আমগুৰি, ২৩ জুন : শিৱসাগৰ জিলাৰ আমগুৰিত শনিবাৰে নিশা পিঞ্জৰাবদ্ধ হয় এটা নাহৰফুটুকী । আমগুৰিৰ চামগুৰিত নিশা পিঞ্জৰাবদ্ধ হয় প্ৰকাণ্ড নাহৰফুটুকীটো । অঞ্চলটোত দীৰ্ঘদিন ধৰি উপদ্ৰৱ চলাই আহিছিল নাহৰফুটুকীটোৱে । গৰু, ছাগলী, কুকুৰা আদি ভক্ষণ কৰি দীৰ্ঘদিন ধৰি নাহৰফুটুকীটোৱে আতংকৰ সৃষ্টি কৰি আহিছিল অঞ্চলটোত ।
অঞ্চলটোত ১০ টাৰো অধিক নাহৰফুটুকী থকাৰ সন্দেহ কৰিছে স্থানীয় লোকে । চামগুৰিৰ যুৱ সমাজে শনিবাৰে নিশা পিঞ্জৰা পতাৰ আধাঘণ্টা পিচতেই নাহৰফুটুকীটো পিঞ্জৰাবদ্ধ হয় । নাহৰফুটুকীটো চাবলৈ কেইবা শতাধিক লোকে ভিৰ কৰে অঞ্চলটোত ।
জানিব পৰা মতে চামগুৰি, চটাইচিগা অঞ্চলত চাহ বাগানকে ধৰি হাবি-জংঘলত বহুকেইটা বাঘৰ উপস্থিতি প্ৰত্যক্ষ কৰিছে স্থানীয় লোকে । স্থানীয় যুৱ সমাজে বন বিভাগক নাহৰফুটুকী পিঞ্জৰাবদ্ধ কৰিবলৈ দাবী জনাই আহিছিল । শনিবাৰে নিশা পিঞ্জৰা পতাৰ আধাঘণ্টা পিচতেই নাহৰফুটুকীটো পিঞ্জৰাবদ্ধ হয় ।
নাহৰফুটুকীটো পিঞ্জৰাবদ্ধ হোৱাৰ পিছতেই স্থানীয় আমগুৰি, হালোৱাটিং আৰু শিৱসাগৰৰ বন বিভাগৰ লোক উপস্থিত হৈ নাহৰফুটুকীটো উদ্ধাৰ কৰে । বন বিভাগৰ লোকে নাহৰফুটুকীটো উদ্ধাৰ কৰি সোনাৰীস্থিত ৰিজাৰ্ভত মুকলি কৰি দিব বুলি প্ৰকাশ কৰে । উল্লেখ্য যে শিৱসাগৰৰ বিভিন্ন প্ৰান্তত দীৰ্ঘদিনে বাঘৰ আতংক বিৰাজ কৰি আহিছে । বন বিভাগে এই ক্ষেত্ৰত কোনো বিশেষ ভূমিকা গ্ৰহণ নকৰাৰ অভিযোগ উত্থাপন কৰি আহিছে ৰাইজে ।
বিগত কিছুদিন পূৰ্বে আমগুৰিত উদ্ধাৰ হৈছিল দুটাকৈ নাহৰফুটুকী । খৰাগড় লোণপুৰীয়াত উদ্ধাৰ হয় নাহৰফুটুকী দুটা । তেতিয়াও বন বিভাগৰ গুৰুত্বহীনতাৰ বাবেই নাহৰফুটুকী দুটা মৃত্যুমুখত পৰাৰ অভিযোগ উত্থাপন কৰিছিল ৰাইজে ।
