হাজো, 10 মাৰ্চ: দেওবাৰে পুৱাই হাজোৰ বৰ্ণিত সংঘটিত হয় এক ভয়ংকৰ পথ দুৰ্ঘটনা । বলেৰʼ পিক আপ ভেন আৰু মটৰ চাইকেলৰ মুখামুখি সংঘৰ্ষৰ ফলতে এই পথ দুৰ্টনাটো সংঘটিত হয় বুলি জানিব পৰা গৈছে । এই দুৰ্ঘটনাত থিতাতে নিহত 1 জন লোক । আনহাতে, 10 জনতকৈও অধিক লোক গুৰুতৰভাৱে আহত হৈছে বুলি জানিব পৰা গৈছে ।
এই দুৰ্ঘটনাত নিহত লোকজন মুকালমুৱাৰ চাউলখোৱা পাৰৰ ফুলবৰ আলী বুলি চিনাক্ত কৰা হৈছে । এই দুৰ্ঘটনাৰ খবৰ লাভ কৰিয়েই উক্ত স্থানত উপস্থিত হয় আৰক্ষীৰ লোক ৷ ইতিমধ্যে গুৰুতৰভাৱে আহত লোকসকলক আৰক্ষী আৰু স্থানীয় লোকৰ তৎপৰতাত গুৱাহাটী চিকিৎসা মহাবিদ্যালয় হাস্পতাল (GMCH) লৈ প্ৰেৰণ কৰা হৈছে ।
দুৰ্ঘটনাত পতিত হোৱা ব’লেৰখনৰ নম্বৰ AS-25DC-0607 আৰু মটৰ চাইকেলৰ নম্বৰ AS 14K 1290 । জানিব পৰা মতে মুকালমুৱাৰ পৰা গুৱাহাটীলৈ গৈ আছিল মাছ ভৰ্তি বলেৰʼ বাহনখন ।
ইতিমধ্যে সকলোৰে জ্ঞাত যে, দুৰ্ঘটনা ৰোধ কৰাৰ বাবে ৰাজ্য চৰকাৰে বিভিন্ন পদক্ষেপ গ্ৰহণ কৰি আহিছে ৷ কিন্তু এইক্ষেত্রত বিশেষ কোনো সফলতা লাভ কৰা নাই । বিগত কেইবা বছৰ ধৰি অসমত পথ দুৰ্ঘটনাৰ সংখ্যা চিন্তনীয় ৰূপত বৃদ্ধি পাবলৈ ধৰিছে ।
পথ দুৰ্ঘটনাৰ আঁৰত বহু কেইটা কাৰণ জড়িত হৈ আছে ৷ ৰাষ্ট্ৰীয় ঘাইপথ, ফ’ৰলেন আৰু লোকনির্মাণ বিভাগৰ অধীনৰ ভালেমান ৰাজ্যিক পথৰ আধৰুৱা অৱস্থা থকা তথা কাৰিকৰী দিশত বিসংগতিপূর্ণ পথ এতিয়া একপ্ৰকাৰ নীৰৱ ঘাতকলৈ পৰিণত হৈছে । দুর্ঘটনা প্ৰতিৰোধৰ বাবে চৰকাৰে বিভিন্ন কঠোৰ পদক্ষেপ গ্ৰহণ কৰি চালকৰ পৰা জৰিমনাও আদায় কৰি আহিছে । তথাপিও কিন্তু হ্ৰাস হোৱা নাই পথ দুৰ্ঘটনাৰ সংখ্যা ।
লগতে পঢ়ক : পৰীক্ষা দিবলৈ আহি বিদ্যালয়ৰ সন্মুখতে মৃত্যু দুই ছাত্ৰীৰ
