ডিব্ৰুগড়, 14 জুন: ৰাজ্যখনত দিনক দিনে বৃদ্ধি পাইছে বিদ্যুতৰ সমস্যা । প্ৰতিদিনে বিদ্যুতৰ লুকাভাকুত অতিস্থ হৈছে ৰাইজ । সেয়ে ৰাজ্যত বিদ্যুতৰ নাটনি জোৰা মাৰিবলৈ সৌৰশক্তি প্ৰকল্প স্থাপনত গুৰুত্ব প্ৰদান কৰিছে ৰাজ্য চৰকাৰে । এই লক্ষ্য আগত ৰাখি শুকুৰবাৰে ডিব্ৰুগড় জিলাৰ নামৰূপত ২৫ মেগাৱাটৰ সৌৰশক্তি প্ৰকল্পৰ আধাৰশিলা স্থাপন কৰে মুখ্যমন্ত্ৰী হিমন্ত বিশ্ব শৰ্মাই । ১১৫ কোটি টকা ব্যয় সাপেক্ষে নিৰ্মাণ হ'বলগীয়া এই সৌৰশক্তি প্ৰকল্পটো নিৰ্মাণ সম্পূৰ্ণ হ'লে বছৰি ৫০ মিলিয়ন ইউনিট বিদ্যুৎ উৎপন্ন হ'ব ।
নামৰূপ তাপ বিদ্যুৎ প্ৰকল্পৰ চৌহদত নিৰ্মাণ হ’বলগা এই প্ৰকল্পটো অইল আৰু অসম শক্তি উৎপাদন নিগমৰ যৌথ কোম্পানী এ.পি.জি.চি.এল অইল গ্ৰীণ পাৱাৰ লিমিটেডৰ দ্বাৰা নিৰ্মাণ কৰা হ’ব ।
লগতে পঢ়ক: "মুখ্যমন্ত্রীৰ নিযুত মইনা আঁচনি"ৰ বিষয়ে কি ক’লে ছাত্ৰীয়ে ?
মুখ্যমন্ত্ৰীগৰাকীয়ে নামৰূপত এই সৌৰশক্তি প্ৰকল্পৰ আধাৰশিলা স্থাপন কৰি এখন ৰাজহুৱা সভা সম্বোধন কৰে ৷ উক্ত সভাত বৰ্তমান সময়ত বিদ্যুতৰ নাটনি আৰু এই সমস্যা সমাধানৰ বাবে কেনেকৈ সৌৰশক্তিৰ ওপৰত নিৰ্ভৰ কৰিব লাগিব সেই বিষয়ে ৰাইজক অৱগত কৰে । মুখ্যমন্ত্ৰীগৰাকীয়ে কয়, ‘‘অসমত বিদ্যুৎ উৎপাদনৰ বাবে বিশেষ সুবিধা নথকাৰ বাবে সৌৰশক্তিৰ ওপৰত গুৰুত্ব দিবলগীয়া হৈছে । বৰ্তমান ৰাজ্যত ৭ টাকৈ সৌৰশক্তি প্ৰকল্প স্থাপন কৰা হৈছে ।’’
শোণিতপুৰ জিলাৰ বৰচলা আৰু ধুবুৰীত প্ৰকল্প আৰম্ভ কৰাৰ লগতে আজি নামৰূপত এইটো ২৫ মেগাৱাটৰ সৌৰশক্তি প্ৰকল্পৰ আধাৰশিলা কৰা বুলি উল্লেখ কৰে মুখ্যমন্ত্ৰী ড৹ শৰ্মাই । মুখ্যমন্ত্ৰীগৰাকীয়ে এই সভাতে নিজৰ ভাষণৰ জৰিয়তে ৰাইজক প্ৰধানমন্ত্ৰীৰ সূৰ্যঘৰ বিজুলী যোজনা আঁচনি গ্ৰহণ কৰিবলৈ আহ্বান জনায় । এই আচঁনিৰ জৰিয়তে এটা পৰিয়ালে ৩ কিলোৱাট সৌৰশক্তি উৎপাদন কৰিব পাৰিলে বিদ্যুতৰ সমস্যা নাথাকিব বুলি উল্লেখ কৰে মুখ্যমন্ত্ৰীগৰাকীয়ে ।
লগতে পঢ়ক: মধ্যাহ্ন ভোজনৰ নামত ছাত্ৰ-ছাত্ৰীক খুৱালে গেলা কণী : তাৰ পিচত হাহাকাৰ
এই আচঁনিখনৰ সুবিধা লাভ কৰিবলৈ প্ৰতিগৰাকী গ্ৰাহকে ক্ৰয় কৰিব লাগিব ছ’লাৰ পেনেল ৷ 3 কিল’ৱাটৰ ছ’লাৰ পেনেলখনৰ বাবে খৰচ হ’ব এক লাখ পঞ্চাশ হাজাৰ টকা ৷ কেন্দ্ৰীয় আৰু ৰাজ্য চৰকাৰে মিলি এক লাখ ত্ৰিশ হাজাৰ টকাৰ ৰাজ সাহায্য দিব বুলিও মুখ্যমন্ত্ৰীয়ে ঘোষণা কৰে ।
শুকুৰবাৰৰ সভাখনত মুখ্যমন্ত্ৰীৰ সৈতে উদ্যোগ মন্ত্ৰী বিমল বড়া, শ্ৰম মন্ত্ৰী সঞ্জয় কিষাণ, বিধায়ক তৰংগ গগৈ, চক্ৰধৰ গগৈ, বিনোদ হাজৰিকা , প্ৰশান্ত ফুকন, তেৰছ গোৱালাৰ লগতে ৰাজ্য চৰকাৰৰ কেবাটাও বিভাগৰ শীৰ্ষ বিষয়া উপস্থিত থাকে ।
লগতে পঢ়ক: ভয়াৱহ নিবনুৱা সমস্যাৰ কৱলত অসম: পঞ্জীয়নভুক্ত ২৮ লক্ষাধিক কৰ্মহীনৰ ৭৭৫ গৰাকী ডক্টৰেট ডিগ্ৰীধাৰী
