গুৱাহাটী : বুধবাৰে কংগ্ৰেছৰ প্ৰতিবাদত অংশগ্ৰহণ কৰিবলৈ আহি মৃত্যুক আঁকোৱালি ল'লে অধিবক্তা মৃদুল ইছলামে । আৰক্ষীৰ কন্দুৱা গেছত অধিবক্তা তথা প্ৰদেশ কংগ্ৰেছৰ আইনী কোষৰ সম্পাদক মৃদুল ইছলামৰ মৃত্যু হোৱা বুলি ইতিমধ্যে কংগ্ৰেছে অভিযোগ কৰিছে । লতাশিল আৰক্ষী থানাত ইতিমধ্যে এই ঘটনাৰ তদন্তৰ বাবে কংগ্ৰেছে এজাহাৰো দাখিল কৰিছে । অৱশ্যে তাৰ মাজতে গুৱাহাটীৰ আৰক্ষী আয়ুক্ত দিগন্ত বৰাই ঘটনা সন্দৰ্ভত প্ৰকাশ কৰিছে প্ৰতিক্ৰিয়া ।
আৰক্ষী আয়ুক্তৰ প্ৰতিক্ৰিয়া
আৰক্ষী আয়ুক্ত দিগন্ত বৰাই এই সন্দৰ্ভত কয়, "আজিৰ প্ৰতিবাদৰ বাবে কংগ্ৰেছে অনুমতি লোৱা নাছিল । প্ৰতিবাদৰ বাবে কোনো ধৰণৰ অনুমতি বিচৰাও নাছিল দিয়াও হোৱা নাছিল । অনুমতি অবিহনে এই প্ৰতিবাদ হৈছিল । প্ৰায় এহাজাৰ প্ৰতিবাদকাৰীয়ে কংগ্ৰেছৰ এই প্ৰতিবাদত অংশগ্ৰহণ কৰিছিল । প্ৰতিবাদকাৰীয়ে দুখন বেৰিকেড পাৰ হোৱাৰ পিছত তৃতীয়খন বেৰিকেডত উপস্থিত হোৱাত কন্দুৱা গেছ প্ৰয়োগ কৰা হৈছিল । আমি অতিৰিক্ত বাহিনী ব্যৱহাৰ কৰা নাই । অৱশ্যে আৰক্ষীয়ে কন্দুৱা গেছ ফায়াৰ কৰা নাছিল, ৰাস্তাত ৰোল কৰি দিছিল । ধোঁৱা ওলোৱাৰ পিছত কন্দুৱা গেছৰ ৰোল আৰক্ষীলৈ লক্ষ্য কৰি নিক্ষেপ কৰিছিল প্ৰতিবাদকাৰীয়ে । প্ৰতিবাদ শেষ হোৱাৰ পিছত আমি খবৰ পাইছিলো যে এজন ব্যক্তি অসুস্থ হৈ পৰিছিল । ব্যক্তিজনক বন্ধুবৰ্গই প্ৰথম অৱস্থাত সমীপত থকা ব্যক্তিগত হাস্পতাল এখনলৈ লৈ গৈছিল । কিন্তু চিকিৎসকে জি এম চি এইছলৈ প্ৰেৰণ কৰে । জি এম চি এইছত চিকিৎসকে লোকজনক মৃত ঘোষণা কৰে ।"
আৰক্ষী আয়ুক্তই লগতে কয়, "প্ৰাথমিক তদন্ত কৰি গম পালো যে ব্যক্তিজনে তাত বিভিন্নজনক কৈছিল নিজৰ অসুস্থতাৰ কথা । নিজৰ গাড়ীত গৈ পানী খোৱাৰ পিছত অসুস্থ হৈছিল বকোৰ মৃদুল ইছলাম নামৰ লোকজন । এতিয়া প্ৰথমে দণ্ডাধীশ পৰ্যায়ত তদন্ত হৈছে । কোনো ধৰণৰ আঘাতৰ চিন নাই মৃত লোকজনৰ দেহত । মৰণোত্তৰ পৰীক্ষাৰ প্ৰতিবেদনতহে গম পোৱা যাব মৃত্যুৰ আচল কাৰণ ।
ইফালে আৰক্ষী আয়ুক্তৰ এই ভাষ্যৰ বিপৰীতে কংগ্ৰেছে স্পষ্ট কৰি দিছে যে বুধবাৰৰ এই প্ৰতিবাদৰ বাবে তেওঁলোকে আৰক্ষীৰ পৰা অনুমতি বিচাৰিছিল ।
