মাজুলী: মাজুলীৰ গৌৰৱ ৰাস মহোৎসৱলৈ মাজত মাথো কেইটামান দিন । ৰাস মহোৎসৱৰ দিন যিমানেই ওচৰ চাপি আহিছে সিমানেই তৎপৰতা বৃদ্ধি পাইছে মাজুলীবাসীৰ মাজত । হাজাৰ হাজাৰ দৰ্শনাৰ্থীক আদৰিবলৈ সাজু হৈছে মাজুলীবাসী । সাজু কৰি তোলা হৈছে ৰংগমঞ্চসমূহৰ লগতে সত্ৰসমূহ সত্ৰনগৰীত মাজুলীটো এতিয়া উখল-মাখল পৰিৱেশে বিৰাজ কৰিছে । দিনৰ ভাগৰ পৰা নিশা দুপৰলৈকে চলিছে কংস বধৰ আখৰা, কৃষ্ণৰ বাঁহীৰ সুমধুৰ সুৰ । ৰাস উৎসৱৰ মূৰ্চনাত বিলীন সত্ৰপীঠ মাজুলী । খোল-তাল, বাঁহীৰ সুৰ, ৰাস গীতৰ মধুৰ ধ্বনিৰে মুখৰিত হৈছে সত্ৰ নগৰী মাজুলী ।
মাজুলীৰ সত্ৰসমূহৰ লগতে ৰংগমঞ্চসমূহত দিনৰ পৰা দোভাগ নিশালৈকে চলিছে ৰাসৰ আখৰা । মঞ্চই মঞ্চই শুনা গৈছে কংসৰ গর্জন, কৃষ্ণৰ বাঁহীৰ অমিয়া সুৰ । এককথাত ক'বলৈ গ'লে দ্বিতীয় বৃন্দাবনলৈ পৰ্যবসিত হৈছে মাজুলী । ৰাস মহোৎসৱৰ বাবে মাজুলীবাসীৰ লগতে সাজু হৈছে মাজুলী জিলা প্ৰশাসনো ।
দিনৰ ভাগত থাকিব অবিৰত ফেৰীসেৱা
এইবাৰ মাজুলী জিলা প্ৰশাসনৰ উদ্যোগত ৰাস দৰ্শনাৰ্থীক আদৰিবৰ বাবে মাজুলীৰ পদূলিয়ে পদূলিয়ে জ্বলিব লক্ষাধিক মাটিৰ চাকি । ইফালে, ৰাস দৰ্শনাৰ্থীসকল অহা-যোৱা কৰিবলৈ যাতে ফেৰীৰ সমস্যা নহয় তাৰ প্ৰতি লক্ষ্য ৰাখি দিনৰ ভাগত চলিব অবিৰত ফেৰী । আনহাতে, দক্ষিণপাটত নিৰ্মাণ হৈছে নতুন ফেৰীঘাট । যাত্ৰীসকলৰ সুবিধাৰ প্ৰতি লক্ষ্য ৰাখি বাতিল কৰা হৈছে ফেৰীসেৱাৰ অনলাইন টিকট ।
সকলো পক্ষক সক্ৰিয় হৈ থকাৰ আহ্বান
ডিব্ৰুগড়, বগীবিল আৰু লখিমপুৰ-ঢকুৱাখনা হৈও নিজা গাড়ীৰে আহিব পাৰিব মাজুলীলৈ । ৰাস দশনাৰ্থীয়ে যাতে ৰাস দর্শন কৰি উভতি যোৱাৰ সময়ত নেতিবাচক বাৰ্তা নিব নোৱাৰে তাৰ প্ৰতি সকলো পক্ষক সক্ৰিয় হৈ থকাৰ আহ্বান জনাইছে মাজুলী জিলা আয়ুক্ত ৰাতুল চন্দ্ৰ পাঠকে । পৰ্যটকসকলে যাতে মাজুলীত প্ৰৱেশ কৰাৰ লগে লগে এক আধ্য়াত্মিক পৰিবেশ অনুভৱ কৰিব পাৰে তাৰ বাবে সকলোকে সাজু হ'বলৈ জিলা আয়ুক্তগৰাকীয়ে আহ্বান জনাইছে ।
