ডিব্ৰুগড় : দীপাৱলীৰ আনন্দ-উলাহৰ মাজতে চৰাইদেউৰ অসম-অৰুণাচল সীমান্তৱৰ্তী সাপেখাতীত ভয়ংকৰ ঘটনা সংঘটিত হয় । স্বামীৰ দাৰ ঘাপত নিহত হয় পত্নী । সাপেখাতীৰ বাৰেগাঁৱত সংঘটিত হৈছে এই হত্যাকাণ্ডটো ।
নিহত মহিলাগৰাকী সংগীতা মানকি (৩৪) বুলি জানিব পৰা গৈছে ৷ আজি পুৱা স্বামীৰ দাৰ ঘাপত পত্নীৰ মৃত্যু হোৱাত ঘটনাক কেন্দ্ৰ কৰি সমগ্ৰ অঞ্চলটোত এক শোকৰ ছাঁ পৰাৰ লগতে চাঞ্চল্যৰ সৃষ্টি হৈছে ।
জানিব পৰা মতে, আজি (শুকুৰবাৰ) বৰেগাঁৱৰ নিবাসী মণ্টু মানকি আৰু পত্নী সংগীতা মানকিৰ মাজত কোনো কথাত তৰ্ক-বিতৰ্কৰ সৃষ্টি হয় । ইয়াৰ পাছতে কোনো কথাৰ অৱতাৰণা নকৰি মণ্টু মানকিয়ে ঘৰৰ ভিতৰতে পত্নী সংগীতা মানকিক দাৰে ডিঙিত উপৰ্যুপৰি আঘাত কৰে । যাৰ ফলত সংগীতা মানকিৰ থিতাতে মৃত্যু হয় ।
স্থানীয় ৰাইজে এই হত্যাকাণ্ডৰ বিষয়ে জানিব পৰি গাঁওৰক্ষী বাহিনীক খবৰ দিয়ে ৷ তাৰ পাছতে সমগ্ৰ ঘটনা পোহৰলৈ আহে । গাঁওৰক্ষী বাহিনীয়ে মণ্টু মানকিক আটক কৰি আৰক্ষীক খবৰ দিয়ে আৰু ঘটনাস্থলীত আৰক্ষী উপস্থিত হৈ মন্টু মানকিক নিজৰ জিম্মাত লয় ৷
ঘটনা কেনেকৈ পোহৰলৈ আহিল ক'লে গাঁওৰক্ষী বাহিনীৰ সম্পাদকে :
হত্যাকাণ্ড সংঘটিত কৰা পাছতে হত্যাকাণ্ডত ব্যৱহাৰ হোৱা দাখন লৈ পুৱা পথত ঘূৰি আছিল অভিযুক্ত হত্যাকাৰী মণ্টু মানকি । মন্টু মানকিৰ আচৰণ দেখি অঞ্চলটোৰ ৰাইজে কিবা এটা যেন হৈছে সেই কথা অনুমান কৰিছিল । সেয়ে তেওঁলোকে গাঁওৰক্ষী বাহিনীক খবৰ দিয়ে ।
ৰাইজৰ খবৰৰ ভিত্তিত অঞ্চলটোৰ গাঁওৰক্ষী বাহিনীৰ সম্পাদক মন্টু মানকি ঘৰত উপস্থিত হোৱা পাছতেই তেওঁ নিজেই হত্যাকাণ্ড সংঘটিত কৰাৰ কথা স্বীকাৰ কৰে । ইয়াৰ পাছতে গাঁওৰক্ষী বাহিনীৰ খবৰৰ ভিত্তিত আৰক্ষী ঘটনাস্থলীত উপস্থিত হৈ মন্টু মানকিক আটক কৰি হত্যাকাণ্ডত ব্যৱহৃত দাখন জব্দ কৰে ।
