নলবাৰী, ১৬ ছেপ্টেম্বৰ : নলবাৰীৰ পৰীক্ষা কেন্দ্ৰত এগৰাকী যুৱতী পৰীক্ষাৰ্থীক আৰক্ষীয়ে তালাচীৰ নামত চলোৱা অশালীন আচৰণৰ ঘটনাই তীব্ৰ প্ৰতিক্ৰিয়াৰ সৃষ্টি কৰিছে । পৰীক্ষাৰ্থীগৰাকীয়ে এই ঘটনাৰ বিষয়ে সামাজিক মাধ্যমত প্ৰকাশ কৰাৰ পিচতে এই কাৰ্যৰ বিৰুদ্ধে তীব্ৰ ক্ষোভ উজাৰিছে বিভিন্নজনে । আনহাতে, এই ঘটনাৰ বিৰুদ্ধে জাঙুৰ খাই উঠিছে ৰাজনৈতিক দলসমূহো ।
ইফালে নলবাৰীৰ এই ঘটনাক লৈ সৰৱ হৈছে জিলা কংগ্ৰেছ । এই সমগ্ৰ ঘটনাক লৈ লজ্জিত অনুভৱ কৰা কংগ্ৰেছে শিক্ষাৰ নৱদ্বীপ খ্যাত চহৰ নলবাৰীত পৰীক্ষাৰ্থীক আৰক্ষী কনিষ্টবলে অশালীনভাৱে তালাচীৰ অভিযোগৰ এক সুস্থ তদন্ত বিচাৰি সোমবাৰে নলবাৰী আৰক্ষী অধীক্ষকৰ কাৰ্যালয়ত স্মাৰক-পত্ৰ প্ৰদান কৰে জিলা কংগ্ৰেছৰ বিষয়ববীয়াসকলে ।
ঘটনা সন্দৰ্ভত জিলা কংগ্ৰেছৰ সভাপতি ৰাতুল পাটোৱাৰীয়ে জনায়, "সমগ্ৰ ঘটনাত দুখ লাগিছে । কিয়নো যিটো পৰীক্ষা কেন্দ্ৰত ঘটনাটো সংঘটিত হৈছিল সেইখন বেলশৰ শ্বহীদ স্মৃতি কলেজৰ মই এসময়ত সাধাৰণ সম্পাদক আছিলোঁ । এই ঘটনাত দুখ আৰু লজ্জা প্ৰকাশ কৰি সমগ্ৰ ঘটনাটোৰ উচিত তদন্ত বিচাৰিছোঁ । আমি আজি এই বিষয়ত এখন সংবাদমেলৰ আয়োজন কৰিছিলোঁ । কিন্তু আৰক্ষী সঞ্চালক প্ৰধানগৰাকীয়ে ইতিমধ্যে এক্স হেণ্ডেলযোগে তদন্ত ঘোষণা কৰাৰ বাবে এই সংবাদমেল বাতিল কৰিছোঁ । ইয়াৰ বিপৰীতে আৰক্ষী অধীক্ষকৰ কাৰ্যালয়ত স্মাৰক-পত্ৰ প্ৰদান কৰো ।"
লগতে শাৰীৰিক তালাচীৰ সময়ত কেন্দ্ৰটোত কোনো ধৰণৰ আৱৰণ নথকাৰো অভিযোগ উত্থাপন কৰে নলবাৰী জিলা কংগ্ৰেছৰ সভাপতি ৰাতুল পাটোৱাৰীয়ে । আনহাতে, আগন্তুক পৰীক্ষাসমূহত যুৱতী, মহিলাক এনে ধৰণে তালাচী নচলাই চৰকাৰ প্ৰশাসনে অত্যাধুনিক কাৰিকৰী সামগ্ৰীৰে তালাচী চলাবলৈ আহ্বান জনায় নলবাৰী জিলা কংগ্ৰেছে ।
উল্লেখ্য যে মুখ্যমন্ত্ৰীয়ে এই ঘটনাত দুখ প্ৰকাশ কৰি ইতিমধ্যে ভৱিষ্যতৰ পৰীক্ষাসমূহত মহিলা পৰীক্ষাৰ্থীসকলক তালাচীৰ ক্ষেত্ৰত এছ অ' পি প্ৰদানৰ কথা ঘোষণা কৰে ।
