নিউজ ডেস্ক, 26 জুন: 2023 চনৰ ডিচেম্বৰ মাহত অসমৰ এটা সামৰিক ষ্টেচনত আলফা স্বাধীনে কৰা আক্ৰমণৰ ঘটনাৰ সৈতে জড়িত থকাৰ অভিযোগত চাৰিজন অভিযুক্তৰ বিৰুদ্ধে মঙলবাৰে ৰাষ্ট্ৰীয় তদন্তকাৰী সংস্থাই অভিযোগনামা দাখিল কৰে ।
এন আই এৰ তথ্য অনুসৰি, যোৱা বছৰৰ 14 ডিচেম্বৰত যোৰহাট জিলাৰ লিচুবাৰীৰ সামৰিক ষ্টেচনত নিষিদ্ধ ঘোষিত উগ্ৰপন্থী সংগঠন ইউনাইটেড লিবাৰেচন ফ্ৰণ্ট অৱ আছম-ইণ্ডিপেণ্ডেণ্ট (আলফা স্বাধীন)ৰ দুজনকৈ কেডাৰে মটৰ চাইকেলেৰে আহি গ্ৰেণেড নিক্ষেপ কৰিছিল ৷
অসমৰ তিনিচুকীয়া জিলাৰ কাকপথাৰত থকা সেনা শিবিৰত পুনৰ সংঘটিত হয় অনুৰূপ আক্ৰমণৰ ঘটনা । পৰেশ বৰুৱা নেতৃত্বাধীন আলফা(স্বাধীন) য়ে 15 ডিচেম্বৰত(2023) এক প্ৰেছ বিজ্ঞপ্তিযোগে এই আক্ৰমণৰ দায়িত্ব স্বীকাৰ কৰিছিল ।
লগতে পঢ়ক: Suspicious grenade recovered: যোৰহাটত সেনাৰ চাউনীত বোমা বিস্ফোৰণৰ পাছতে তিনিচুকীয়াতো বোমাৰ আতংক
এই সমগ্ৰ ষড়যন্ত্ৰৰ মাষ্টাৰ মাইণ্ড ম্যানমাৰৰ আন্তঃৰাষ্ট্ৰীয় সীমান্তৰ সিপাৰত থকা আলফা(স্বাধীন) ৰ অভিজিত গগৈ ওৰফে কনক গগৈ ওৰফে ৰুমেল অসম ওৰফে আইচেং অসম তথা সংগঠনটোৰ শীৰ্ষ পৰেশ বৰুৱা ওৰফে পৰেশ অসম বুলি এন আই এয়ে প্ৰকাশ কৰিছে ।
লগতে নিয়াই এই আক্ৰমণৰ আঁৰৰ আন এজন মূল ষড়যন্ত্ৰকাৰী আউটফিটৰ স্বয়ম্ভু ব্ৰিগেডিয়াৰ অৰুণোদয় দহোতীয়া ওৰফে অৰুণোদয় অসম বুলি চিনাক্ত কৰিছে । যোৰহাটৰ ঘটনা সন্দৰ্ভত এন আই এয়ে চলোৱা তদন্তৰ অন্তত বিপ্লৱ বৰুৱা, বিৰাজ কছাৰী আৰু অচ্যুত গগৈ নামৰ তিনিজন অভিযুক্তক গ্ৰেপ্তাৰ কৰা হৈছিল ।
লগতে পঢ়ক: আইচেং অসমৰ নেতৃত্বত সংঘটিত হৈছিল যোৰহাটৰ গ্ৰেণেড বিস্ফোৰণ : আৰক্ষী
মঙলবাৰে তিনিওজনৰ বিৰুদ্ধে অভিযোগনামা দাখিল কৰা হয় আৰু লগতে স্বয়ম্ভু অধিনায়ক আইচেং অসম এতিয়াও পলাতক অৱস্থাত আছে । ভাৰতীয় দণ্ডবিধি আইন, অবৈধ কাৰ্যকলাপ (প্ৰতিৰোধ) আইন আৰু বিস্ফোৰক সামগ্ৰী আইন আদিৰ অধীনৰ বিভিন্ন ধাৰাত অভিযুক্তসকলৰ বিৰুদ্ধে অভিযোগনামা দাখিল কৰা হৈছে ।
কাকপথাৰ সেনা শিবিৰৰ আক্ৰমণৰ সৈতে জড়িত অপৰাধ হিচাপে অসম আৰক্ষীৰ পৰা যোৰহাটৰ গোচৰটো গ্ৰহণ কৰা এন আই এয়ে ইয়াৰ পূৰ্বে কাকপথাৰৰ ঘটনটোৰ সৈতে জড়িত থকাৰ অভিযোগত ছয়জন অভিযুক্তৰ বিৰুদ্ধে অভিযোগনামা দাখিল কৰিছিল ।
