গুৱাহাটী, ৫ জুন : ২০২৪ চনৰ লোকসভা নিৰ্বাচনত ৰাজ্যৰ অন্যতম আঞ্চলিক দল অসম গণ পৰিষদে এখন আসন লাভ কৰিবলৈ সক্ষম হৈছে । এইবাৰৰ নিৰ্বাচনত এনডিএ মিত্ৰজোঁটত থকা অগপই দুখন আসনত প্ৰতিদ্বন্দ্বিতা কৰিছিল যদিও ধুবুৰী আসনত পৰাজয়ৰ বিপৰীতে বৰপেটা আসনখন নিজৰ দখললৈ আনিবলৈ সক্ষম হয় । বৰপেটা সমষ্টিৰ পৰা বঙাইগাঁৱৰ বিধায়ক ফণীভূষণ চৌধুৰীয়ে জয়লাভ কৰে । আনহাতে, জয়লাভৰ পিচত ফণীভূষণ চৌধুৰীক উষ্ম আদৰণি জনোৱা হয় ।
এই উপলক্ষে অগপৰ আমবাৰীৰ মুখ্য কাৰ্যালয়ত এক অভিনন্দন অনুষ্ঠানৰ আয়োজন কৰা হয় । এই অনুষ্ঠানতে বৰপেটা সমষ্টিৰ পৰা বিজয়ী হোৱা ফণীভূষণ চৌধুৰীক অগপৰ তৰফৰ পৰা আনুষ্ঠানিকভাৱে সম্বৰ্ধনা জনোৱা হয় । ইয়াৰ পূৰ্বে মহানগৰীৰ আমবাৰীস্থিত অগপৰ মুখ্য কাৰ্যালয়ত ফটকা ফুটাই দলীয় কৰ্মীয়ে ফণীভূষণ চৌধুৰীক দলৰ কাৰ্যালয়লৈ আদৰণি জনায় ।
আনহাতে, অগপ নেতৃত্বই ফুলৰ মালা, শৰাই আৰু মানপত্ৰৰে তেওঁক সম্বৰ্ধনা জনায় । এই অনুষ্ঠানত উপস্থিত থাকে অগপৰ কাৰ্যকৰী সভাপতি কেশৱ মহন্ত, সাংসদ বীৰেন্দ্ৰ প্ৰসাদ বৈশ্য আৰু বিধায়ক ৰমেন্দ্ৰ নাৰায়ণ কলিতা ।
লগতে পঢ়ক :40 বছৰ ধৰি বিধায়ক হৈ থকাৰ পিচত এইবাৰ দিল্লীলৈ যাব ফণীভূষণ চৌধুৰী - Lok Sabha Election Results 2024
ইফালে সংবাদ মাধ্যমৰ আগত বিজয়ী প্ৰাৰ্থী ফণীভূষণ চৌধুৰীয়ে মিত্ৰজোঁটৰ বিষয়ববীয়া আৰু কৰ্মীসকলক ধন্যবাদ জনায় । লগতে বৰপেটা লোকসভা সমষ্টিৰ যিবোৰ সমস্যা আছে সেই সমস্যাবোৰ ৰাইজৰ লগত আলোচনা কৰি চিহ্নিত কৰি সমাধানৰ চেষ্টা কৰিব বুলি মন্তব্য কৰে । অনুষ্ঠানত উপস্থিত থাকি কাৰ্যকৰী সভাপতি কেশৱ মহন্তই প্ৰধানমন্ত্ৰী মোদী আৰু মুখ্যমন্ত্ৰী হিমন্ত বিশ্ব শৰ্মাৰ লগতে বিজেপি-অগপৰ সকলো কৰ্মকৰ্তাক ধন্যবাদ জনায় ।
উল্লেখ্য যে বৰপেটা লোকসভা সমষ্টিত অগপৰ ফণীভূষণ চৌধুৰীয়ে ৮,৬০,১১৩টা ভোট লাভ কৰি বিজয়ী হয় । তেওঁৰ নিকটতম প্ৰতিদ্বন্দ্বী কংগ্ৰেছৰ দীপ বায়নে লাভ কৰে ৬,৩৭,৭৬২টা ভোট । ফণীভূষণ চৌধুৰী ২,২২,৩৫১টা ভোটৰ ব্যৱধানত জয়ী হয় । আনহাতে, সমষ্টিটোত চি পি আই এমৰ বিধায়ক মনোৰঞ্জন তালুকদাৰে ৯৬,১৩৮টা আৰু তৃণমূল কংগ্ৰেছৰ আবুল কালাম আজাদে ১৬,৪৩২টা ভোট লাভ কৰে । সমষ্টিটোত নোটাত পৰে ১৭,১১৭ টা ভোট ।
লোকসভা নিৰ্বাচনৰ ফলাফলৰ অধিক বা-বাতৰিৰ বাবে ক্লিক কৰক :
https://www.etvbharat.com/en/!elections/election-2024
