গুৱাহাটী, 17 ছেপ্টেম্বৰ : দূৰণিৰ পৰা ভাহি আহিছে হৰি নামৰ অমিয়া সুৰ ৷ জগতগুৰু দুজনাৰ সৃষ্টি আয়তীৰ নামেৰে মুখৰিত হৈছে আকাশ বতাহ ৷ নামঘৰত চলিছে নাম-প্ৰসংগ ৷ গুৱাহাটীৰ পৰা প্ৰায় 40 কিঃমিঃ নিলগৰ চুবুৰীয়া মেঘালয়ৰ ৰি-ভয় জিলাৰ সদৰ নংপো চহৰৰ পৰা প্ৰায় 6 কিঃমিঃ ভিতৰত মাৰাংগাৰৰ পৰা ভাহি আহিছে এই সুৰৰ ধ্বনি ৷
উল্লেখ্য যে, অসমীয়া জাতিৰ জনকস্বৰূপ মহাপুৰুষ শ্ৰীমন্ত শংকৰদেৱ আৰু তেওঁৰ প্ৰধান শিষ্য শ্ৰীশ্ৰী মাধৱদেৱ অবিহনে অসম আৰু অসমীয়াৰ পৰিচয়ৰ কথা ভাবিবই নোৱাৰি । আনহাতে ভাদ মাহত মহাপুৰুষ শ্ৰীমন্ত শংকৰদেৱ আৰু শ্ৰীশ্ৰী মাধৱদেৱৰ তিৰোভাৱ তথা মহাপ্ৰয়াণ হোৱা বাবে অসমৰ জনজীৱনত ভাদ মাহক পবিত্ৰ জ্ঞান কৰি অহা হৈছে । যাৰ বাবে অসমৰ সকলো সত্ৰ, নামঘৰসমূহত ভাদ মাহ আৰম্ভ হোৱাৰ দিনাৰ পৰাই মহাপুৰুষ দুজনাক স্মৰণ কৰি দৈনিক নাম-প্ৰসংগ পৰিৱেশন কৰা হয় । যাৰ বাবে ভাদ মাহ হৈ পৰিছে অসমৰ জনজীৱনৰ এক গুৰুত্বপূৰ্ণ মাহ হিচাবে বিবেচিত ।
এক কথাত ক’বলৈ গ’লে ভাদ মাহটোত হৰি নামেৰে মুখৰিত হৈ থাকে সত্ৰ আৰু নামঘৰসমূহ । মেঘালয়ৰ ৰি-ভয় জিলাৰ সদৰ নংপো চহৰৰ পৰা প্ৰায় 6 কিঃমিঃ ভিতৰত মাৰাংগাৰ নামৰ জনজাতি প্ৰধান অঞ্চলটোত আছে কেবাখনো গাঁও । পৰিস্থিতিৰ তাগিদাত পৰি বহিঃৰাজ্যত থাকিলেও তাৰ বাসিন্দাসকলে এতিয়াও শিপা এৰি দিয়া নাই ।
অবিভক্ত অসমত থকাৰ সময়তে তেওঁলোকে তাত স্থাপন কৰিছিল শ্ৰীমন্ত শংকৰদেৱ হাইস্কুল । তাৰ ওচৰতে আছে শ্ৰীমন্ত শংকৰদেৱ নামঘৰ । নামঘৰটোক শ্ৰীমন্ত শংকৰদেৱ সংঘৰ অন্যতম শাখা "পৰমানন্দ প্ৰাথমিক শাখা মাৰাংগাৰ নামঘৰ" নামে তাত পৰিচিত । নামঘৰৰ উপদেষ্টা মনীন্দ্ৰ ৰাজা, সভাপতি জয়মালা বিনং আৰু সম্পাদক যোগেশ মাৰৱেটে জানিবলৈ দিয়া মতে তেওঁলোকৰ পিতৃ পুৰুষৰ দিনৰে পৰা নামঘৰত ভাদ মাহত পুৰুষ-মহিলাসকলে এমহীয়া নাম-প্ৰসংগত ভাগ লৈ আহিছে ।
ইয়াৰ মাজতে যোৱা 24 আগষ্টত মহাপুৰুষ শ্ৰী শ্ৰী মাধৱদেৱ আৰু 4 ছেপ্টেম্বৰত মহাপুৰুষ শ্ৰীমন্ত শংকৰদেৱৰ তিৰোভাৱ তিথি নাম-প্ৰসংগৰ মাজেৰে উদযাপন কৰা হয় । আনহাতে 15 ছেপ্টেম্বৰত মাৰাংগাৰ নামঘৰ কমিটীৰ আমন্ত্ৰণ ক্ৰমে পাৰস্পাৰিক সাংস্কৃতিক বিনিময় কাৰ্যসূচীৰ অংশ হিচাপে অসমৰ গুৱাহাটীৰ পশ্চিম প্ৰান্তৰ খানামুখৰ প্ৰখ্যাত নামতি দল "জ্ঞানমালিনী বিকশিত মহিলা দল"টোৰ সভানেত্ৰী পূৰ্ণিমা কলিতা আৰু সম্পাদিকা জুমি কলিতাৰ নেতৃত্বত যোৱা 15 জনীয়া দলটোৱে তাৰ নামঘৰত নাম-প্ৰসংগ পৰিৱেশন কৰি উপস্থিত সকলোকে আপ্লুত কৰে । মহিলা দলটোক মাৰাংগাৰ নামঘৰৰ মহিলা সমাজৰ কৰ্মকৰ্তা ক্ৰমে - ৰুণুমী বিনং, কাঁহি চিয়েম আৰু মিনতি বিনঙে পৰম্পৰাগতভাৱে আদৰণি জনায় ।
উল্লেখ্য যে, বৃহত্তৰ অঞ্চলটোৰ দহখন গাঁৱৰ বাসিন্দাসকল মূলতঃ কাৰ্বি আৰু তিৱা সম্প্ৰদায়ৰ যদিও তাত তেওঁলোক জাতিগত পৰিচয় মৰঙালী হিচাপে পৰিচিত হৈ আহিছে । বৃহত্তৰ মাৰঙা অঞ্চলৰ দহখনকৈ গাঁও হ’ল ক্ৰমে - বৰগাং, নালাপাৰা, নঙা গাঁও, পুৰাণ গাঁও, লালুমপাম, জয় গাঁও, বৰকুছি, বৰখাত চাই, চাৰিকুছি আৰু আঠগাঁও । এই সন্দৰ্ভত মনীন ৰাজাই জানিবলৈ দিয়া মতে অসমৰ পৰা দূৰত থাকিলেও তেওঁলোকে নীৰৱে অসমীয়া সংস্কৃতিৰ চৰ্চা কৰি আহিছে ।
আনকি বিগত বৰ্ষত অসমৰ মুখ্যমন্ত্ৰী ড৹ হিমন্ত বিশ্ব শৰ্মাই তেওঁলোকৰ আহ্বানৰ প্ৰতি সঁহাৰি জনাই নামঘৰটো মেৰামতি আৰু পুনৰ নিৰ্মাণৰ বাবে ব্যক্তিগতভাৱে আৰ্থিক সাহায্য প্ৰদান কৰিছে বুলিও মনীন ৰাজাই আহ্বান জনাইছে ।
