচিত হৈছে ৷
শেহতীয়াকৈ জিলাখনত এইডছত আক্ৰান্ত 19 গৰাকী লোকক চিনাক্ত কৰিছিল স্বাস্থ্য বিভাগে ৷ এই খবৰে একপ্ৰকাৰ আতংকৰ সৃষ্টি কৰিছে জিলাখনত ৷ এই আতংক অব্যাহত থকাৰ মাজতে চিকিৎসাধীন অৱস্থাত মৃত্যু ঘটিছে এগৰাকী এইডছ আক্ৰান্ত ব্যক্তিৰ ৷
লগতে পঢ়ক: HIV ত আক্ৰান্ত যুৱকৰ মৃত্যুৰ পাছতে চৰাইদেউ স্বাস্থ্য বিভাগত হাহাকাৰ - HIV Positive Case
চৰাইদেউৰ সোণাৰিতো বৃদ্ধি পোৱা ড্ৰাগছ আসক্ত তথা নিষিদ্ধ ড্ৰাগছ সৰবৰাহকাৰীৰ বিৰুদ্ধে চৰকাৰ তথা স্থানীয় আৰক্ষীয়ে পদক্ষেপ গ্ৰহণ কৰিছে যদিও বিশেষ সফল হোৱা পৰিলক্ষিত হোৱা নাই । যাৰ ফলত বাঢ়িবলৈ ধৰিছে ড্ৰাগছ আসক্তৰ সংখ্যা ৷
জিলা স্বাস্থ্য বিভাগৰ পৰা প্ৰকাশ কৰা এক সূত্ৰত ড্ৰাগছ আসক্তসকলে চিৰিঞ্জৰ সহায়ত নিজৰ শৰীৰত ড্ৰাগছ সোমোৱাই লোৱাৰ বাবেই এইডছৰ দৰে মাৰাত্মক ৰোগসমূহৰ আৰম্ভণি হ’বলৈ ধৰিছে ৷ তিলতিলকৈ মৃত্যুৰ দিশে ঠেলি দিয়া একাংশ ড্ৰাগছ সেৱনকাৰী যুৱকে এতিয়া নিজৰ লগতে আনৰ বাবেও বিপদ চপাই লোৱাৰ আশংকা ব্যক্ত কৰিছে জিলা স্বাস্থ্য বিভাগে ৷
লগতে পঢ়ক: বিলাসী ৰে’লেৰে ড্ৰাগছৰ সৰবৰাহ: তিনিচুকীয়াত ১০ লক্ষাধিক টকাৰ ড্ৰাগছসহ আটক এজন - Mission Against Drug
এই কথাত প্ৰতিক্ৰিয়া প্ৰকাশ কৰিছে স্থানীয় আছু আৰু এ জে ৱাই চি পিৰ দৰে সংগঠনসমূহে ৷ চুবুৰীয়া ৰাজ্য নাগালেণ্ডৰ সীমান্তৰ নামতোলাৰ পৰা সোণাৰি হৈ অব্যাহত থকা নিষিদ্ধ ড্ৰাগছৰ অবৈধ সৰবৰাহ কৰা লোকৰ বিৰুদ্ধে আইনী ব্যৱস্থা গ্ৰহণ কৰিবলৈও দাবী উত্থাপন কৰিছে সংগঠন দুটাই ৷
উদ্বেগজনক কথাটো হৈছে যে, চৰাইদেউ জিলাখন অসম-নাগালেণ্ডৰ সীমান্তৱৰ্তী এখন জিলা ৷ যাৰ বাবে আৰক্ষী তথা জিলা প্ৰশাসনৰ হেমাহিৰ সুযোগতে ড্ৰাগছ সৰবৰাহৰ এক ৰমৰমীয়া ব্যৱসায় জিলাখনত চলি থকাৰ অভিযোগ উত্থাপন কৰিছে স্থানীয় সংগঠনৰ লগতে সচেতন মহলে ৷
পিছে এই প্ৰতিবেদন প্ৰকাশৰ পিছত জিলা প্ৰশাসনৰ লগতে স্বাস্থ্য বিভাগে কি পদক্ষেপ গ্ৰহণ কৰি জিলাখন ড্ৰাগছমুক্ত কৰাৰ ক্ষেত্ৰত সহায়ক হয়, সেয়া হ’ব লক্ষণীয় ৷
লগতে পঢ়ক: অস্ত্ৰোপচাৰ কৰি পেটৰ ভিতৰত কোনে সৰবৰাহ কৰিলে ক’কেইন ? - Cocaine Drugs Smuggling
