কাজিৰঙা, ৩০ ছেপ্টেম্বৰ: বিগত বৰ্ষত পৰ্যটকৰ আগমনেৰে সমগ্ৰ দেশতে অভিলেখ গঢ়া কাজিৰঙাৰ পৰ্যটন বৰ্ষ আৰম্ভ কৰিবলৈ যো-জা চলাইছে ৰাষ্ট্ৰীয় উদ্যান কৰ্তৃপক্ষই ৷ অহা ১ অক্টোবৰত বিশ্ব ঐতিহ্যক্ষেত্ৰ কাজিৰঙা ৰাষ্ট্ৰীয় উদ্যান মুকলি হোৱাৰ লগে লগেই আৰম্ভ হ’ব ২০২৪-২৫ পৰ্যটন বৰ্ষ ৷ জীপ ছাফাৰীৰে আৰম্ভ হ’বলগীয়া পৰ্যটন বৰ্ষটিত হাতী ছাফাৰী যোগ হ’ব ১ নৱেম্বৰত ৷ কাজিৰঙা ৰাষ্ট্ৰীয় উদ্যানৰ অন্তৰ্ভাগৰ বাট-পথ মেৰামতি কৰাৰ লগতে উদ্যানত পৰ্যটক ফুৰাবলগীয়া জীপ চালকসকলকো প্ৰশিক্ষণ প্ৰদানৰ ব্যৱস্থা কৰা হৈছে ৷ ইতিমধ্যে কেইবালানি প্ৰশিক্ষণ সমাপ্ত হৈছে ৷
কাজিৰঙা ৰাষ্ট্ৰীয় উদ্যান আৰু ব্যাঘ্ৰ প্ৰকল্পৰ ক্ষেত্ৰ সঞ্চালক ড° সোণালী ঘোষে জনোৱা অনুসৰি, অহা ১ অক্টোবৰৰ পৰা আৰম্ভ হ’বলগীয়া ২০২৪-২৫ পৰ্যটন বৰ্ষৰ বাবে প্ৰস্তুতি প্ৰায় সম্পূৰ্ণ হৈছে ৷ ১ অক্টোবৰত উদ্যানৰ কাজিৰঙা বনাঞ্চল, বাগৰি বনাঞ্চল আৰু বুঢ়াপাহাৰ বনাঞ্চলৰ কিছু অংশহে পৰ্যটকৰ বাবে মুকলি কৰি দিয়া হ’ব ৷ সেইমতে, কাজিৰঙা বনাঞ্চলত মিহিমুখৰ পৰা ডাফলাং হৈ ভৈছামাৰীলৈকে পৰ্যটকে জীপ ছাফাৰী কৰিব পাৰিব । বাগৰি বনাঞ্চলত বিমলী তিনিআলিৰ পৰা ডোঙালৈকে জীপ ছাফাৰীৰ অনুমতি লাভৰ বিপৰীতে বুঢ়াপাহাৰ বনাঞ্চলত ডিফলু নদীলৈকে পৰ্যটকে ছাফাৰী কৰিব পাৰিব ৷
সঞ্চালক ড° ঘোষে লগতে জনোৱা অনুসৰি, চলিত বৰ্ষৰ বানে কাজিৰঙা ৰাষ্ট্ৰীয় উদ্যানৰ অন্তৰ্ভাগ পৰিষ্কাৰ কৰাত অত্যন্ত সুন্দৰ হৈ পৰিছে ৷ কিন্তু, বাৰিষাত উদ্যানৰ বাট-পথৰ কিছু কিছু অংশ মেৰামতি কৰিবলগীয়া হোৱাত সম্প্ৰতি আংশিকভাৱেহে ৰাষ্ট্ৰীয় উদ্যানখন পৰ্যটকৰ বাবে মুকলি কৰাৰ ব্যৱস্থা কৰা হৈছে ৷ বাট-পথ মেৰামতিৰ লগতে যাৱতীয় কাম-কাজ চলাই থকা উদ্যান কৰ্তৃপক্ষই কয় যে মেৰামতি সম্পূৰ্ণ হ’লেই উদ্যানখন সম্পূৰ্ণকৈ মুকলি কৰি দিয়া হ’ব ৷ আনহাতে, ১ অক্টোবৰতেই কলিয়াবৰৰ নদী পৰ্যটনো মুকলি কৰিব উদ্যান কৰ্তৃপক্ষই ৷ ইপিনে, কাজিৰঙা ৰাষ্ট্ৰীয় উদ্যানত চলিবলগীয়া জীপছি বাহনসমূহৰ নথি-পত্ৰ তন্নতন্নকৈ পৰীক্ষা কৰা হৈছে ৷ তদুপৰি, চালকক বিশেষ প্ৰশিক্ষণ দিয়া হৈছে ৷
উল্লেখ্য যে বিভিন্ন ঘটনা-পৰিঘটনা, অভিলেখ ভংগ কৰা উপাৰ্জনেৰে সামৰণি পৰিছিল কাজিৰঙাৰ ২০২৩-২৪ পৰ্যটন বৰ্ষ । ৰাষ্ট্ৰপতি দ্ৰৌপদী মুৰ্মূ, প্ৰধানমন্ত্ৰী নৰেন্দ্ৰ মোদীৰ কাজিৰঙা ভ্ৰমণ বিগত পৰ্যটন বছৰটোৰ উল্লেখযোগ্য দিশ ৰূপে গণ্য হৈছিল । বিখ্যাত ফুটবলাৰ বাইচুং ভূটীয়াৰ কাজিৰঙা দৰ্শনেও সুকীয়া মাত্ৰা প্ৰদান কৰিছিল কাজিৰঙাক । কাজিৰঙা ভ্ৰমণ কৰিছিল ভূটানৰ ৰজায়ো ৷ প্ৰতিদিনেই বন্যপ্ৰাণীয়ে দৰ্শনীয়ভাৱে পৰ্যটকৰ সমুখত ধৰা দিয়াৰ ৰোমাঞ্চকৰ দৃশ্য যিদৰে সুলভ হৈছিল, একেদৰেই একাধিকবাৰ গঁড়ে পৰ্যটক পৰিবাহী বাহনলৈ চোঁচা লোমহৰ্ষক ঘটনাও সংঘটিত হৈছিল । ইয়াৰ লগতে বিগত পৰ্যটন বৰ্ষত কাজিৰঙাত আৱিষ্কাৰ হৈছিল মাটি গাহৰি, দীঘল নেজীয়া নিগনিৰ দৰে কেইবা বিধো বন্যপ্ৰাণী ।
চৰকাৰী তথ্য মতে, কাজিৰঙা ৰাষ্ট্ৰীয় উদ্যান আৰু ব্যাঘ্ৰ সংৰক্ষিত বনাঞ্চলত ২০২৩-২৪ পৰ্যটন বৰ্ষত পূৰ্বৰ তুলনাত পৰ্যটকৰ সংখ্যা বৃদ্ধি পাইছিল ৷ বিশ্ব ঐতিহ্য ক্ষেত্ৰ কাজিৰঙাৰ নয়নাভিৰাম দৃশ্য, অতুলনীয় জৈৱ বৈচিত্ৰ দৰ্শনৰ বাবে বিগত বৰ্ষত কাজিৰঙালৈ অহা পৰ্যটকৰ পৰিসংখ্যাই পূৰ্বৰ সকলোবোৰ ৰেকৰ্ড ভংগ কৰিবলৈ সক্ষম হৈছিল বুলি ইতিমধ্যেই কাজিৰঙাৰ সঞ্চালকৰ কাৰ্যালয়ে তথ্য প্ৰকাশ কৰিছে ৷
কাজিৰঙা ৰাষ্ট্ৰীয় উদ্যানৰ মুকলি অনুষ্ঠানত স্থানীয় বিধায়ক তথা মন্ত্ৰী কেশৱ মহন্ত, মন্ত্ৰী অতুল বৰা, বনমন্ত্ৰী চন্দ্ৰমোহন পাটোৱাৰী আৰু কাজিৰঙা লোকসভা সমষ্টিৰ সাংসদ কামাখ্যা প্ৰসাদ তাছা উপস্থিত থাকিব বুলি বাগৰি বনাঞ্চলৰ বন সংমণ্ডল বিষয়া বিবিত দিহিঙীয়াই জানিবলৈ দিয়ে ৷
