শিৱসাগৰ, 20 আগষ্ট: অৱশেষত চৰকাৰ-প্ৰশাসনৰ সমুখত ক্ষমা বিচাৰিলে শিৱসাগৰৰ স্থানীয় মাৰোৱাৰী সমাজে ৷ উল্লেখ্য যে, শিৱসাগৰত এগৰাকী ৰাষ্ট্ৰীয় পৰ্যায়ৰ পাঞ্জা খেলুৱৈক বহিৰাগত বণিয়াই প্ৰহাৰ কৰা ঘটনাক কেন্দ্ৰ কৰি সৃষ্টি হোৱা অৰাজক পৰিস্থিতিৰ পাছত মঙলবাৰে শিৱসাগৰৰ যুৱদলত জিলাখনৰ 30 জাতীয়-জনগোষ্ঠীয় সংগঠনৰ সৈতে জিলাখনৰ অভিভাৱক মন্ত্ৰী ৰণোজ পেগু এক বৈঠকত মিলিত হয় । সদৌ তাই আহোম ছাত্ৰ সন্থা, বীৰ লাচিত সেনা, সংগ্ৰামী যুৱ ছাত্ৰ পৰিষদ আদিকে ধৰি 30 টা দল-সংগঠনৰ সৈতে হোৱা বৈঠকত মন্ত্ৰী ৰণোজ পেগুৱে বিষয়টো অসম চৰকাৰে গুৰুত্ব সহকাৰে গ্ৰহণ কৰা বুলি উল্লেখ কৰে ।
মন্ত্ৰী পেগুৱে বৈঠকৰ পাছত সংবাদ মাধ্যমৰ সৈতে আগত কয় যে জাতীয় সংগঠনসমূহে খিলঞ্জীয়াৰ ভূমিৰ অধিকাৰ, ভূমি সুৰক্ষিত কৰাৰ লগতে উত্থাপন কৰা দাবীসমূহৰ প্ৰতি অসম চৰকাৰে সঠিকভাৱে গুৰুত্ব প্ৰদান কৰিব । সমান্তৰালভাৱে নাৰীৰ সুৰক্ষাজনিত বিষয়ৰ প্ৰতি লক্ষ্য ৰাখি নিজক সুৰক্ষা প্ৰদান কৰিব পৰা কাৰ্যসূচীৰ সংখ্যা বৃদ্ধি কৰিব বুলিও কয় পেগুৱে ৷ আনহাতে, কলকাতাকে ধৰি অন্যান্য ধৰ্ষণ-উৎপীড়নৰ ঘটনাক নিন্দা কৰে মন্ত্ৰীগৰাকীয়ে ৷
ইতিমধ্যে সকলোৰে জ্ঞাত যে শিৱসাগৰৰ বাবুপট্টিত যোৱা 13 আগষ্টত ৰাষ্ট্ৰীয় পৰ্যায়ৰ পাঞ্জা খেলুৱৈক বহিৰাগত বণিয়াই প্ৰহাৰ কৰিছিল ৷ বহিৰাগত বণিয়াৰ প্ৰহাৰত শাৰীৰিক আৰু মানসিকভাৱে আঘাতপ্ৰাপ্ত হৈছিল 18 বছৰীয়া অসমীয়া পাঞ্জা খেলুৱৈগৰাকী ৷ দলবদ্ধ আক্ৰমণৰ ফলত মূৰ আৰু পেটত গুৰুতভাৱে আঘাত পাইছিল খেলুৱৈগৰাকীয়ে ৷
এই ৰাষ্ট্ৰীয় পৰ্যায়ৰ পাঞ্জা খেলুৱৈগৰাকীক ন্যায়ৰ দাবীত প্ৰতিবাদত নামি পৰে শিৱসাগৰৰ 30 টা দল-সংগঠনৰ লগতে সহস্ৰাধিক লোকে ৷ শিৱসাগৰ নগৰত এক আচলাৱস্থাৰ সৃষ্টি কৰা পৰিস্থিতিৰ পাছতেই মঙলবাৰে স্থানীয় ব্যৱসায়ী মহল-দল সংগঠন আৰু জিলা প্ৰশাসনৰ মাজত এই ত্ৰিপাক্ষিক বৈঠকৰ আয়োজন কৰা হৈছিল আৰু বৈঠকৰ সিদ্ধান্ত মৰ্মে ৰাজস্থানী ব্যৱসায়ী সমাজৰ প্ৰতিনিধিয়ে সভাত ৰাজহুৱাভাৱে ক্ষমা প্ৰাৰ্থনা বিচাৰে । শৰাইত গামোচা, তামোল-পাণ লৈ ৰাজস্থানী সমাজে সমূহীয়াভাৱে অসমীয়াৰ ওচৰত ক্ষমা বিচাৰে । এই বৈঠকতে ভুক্তভোগী জিমি দাসৰ চিকিৎসাৰ বাবদ ৰাজস্থানী (মাৰোৱাৰী) সমাজে দুই লাখ টকা আৰ্থিক সাহাৰ্য আগবঢ়োৱাৰ প্ৰতিশ্ৰুতি প্ৰদান কৰে ।
