গুৱাহাটী, ২৯ আগষ্ট : অসম বিধানসভাৰ শৰৎকালীন অধিৱেশনৰ চতুৰ্থ দিনাও উত্তপ্ত হৈ পৰে সদনৰ মজিয়া ৷ ময়ূৰ বৰগোঁহাই নামৰ এগৰাকী ব্যৱসায়ীয়ে বৰপেটাৰ বহুকেইজন সংখ্যালঘু সম্প্ৰদায়ৰ শ্ৰমিকক বৰ্বৰভাৱে মাৰপিট কৰাৰ অভিযোগ তোলে বিধায়ক শ্বেৰমান আলীয়ে ৷ লগতে বিধায়ক আলীয়ে এই ঘটনাৰ বাবে আজি বিধানসভাৰ শূণ্যকালীন ঘন্টাত আলোচনাৰ আবেদন কৰিছিল ।
কিন্তু বিধানসভাৰ অধ্যক্ষই তেওঁক আলোচনাৰ বাবে অনুমতি প্ৰদান নকৰাত বিধায়ক আলীয়ে সদনত হুলস্থূলীয়া পৰিৱেশৰ সৃষ্টি কৰে । যাৰবাবে বিধানসভাৰ অধ্যক্ষই বিধায়ক শ্বেৰমান আলীক দিনটোৰ বাবে সদনৰ পৰা নিলম্বন কৰে । সদনৰ পৰা নিলম্বন হোৱাৰ বাবে বিধায়ক আলীয়ে সদনৰ বাহিৰত দুঘন্টীয়া অৱস্থান ধৰ্মঘটত বহে ৷ লগতে তেওঁ ময়ুৰ বৰগোঁহাইক গ্ৰেপ্তাৰৰ দাবী তোলে ৷
প্ৰতিবাদস্থলীৰ পৰাই বিধায়ক আলীয়ে সংবাদ মাধ্যমক উদ্দেশ্যে কেতবোৰ মন্তব্য কৰে ৷ তেওঁ কয়, ‘‘ময়ূৰ বৰগোঁহায়ে শ্ৰমিকক অত্যাচাৰ কৰিছে । অসমত এয়া হিন্দু মুছলমানৰ কাজিয়া নহয় । বৰগোঁহাইৰ নিচিনা মানুহৰ জৰিয়তে মুখ্যমন্ত্ৰীয়ে লেতেৰা ৰাজনীতি কৰিব বিচাৰিছে । বৰগোঁহাইক গ্ৰেপ্তাৰ কৰিব লাগে । বৰপেটা কালি গোচৰটো পঞ্জীয়ন হৈছে । গতিকে বৰগোঁহাইক ২৪ ঘন্টাৰ ভিতৰত গ্ৰেপ্তাৰ কৰি ভুক্তভোগীক ন্যায় দিব লাগে ।’’
‘‘বিগত পাঁচটা দিনে ময়ূৰ বৰগোঁহায়ে কেনেকৈ সাৰি থাকিলে ৷ আপোনালোকে দহ ঘন্টাৰ ভিতৰত এনকাউন্টাৰ কৰি গুলীয়াই মাৰিব পাৰে ৷ কিন্তু ময়ূৰ বৰগোঁহায়ে ১৫ জন শ্ৰমিকক কোবাই পিঠি ফালি দিছে ৷ ময়ুৰ বৰগোঁহাইৰ দৰে মানুহে অসমত অশান্তিৰ সৃষ্টি কৰিছে ৷ ইয়াত কোনো উজনি নামিনৰ কোনো সংঘাত নাই ৷’’ বিধায়ক আলীয়ে কয় ৷
লগতে পঢ়ক : হিন্দু মুছলমান প্ৰসংগক লৈ পুনৰ উত্তপ্ত বিধানসভা : ১০ মিনিটৰ বাবে স্থগিত সদন - ASSAM ASSEMBLY AUTUMN SESSION
