নগাঁও,৭ ছেপ্টেম্বৰ: সমগ্ৰ ৰাজ্য জোকাৰি যোৱা ধিঙৰ কিশোৰী ধৰ্ষণৰ অভিযোগত অভিযুক্ত দুই যুৱকক শনিবাৰে নগাঁও আদালতত হাজিৰ কৰে নগাঁও আৰক্ষীয়ে । বিগত ২২ আগষ্টৰ সন্ধিয়া ঘৰলৈ উভতি যোৱাৰ সময়ত ধৰ্ষণৰ দৰে জঘন্য ঘটনাৰ বলি হৈছিল এগৰাকী দশম শ্ৰেণীৰ ছাত্ৰী । যাক লৈ ৰাজ্যৰ সৰ্বত্ৰে উঠিছল প্ৰতিবাদৰ জোঁৱাৰ । ঘটনাৰ সৈতে জড়িত তফাজ্জুল নামৰ এজন অভিযুক্তৰ ইতিমধ্যেই আৰক্ষীৰ জিম্মাৰ পৰা পলায়নৰ চেষ্টা কৰোতেই সলিল সমাধি ঘটা বুলি আৰক্ষীৰ সূত্ৰত প্ৰকাশ পাইছে ।
কিন্তু আন দুজনকৈ অভিযুক্তক বিচাৰি নগাঁও আৰক্ষীয়ে অভিযান অব্যাহত ৰখাৰ মাজতে শুকুৰবাৰে সন্ধিয়া এটা সংখ্যালঘূ সংগঠনৰ নেতৃত্বত আত্মসমৰ্পন কৰে ধিংকাণ্ডৰ আন দুই অভিযুক্ত ফৰিদুল ইছলাম আৰু গোলাপ উদ্দিনে । আত্মসমৰ্পণ কৰাৰ পিছত ধিঙৰ কিশোৰী ধৰ্ষণকাণ্ডৰ দুই অভিযুক্ত ফৰিদুল আৰু গোলাপ উদ্দিনক নিশা জেৰা চলাই নগাঁও আৰক্ষীয়ে ।
ওৰে নিশা চলোৱা জেৰাৰ অন্তত শনিবাৰে দিনৰভাগত নগাঁও আদালতত হাজিৰ কৰোৱা হয় দুই অভিযুক্ত ফৰিদুল আৰু গোলাপ উদ্দিনক । আত্মসমৰ্পণ কৰাৰ পিছত শুকুৰবাৰে নিশা নগাঁও আৰক্ষীয়ে গ্ৰেপ্তাৰ কৰি চলোৱা জেৰাত দুই অভিযুক্ত ফৰিদুল আৰু গোলাপে কি কি কথা স্বীকাৰ কৰিলে সেই সন্দৰ্ভত কোনো তথ্যই ৰাজহুৱা কৰা নাই নগাঁও আৰক্ষীয়ে ।
ইপিনে, শনিবাৰে ধিংকাণ্ডৰ দুই অভিযুক্ত ফৰিদুল আৰু গোলাপক মুখমণ্ডল ক'লা কাপোৰেৰে ঢাকিহে হাজিৰ কৰোৱা হয় আদালতত । শনিবাৰে নগাঁও আদালতত হাজিৰ কৰোৱাৰ সময়ত অধিক জেৰাৰ বাবে পুনৰ সাত দিনৰ জিম্মাত বিচাৰি নগাঁও আৰক্ষীয়ে আদালতত আবেদন জনাই যদিও আদালতে আৰক্ষীক তিনিদিনৰ জিম্মাহে মঞ্জুৰ কৰে । আৰক্ষীয়ে দুয়োকে পুনৰ তিনিদিনৰ নিজৰ জিম্মাত ৰাখি ধিঙৰ ঘটনাক লৈ অধিক জেৰা চলাব বুলিও জানিব পৰা গৈছে ।
