যোৰহাট,১২ মে': প্ৰতিশ্ৰুতি পূৰণ কৰিলে মন্ত্ৰী পীযুষ হাজৰীকাই । হাঁহি বিৰিঙালে এটা পৰিয়ালৰ মুখত । নিৰ্বাচনী ধামখুমীয়া মাজতে তিতাবৰ এটা দুৰ্ভগীয়া পৰিয়ালৰ তিনি শিশুক মন্ত্ৰী পীযুষ হাজৰীকাই প্ৰতিশ্ৰুতি প্ৰদান কৰি পালন কৰা দায়ৱদ্ধতাৰ বাবে সৰ্বত্ৰে চৰ্চিত হোৱাই নহয় উচ্চ প্ৰশংসিত হয় ।
তিতাবৰৰ কুহুম চাহ বাগিচাৰ ভুচি লাইনৰ যাদৱ কুৰ্মী নামৰ শ্ৰমিকগৰাকীৰ মৃতদেহ ঘৰৰ সমীপৰ এটা পুখুৰীত উদ্ধাৰ কৰা হৈছিল আৰু কেইবছৰমান পূৰ্বে পত্নীয়ে সন্তানক এৰি পৰপুৰুষলৈ পলাই যোৱাৰ পিছৰ পৰা ই তিনিটি শিশু অৱস্থা দুৰ্বিষহ হৈ পৰে । তিনিওটি শিশুৰ দুৰ্বিসহ জীৱনৰ কথা অৱগত হৈছিল মন্ত্ৰী পীযুষ হাজৰীকা আৰু তিতাবৰত নিৰ্বাচনৰ প্ৰচাৰ চলাবলৈ আহি মন্ত্ৰী হাজৰিকাই তেওঁলোকৰ ঘৰত উপস্থিত হৈ শিশু তিনিটি শিক্ষাৰ দায়িত্ব গ্ৰহণ কৰা প্ৰতিশ্ৰুতি দিছিল ।
সেই অনুসৰি মন্ত্ৰী হাজৰীকাই ৭লাখ টকাৰ সাহায্য আগবঢ়োৱাৰ কথা ঘোষণা কৰিছিল । সেই ধনৰাশি ১৫ বছৰলৈ ফিক্স ডিপ'জিট কৰা হ'ব আৰু সেই টকাৰ সুতৰ বিনিময়ত তিনি শিশুৱে মাহে সুত হিচাপে লাভ কৰিব তিনি হাজাৰ টকা । উক্ত ধনেৰে শিশু কেইটিয়ে শিক্ষাগ্ৰহণ কৰিবলৈ সক্ষম হ'ব ।
ইতিমধ্যে জিলা আয়ুক্তৰ যোগেৰে তিনিওটি শিশুৰ বেংক একাউণ্ট খুলি দিয়া হৈছে । তিনিটি শিশু পিতৃ মৃত্যু হোৱাৰ পিছত দিগবিদিক হেৰুৱাই পেলোৱাৰ পাছতে দায়িত্ব গ্ৰহণ কৰি উৎকৃষ্ট মহানুভৱতাৰ প্ৰকাশ কৰিলে মন্ত্ৰী পীযুষ হাজৰীকাই । মন্ত্ৰী পীযুষ হাজৰীকাৰ এই মহানুভৱতাক সকলোৰে উচ্চ প্ৰশংসাৰে উপচাই তুলিছে ।
