জোনাই, ১৯ মে' : যি সময়ত ৰাজ্যত সংস্থাপনৰ অভাৱত শিক্ষিত নিবনুৱা যুৱক-যুৱতীয়ে কামৰ সন্ধানত বহিঃৰাজ্যলৈ ঢাপলি মেলিছে, তেনে সময়তে আকৌ নিজৰ ঘৰখনতেই খেতি কৰি বহুতেই স্বাৱলম্বিতাৰ নিদৰ্শন দাঙি ধৰিছে । কেৱল স্বাৱলম্বিতাৰে নিজৰ পৰিয়ালটোকেই যে পোহপাল দিছে তেনে নহয়, আন দহজনৰ বাবেও পেটৰ ভাতমুঠি মোকলাইছে ।
তেনে এজন আদৰ্শ খেতিয়কে জোনাইত দেখুৱাইছে পোহৰৰ পথ । জোনাই মহকুমাৰ অন্তৰ্গত ১ নং ৰাজাখানা গাঁৱৰ সীতাৰাম ছেত্ৰী নামৰ এজন খেতিয়কে চৰকাৰৰ অনুদান অবিহনেই পাঁচ বিঘা মাটিত খেতি কৰি বছৰি লাখ টকাতকৈ অধিক উপাৰ্জন কৰিবলৈ সক্ষম হৈছে ।
কি কি খেতি কৰিছে এইজন কৃষকে :
নিজৰ ঘৰৰ কাষতে থকা ৫ বিঘা ভূমিত সম্পূৰ্ণ জৈৱিক পদ্ধতিৰে স্কোয়াছ (squash vegetable), জিকা, ভাত কেৰেলা, ভেণ্ডি, দাংবডি, জাতি কোমোৰা, পাণ আদিৰ খেতি কৰি মাত্ৰ কেইমাহমানৰ ভিতৰতে ভালফল লাভ কৰিবলৈ সক্ষম হৈছে সীতৰাম ছেত্ৰীয়ে ৷ এইজন আদৰ্শ কৃষকে উল্লেখ কৰা মতে, তেওঁ ইস্কচ তিনি বিঘাত ৰোপণ কৰাৰ উপৰিও পাণ পাঁচশ জোপা ৰুইছে ।
ডেৰ লাখ টকা লাভ হৈছে :
জোনাই মহকুমাৰ অন্তৰ্গত ১ নং ৰাজাখানা গাঁৱৰ সীতাৰাম ছেত্ৰী নামৰ কষকজনে তেওঁৰ কৃষিকৰ্মৰ জৰিয়তে হোৱা লাভ সন্দৰ্ভত কয়, "প্ৰথমতে মই অলপ মাটিত খেতি কৰিছিলো । এইবাৰ পাঁচ বিঘাত বিভিন্ন পাচলিৰ উপৰিও পাণ আদি ৰুইছো । এই বছৰ এতিয়ালৈকে ৬০ হাজাৰ খৰচ কৰি ডেৰ লাখ টকা লাভ হৈছে । ৰাজ্য়ৰ বাহিৰত কাম কৰিবলৈ যোৱাতকৈ ঘৰতেই খেতি কৰিলেও বহু লাভ হয় । খেতি কৰিছো, পইচা পাইছো বাবে মনটো ভাল লাগি আছে । অহা বছৰ ইয়াতকৈ বেছি পৰিসৰত খেতি কৰিম ।"
খেতিৰ জৰিয়তে সীতাৰাম ছেত্ৰীয়ে স্বাৱলম্বী হোৱাৰ উপৰিও কৰ্ম সংস্থাপন দিবলৈ সক্ষম হৈছে স্থানীয় বহু যুৱক- যুৱতীক ৷ সম্পূৰ্ণ জৈৱিক পদ্ধতিৰে সীতাৰাম ছেত্ৰীয়ে কৰা খেতিৰ পাচলি জোনাইৰ লগতে চুবুৰীয়া ৰাজ্য অৰুণাচল প্ৰদেশৰ বিভিন্ন ঠাইলৈ প্ৰেৰণ কৰি অধিক লাভান্বিত হৈছে । এনে খেতিৰ জৰিয়তে সীতৰামে ভালফল পোৱাত নতুন প্ৰজন্মকো কৰ্ম সংস্থাপনৰ বাবে বহিঃৰাজ্যলৈ গৈ সময় নষ্ট নকৰি নিজৰ ঘৰতে বহি কৃষি কৰ্মত মনোৱেশ দিবলৈ আহ্বান জনায় ।
চৰকাৰৰ পৰা কোনোধৰণৰ অনুদান নোপোৱাকৈও অতি সাহসিকতাৰে এই খেতি আৰম্ভ কৰি মাত্ৰ এবছৰৰ ভিতৰতে ভাল ফল লাভ কৰিবলৈ সক্ষম হোৱাত সীতাৰাম ছেত্ৰীৰ মুখত বিৰিঙিছে সফলতাৰ হাঁহি ৷
