লখিমপুৰ, ২৪ মাৰ্চ : অৱশেষত অপেক্ষাৰ অন্ত পৰিল । প্ৰধান বিৰোধী দল কংগ্রেছে শনিবাৰে নিশা ঘোষণা কৰিলে ১২ নং লখিমপুৰ লোকসভা সমষ্টিৰ প্ৰাৰ্থীৰ নাম । কংগ্রেছে লখিমপুৰ লোকসভা সমষ্টিত এইবাৰ উদয় শংকৰ হাজৰিকাক প্ৰাৰ্থিত্ব প্ৰদান কৰিছে । দলৰ হাইকমাণ্ডে এই কথা ঘোষণা কৰে ।
লখিমপুৰ লোকসভা সমষ্টিত প্ৰাৰ্থীৰ নাম ঘোষণা কৰিবলৈ কংগ্রেছ দলে যোৱা প্ৰায় এপষেক ধৰি হোহকা-পিছলা কৰি আছিল । দলীয় সূত্র মতে, প্ৰদেশ কংগ্রেছৰ পৰা দিল্লীলৈ প্ৰেৰণ কৰা তালিকাত লখিমপুৰ লোকসভা সমষ্টিৰ বাবে কেৱল উদয় শংকৰ হাজৰিকাৰ নামটোহে প্ৰেৰণ কৰা হৈছিল ।
কিন্তু প্ৰাক্তন সাংসদ ৰাণী নৰহে দিল্লীত তেওঁ দলীয় টিকটৰ দাবীদাৰ ৰূপে হেঁচা প্ৰয়োগ কৰে । যাৰ বাবে বিমোৰত পৰে দলৰ শীর্ষ নেতৃত্ব । সেয়ে সমষ্টিটোৰ প্ৰাৰ্থীৰ নাম ঘোষণা কৰিবলৈ কংগ্রেছ দলে কেইবাদিনো সময় ল'বলগীয়া হয় । যাৰ বাবে দলীয় কৰ্মীসকলে এই দিন কেইটা গভীৰ উৎকন্ঠাৰ মাজেৰে পাৰ কৰিবলগীয়া হয় ।
দলৰ প্ৰাৰ্থীজনৰ নামটো কেতিয়া ঘোষণা কৰে এই লৈ দলীয় কৰ্মীসকলৰ মাজত এইকেইদিন উৎকন্ঠা বিৰাজ কৰি আছিল আৰু শনিবাৰে দলে উদয় শংকৰ হাজৰিকাৰ নামটো ঘোষণা কৰাত সন্তুষ্টি প্ৰকাশ কৰে । প্ৰাৰ্থীজনৰ নাম ঘোষণা কৰাৰ লগে লগে দলীয় কৰ্মীসকল উৎফুল্লিত হৈ পৰে ।
ছাত্র আন্দোলনৰ পৰা ৰাষ্ট্ৰীয় ৰাজনীতিলৈ এক সুদীর্ঘ সামাজিক জীৱন পৰিক্ৰমা কৰিছে উদয় শংকৰ হাজৰিকাই । সামাজিক ক্ষেত্রত দীর্ঘদিনীয়া সেৱাৰ বাবে এক শক্তিশালী সামাজিক স্থিতিও আছে উদয় শংকৰ হাজৰিকাৰ । এইবাৰ কংগ্রেছ দলৰ মজিয়াত ভৰি থৈ তেওঁ দিল্লী গমনৰ লক্ষ্য লৈছে ।
প্ৰচণ্ড আত্মবিশ্বাসী প্ৰাৰ্থীগৰাকীয়ে ১২ নং লখিমপুৰ লোকসভা সমষ্টিটোত তেওঁ বিপুল ভোটৰ ব্যৱধানত প্ৰতিদ্বন্দ্বী প্ৰাৰ্থীক পৰাস্ত কৰিব বুলি সাংবাদিকৰ আগত উল্লেখ কৰে । তেওঁ দলীয় মনোনয়ন লাভ কৰাৰ বাবে দলৰ আন বঞ্চিত হোৱা প্ৰাৰ্থিত্ব প্ৰত্যাশীয়ে বিৰোধিতা কৰিব নেকি বুলি সোধা প্ৰশ্নৰ উত্তৰত কয় যে কংগ্রেছত বিৰোধ বা বিসম্বাদ নাই ।
দলীয় টিকটৰ বাবে বহুতে স্বাভাবিকতে আশা কৰে যদিও অৱশেষত যিজনে টিকট পায় সকলোৱে তেওঁকেই দলীয় স্বাৰ্থত সহযোগিতা আগবঢ়াই আৰু ৰাজনৈতিক দলত এইয়া এক স্বাভাৱিক কথা বুলি তেওঁ প্ৰকাশ কৰে । বিজয় সাব্যস্ত হলে তেওঁ সমষ্টিত বৃহৎ বান্ধ, বান গড়াখহনীয়া আদি জলন্ত সমস্যাসমূহ সমাধান কৰাত আগভাগ ল'ব বুলি উল্লেখ কৰাৰ লগতে নিয়োগৰ ক্ষেত্রত সম্ভাৱনা থকা বিভিন্ন দিশত কাম কৰিব বুলি কয় ।
লগতে পঢ়ক : উদয় শংকৰ হাজৰিকা হ’ব লখিমপুৰ লোকসভা সমষ্টিৰ কংগ্ৰেছ প্ৰাৰ্থী - Lakhimpur Lok Sabha Constituency
