তেজপুৰ, ২৩ আগষ্ট : আজিৰ দিনটোতে ইছৰোৰ দ্বাৰা প্ৰক্ষেপিত চন্দ্ৰযান-৩ৰ সফল অৱতৰণ ঘটিছিল ৷ তেজপুৰ বিশ্ববিদ্যালয়ৰ পদাৰ্থ বিজ্ঞান বিভাগৰ উদ্যোগত এই ঐতিহাসিক সাফল্যৰ দিনটোত আজি উদযাপন কৰা হয় ৰাষ্ট্ৰীয় মহাকাশ দিৱস ।
তেজপুৰ বিশ্ববিদ্যালয়ত এই উপলক্ষে আয়োজিত এক কাৰ্যসূচীত বিশ্ববিদ্যালয়খনৰ আমন্ত্ৰণত অংশ লয় ইছৰো অৰ্থাৎ ভাৰতীয় মহাকাশ গৱেষণা সংস্থাৰ উপ-সঞ্চালক, বিশিষ্ট বিজ্ঞানী ড৹ ভি গিৰীশে । ড৹ গিৰীশে বিশ্ববিদ্যালয়ৰ কলাগুৰু বিষ্ণু ৰাভা প্ৰেক্ষাগৃহত আয়োজিত ‘চন্দ্ৰ, এনিগমা’ শীৰ্ষক বক্তৃতানুষ্ঠানত বক্তৃতা প্ৰদান কৰে ৷ ড৹ গিৰীশে কয় যে একমাত্ৰ প্ৰাকৃতিক উপগ্ৰহ চন্দ্ৰক লৈ প্ৰাচীন কালৰে পৰাই মানৱ জাতিৰ মোহ আৰু ৰহস্যৰ সৃষ্টি হৈ আহিছে । তেওঁ চন্দ্ৰ অধ্যয়নে মানৱ জাতিৰ বাবে কিয় অসংখ্য বৈজ্ঞানিক আৰু ব্যৱহাৰিক উপকাৰ প্ৰদান কৰে সেই বিষয়ে আলোচনা কৰে ।
তেওঁ কয়, “চন্দ্ৰৰ ভূতাত্ত্বিক ইতিহাসৰ পৰা আমাৰ গ্ৰহৰ আৰম্ভণিৰ ইতিহাসৰ সূত্ৰ পোৱা যায় । চন্দ্ৰৰ নমুনা আৰু ক্ৰেটাৰ পৰীক্ষা কৰি বিজ্ঞানীসকলে সৌৰজগতৰ গঠনৰ বিষয়ে জানিব পাৰিব ৷ চন্দ্ৰত বৰফ আৰু হিলিয়াম-তিনিৰ দৰে মূল্যৱান সম্পদ আছে বুলি বিশ্বাস কৰা হৈছে । চন্দ্ৰ পৃথিৱীৰ বাহিৰত ভৱিষ্যতে মানৱ অন্বেষণ আৰু বসতিৰ বাবে গুৰুত্বপূৰ্ণ হ’ব পৰা সম্পদ ৷’’
অনুষ্ঠানত ভাষণ প্ৰদান কৰি বিশ্ববিদ্যালয়ৰ উপাচাৰ্য অধ্যাপক শম্ভু নাথ সিঙে অনুষ্ঠানটোৰ গুৰুত্বৰ ওপৰত আলোকপাত কৰে । অধ্যাপক সিঙে কয় “এইবাৰৰ ৰাষ্ট্ৰীয় মহাকাশ দিৱসৰ বিষয়বস্তু ‘চন্দ্ৰ স্পৰ্শ কৰাৰ সময়ত জীৱনক স্পৰ্শ কৰা: ভাৰতৰ মহাকাশ কাহিনী’ ৷ ই মহাকাশ অন্বেষণৰ ক্ষেত্ৰত ভাৰতৰ অসাধাৰণ যাত্ৰা আৰু সমাজত ইয়াৰ প্ৰভাৱ প্ৰতিফলিত কৰে ৷’’
তেওঁ লগতে কয় যে, তেজপুৰ বিশ্ববিদ্যালয়ে ইছৰোক সহযোগিতা আগবঢ়াই আহিছে ৷ ইছৰো আৰু তেজপুৰ বিশ্ববিদ্যালয়ৰ প্ৰাক্তন ছাত্ৰ-ছাত্ৰীয়ে ইছৰোৰ মহাকাশ বিজ্ঞান কাৰ্যসূচী ‘চন্দ্ৰযান-৩’ আৰু ‘আদিত্য-এল১’ৰ অংশ হৈ আহিছে বুলিও দোহাৰে উপাচাৰ্যগৰাকীয়ে ৷ এই বিশেষ বক্তৃতা অনুষ্ঠানৰ উপৰিও পদাৰ্থ বিজ্ঞান বিভাগ আৰু আয়োজক সমিতিৰ অধ্যক্ষ অধ্যাপক গাজী আমিন আহমেদৰ নেতৃত্বত বিশ্ববিদ্যালয়খনে আজিৰ এই বিশেষ দিনটোক সৰ্বসাধাৰণৰ মাজত জনপ্ৰিয় কৰাৰ বাবে কেবাটাও কাৰ্যসূচীৰ আয়োজন কৰে ৷
বিশ্ববিদ্যালয়খনৰ জ্যোতিৰ্বিজ্ঞান ক্লাবে জ্যোতিৰ্বিজ্ঞান পৰ্যবেক্ষণৰ আয়োজন কৰাৰ লগতে কাষৰীয়া গাঁওসমূহত বাহ্যিক কাৰ্যসূচীৰ আয়োজন কৰাৰ লগতে দিনটো পালন কৰিবলৈ পোষ্টাৰসূচীৰো আয়োজন কৰে । ইয়াৰ পূৰ্বে বিশ্ববিদ্যালয়খনৰ ছাত্ৰ-ছাত্ৰী, অধ্যাপক আৰু কৰ্মচাৰীসকলে ৰাষ্ট্ৰীয় মহাকাশ দিৱস উপলক্ষে ৰাষ্ট্ৰপতি দ্ৰৌপদী মুৰ্মুয়ে দেশবাসীক দিয়া ভাষণৰ পোনপটীয়া সম্প্ৰচাৰণ দৰ্শন কৰে ৷
লগতে পঢ়ক : প্ৰথম ৰাষ্ট্ৰীয় মহাকাশ দিৱস; মহাকাশ খণ্ডত ভৱিষ্যতৰ কাৰ্যপৰিকল্পনা উল্লেখ ইছৰোৰ অধ্যক্ষৰ
ৰাষ্ট্ৰীয় মহাকাশ দিৱস: জোনবাইৰ বুকুত ভাৰতৰ পদাৰ্পণৰ সফলতাক উদযাপনৰ এটা দিন
